Na Yatuyanuyanu na Faeroe—Kena iSema Vakasakiti
Na Yatuyanuyanu na Faeroe, e tiko kina e 18 na yanuyanu lalai ena wasawasa voravora na Noca Atalanitika. O ira na lewenivanua e kea era vosa vakaFaeroe. Na yatuyanuyanu totoka qo e levu na kena delana, qai coka sobu i waitui. Levu na vale ena veikorokoro era tara voleka e matasawa, e duidui tale ga na kedra roka. Ena vulaikatakata, e totoka na irairai ni co drokadroka e ubia tu na veidelana.
Era dau cakacaka vata na le 48,000 na lewenivanua ena yatuyanuyanu qo, ia e dredre qori ena so na gauna. E dau vakayagataki tu eliu na waqa e vocetaki me veivakaleleci mai na dua na yanuyanu ina dua tale, e dau usana tale ga na iyaya. Ni dua e gole ena dua tale na koro, ena taubaletaka na veiqakilo kei na veidelana. Dua na cakacaka levu na taravale, ni dau usani na iyaya kece ni vale ena waqa e vocetaki. Ni bera ni tara na vale, na iyaya qo ena colati mai na dua na toba lailai e baravi me yaco ina vanua ena tara kina na vale.
iMatai ni Lewenivanua
Na imatai ni itukutuku e kilai me baleta na yatuyanuyanu na Faeroe a vola e dua na vakailesilesi ni lotu (monk) mai Ailadi, rauta na 825 S.K. E tukuna ni so tale nona itokani era a tu e kea ni sivia e dua na drau na yabaki ni bera nona tadu yani o koya. Ia a tauyavu e dua na itikotiko ena yanuyanu qo ena nona yaco mai o Grímur Kamban, mai Norway, ena itekitekivu ni ikaciwa ni senitiuri.
O ira na se tiko taumada ena yanuyanu qo, era dau qoli mera bula kina e veisiga, ia emuri sa ra susu sipi tale ga. Ena vosa vakaFaeroe, na yaca Føroyar (Yatuyanuyanu na Faeroe) e kena ibalebale “Yanuyanu ni Sipi.” E se bibi tiko ga vei ira na susu sipi. Na vutinisipi e taqomaki ira mai na cagi, uca kei na batabata. A dau tukuni tale tu ga ni ‘vutinisipi e vaka sara ga na koula vei ira e kea.’
Nikua, e levu sara na iwiliwili ni sipi mai na iwiliwili ni lewenivanua. Ni vakamatei oti na sipi me vaka na kena ivakarau vei ira, ena vakaliligi ena vale e vaka na vakatuniloa me liwava na cagi me mamaca na lewena. Qo ena duatani kina na kena ikanakana, ena taleitaki tale ga vakalevu.
Me vaka e namaki ena dua na yanuyanu lailai e tuyawa, era vakila na lewenivanua eke ni vakaduavatataki ira na nodra kila ni bibi mera veivukei me rawa kina nira bula. E se tiko ga nikua na duavata qori, dina ni sa rawarawa na sala ni veilakoyaki kei na vakauitukutuku ena so tale na yanuyanu.
Kedra iSema na Tanala
Na imatai ni tanala a dola ena 1963. A ta na tanala qo ena dua na ulunivanua ena sauca ni yanuyanu na Suðuroy, e sema e rua na koro. A vinakati vakalevu na kelikeli, na drili kei na vakayagataki ni dainimati ena caka ni tanala, qai caka qori ena yasa ruarua ni ulunivanua.
Dua na tanala se qai ta oti ga, e cici kina na gaunisala ena rauta ni 150 na mita e loma ni waitui, e semati kina e rua na yanuyanu lelevu. A vakayagataki ena kena keli e dua na drili e 5 na mita na kena balavu me qivai kina e dua na qara ena vatu lelevu. Ni sa caka oti, sa qai vakacabotetaki kina na dainimati. Oti ya, sa qai kau laivi na vatu lelevu, e galala kina e 5 na mita na yasa ni tanala. E caka tiko qo me yacova ni sa voleka ni 6 na kilomita na balavu ni tanala. Ena 29 ni Epereli 2006, sa qai tekivu cici kina na motoka.
Era le lailai ga na lewenivanua ni yanuyanu qo, ia e 18 taucoko na kena tanala, e rua e tiko e loma ni waitui e semai ira na yanuyanu. Sa navuci tiko me ta tale na tanala vou. Era sa vakasamataka tiko na lewe ni Palimedi me ta e rua na tanala me sema e rua na yanuyanu lelevu. Dua vei rau e 11.9 na kilomita na kena balavu e nanumi tiko me vakacavari ena yabaki 2012, qo e dua vei ira na tanala balavu duadua e vuravura me tiko e loma ni waitui.
Dua Tale na iSema Vakasakiti
Eso na ilala era tiko ena yanuyanu qo era vakaduavatataki ena dua tale na isema vakasakiti—era kilai tani kina na iVakadinadina i Jiova. Ena yabaki 1935, rau a veisiko ena yanuyanu qo e rua na marama gugumatua iVakadinadina i Jiova mai Denmark—rau dau taubale ena vulaikatakata me rau tukuna e veivale na itukutuku vinaka ni Matanitu ni Kalou. Yaco mera taleitaka na itukutuku ya eso na lewenivanua, ra veitomani tale ga ena kena vunautaki.—Maciu 24:14.
Nikua, e rauta e duanadrau na iVakadinadina era dau soqoni ena va na Kingdom Hall ena yanuyanu. Era gugumatua ena nodra cakacaka vakaitalatala, qai vakarawarawataka nodra cakacaka na gaunisala vivinaka kei na tanala e semata na veiyanuyanu totoka ena wasawasa voravora na Noca Atalanitika.
[iYaloyalo ena tabana e 13]
E semati e rua na yanuyanu lelevu ena tanala qo, e cici kina na motoka ena 150 na mita e loma ni waitui