Na Cava ena Yaco ena Siga ni Lewa?

KE VAKA kina, e veivakacegui na ituvatuva vakayalololoma qo me baleta na Siga ni Lewa, nida na vakalougatataki kina na bula​—okati tale ga kina o ira era sa takali. (Maciu 20:28; Joni 3:16) Cava me yaco kina na Siga ni Lewa? Na cava sara mada ena yaco ena “siga” ya?

Cava me Yaco Kina na Siga ni Lewa?

Nona biuti keda e vuravura na Kalou e sega ni kena inaki meda vakatovolei, me qai vakadeitaki kina noda lai bula ina dua tale na vanua ena gauna mai muri. Ia a bulia na tamata me bula tawamudu ena vuravura. A taucoko na yagodrau kei na nodrau vakasama na imatai ni veiwatini, ia rau a talaidredre vei Jiova. Rau sega kina ni bula tawamudu, rau vakadewa tale ga na ivalavala ca kei na mate vei ira kece nodrau kawa.​—Vakatekivu 2:15-17; Roma 5:12.

Ena duanaudolu na yabaki ni Siga ni Lewa, era na rawata tale na kawatamata na ka rau a vakayalia o Atama kei Ivi.a Raica na Cakacaka 17:31 e toka e cake, e tukuna ni Siga ni Lewa ena tarai keda kece na tiko e “vuravura.” O ira era vakadonui, era na marautaka na bula tawamudu ena ituvaki uasivi e vuravura. (Vakatakila 21:3, 4) Na Siga ni Lewa ena vakayacori kina na inaki taumada ni Kalou me baleta na vuravura kei na tamata.

E digitaki Jisu Karisito na Kalou me Turaganilewa. E tukuna na iVolatabu ni na “lewai ira na bula kei ira na mate” o Jisu. (2 Timoci 4:1) O cei o ira “na bula” era na lewai? Era na bula tale vakacava ena “vuravura” na mate?

“Lewai Ira na Bula” o Jisu

Sa voleka sara me cava na veika ni vuravura qo a parofisaitaki tu mai. Na Kalou ena vakarusa na ivakarau ca kece, kei ira na tamata ca. Era na lewai o ira na “bula” sivia yani na kena muduki na veika ni vuravura qo.​—Vakatakila 7:9-14; 19:11-16.

Ena loma ni 1,000 na yabaki ni Siga ni Lewa, o Jisu kei ira na 144,000 na tagane kei na yalewa era vakaturi mera bula e lomalagi, era na lewa mai na vuravura. Era na tui, ra bete, ra vakadewa na yaga ni isoro ni veivoli i Jisu, ra qai vakalesuya vakamalua vei ira na yalodina na yago kei na vakasama e taucoko.​—Vakatakila 5:10; 14:1-4; 20:4-6.

Ena vesu tu o Setani kei ira nona timoni ena Siga ni Lewa me kua ni vakacala na kawatamata. (Vakatakila 20:1-3) Ia ni sa cava na Siga ni Lewa, ena vakatarai o Setani me vakatovolea na nodra yalodina o ira kece na bula ena gauna ya. O ira na yalodina tiko ga vua na Kalou era vakaraitaka nira sega ni rawai ena veivakatovolei rau a sikalutu kina o Atama kei Ivi. E ganiti ira mera bula tawamudu ni sa Parataisi tale o vuravura. O ira era digia mera talaidredre vua na Kalou, era na vakarusai, vaka kina o Setani kei ira na timoni.​—Vakatakila 20:7-9.

Ra Lewai “na Mate”

E kaya na iVolatabu nira na “vakaturi” na mate ena Siga ni Lewa. (Maciu 12:41) E kaya o Jisu ni “sa voleka na gauna mera rogoca na domona o ira kece na tu ena ibulubulu mera tucake mai. O ira era cakava na ka vinaka era na vakaturi mera bula, o ira era cakava na ka ca era na vakaturi mera lewai.” (Joni 5:28, 29) Qo e sega ni vakaibalebaletaka na yalo e dau nanumi tu ni veikalikali kei na yago nida mate. Ni dua e mate sa sega ni qai vakila e dua na ka, e sega gona ni dua tale na ka e bula tiko. (Dauvunau 9:5; Joni 11:11-14, 23, 24) Ena vakaturi ira na mate o Jisu mera bula tale ena vuravura.

Era na lewai beka na vakaturi ena veika era a cakava ni bera nira mate? Sega. E kaya na iVolatabu ni “o koya e mate e sa bokoci na nona ivalavala ca.” (Roma 6:7) Me vakataki ira era bula sivia na kena muduki na veika ni vuravura qo, o ira tale ga era vakaturi mera bula e vuravura era na lewai “me salavata kei na ka era cakava” ena Siga ni Lewa. (Vakatakila 20:12, 13) Na nodra vakaturi mera bula tawamudu se rusa tawamudu ena vakatau sara ga ena ka ra cakava ena loma ni gauna qori. Levu era vakaturi e se qai matai ni gauna mera kila kina na Kalou o Jiova kei na nona ivakatagedegede me rawati kina na bula. Ena soli na gauna me rawa nira moica nodra bula me salavata kei na inaki ni Kalou, ra qai rawata na bula tawamudu ena vuravura.

Me Kua ni Rerevaki na Siga ni Lewa

Na Siga ni Lewa e sega ni gauna wale ga ena veivakavulici kina na Kalou, ia e gauna tale ga mera bulataka kina na ka era vulica o ira na bula ra qai marautaka na kena veivakalougatataki. Vakasamataka mada nomu marau ni o sotavi ira tale na wekamu voleka era vakaturi, qai bula uasivi vata kei ira!

Ni cava na Siga ni Lewa, na Kalou ena vakatarai Setani me vakatovolea nodra yalodina na tamata. Ia e sega ni dodonu meda nuiqawaqawataka se rerevaka. Ni o ira kece na bula era na vakarautaki vinaka ena iotioti ni veivakatovolei ni cava na Siga ni Lewa. Qo e dua na sala ena vakayacori kina na inaki ni Kalou, ena kena kau laivi na leqa kece a vu ena talaidredre vua na Kalou ena were o Iteni.