Yaga na Awake! ena Nona Vakabulai e Dua na Gone se Bera ni Sucu

● O Anita e dua na marama ni Mexico esa tolu tiko na luvena, qai bukete tale.a A tukuna vei watina ni sega ni vinakata me dua tale na gone, ena cakava gona na ka kece e rawa me vakalutuma kina. E tukuna tale ga ni na vakamatei koya! Ena gauna qori, e vuli iVolatabu tiko kina kei na dua na iVakadinadina i Jiova, ia e sega ni toso vinaka nona vuli. E tukuna, “Au dau dokadoka.”

Mani vakamacalataka na iVakadinadina vei Anita na ivakavuvuli vakaivolatabu e ganita na kena ituvaki. Kena ivakaraitaki, e tukuna vei Anita ni ka talei vua na Kalou na bula ni gone se bera ni sucu. E Isireli makawa, ke dua e vakamavoataka e dua na yalewa bukete, qai mate kina o koya se na gone, e vakarota na Lawa ni Kalou me tau vua e veivakamavoataki na itotogi. (Lako Yani 21:22, 23)b Ia a sega ni via rogoca ya o Anita. Sa vakatulewataka oti na ka me cakava.

E tukuna o Anita: “E tukuna e dua ni na lutu na gone keu cula ena dua na mataqali wainimate gaga. Au volia na wainimate ya, qai kerea e dua noqu itokani me culai au. Ia e sega ni yaco e dua na ka. Au qai kila emuri ni noqu itokani ya a culai au ena wai, sega ni wainimate gaga, ni sega ni via beitaki ena noqu vakalutu.”

E sasaga tiko ga o Anita. Ni sa vula va, a sotava e dua na vuniwai a vakadonuya me vakalutuma na gone. Ni vo e ono na siga me lai raici vuniwai, a solia na iVakadinadina vei Anita na Awake! 22 Me, 1980, na kena ulutaga, “Diary of an Unborn Child,” (Na Nona Dairi na Gone se Bera ni Sucu). E tukuni ena “dairi”: “A vakamatei au nikua o tinaqu.” A kurabuitaka o Anita na vosa qori, qai tagi me vica na aua. E kaya: “Au kila ena ulutaga ya ni cala na ka au a via cakava.”

A qai vakasucuma o Anita e dua na goneyalewa bulabula vinaka. E tukuna o koya: “Au kalougata niu kilai Jiova, au lomani koya tale ga mai vu ni lomaqu.” E vakavulici luvena tiko ena Vosa ni Kalou me lomani Jiova tale ga. E tukuna o luvena yalewa ni vakabulai koya na Kalou​—imatai, ni Vunibula, kena ikarua, na ivakavuvuli ena nona Vosa, me vaka a vakamacalataki ena Awake!, a vakabulai koya.

[iVakamacala e ra]