Na Rai ni iVolatabu

O Cei o Ira na Timoni?

E LEVU na lotu era vakabauta nira ka bula vakayalo na kalou vu, yalovelavela, kei na timoni, ra qai nanuma nira rawa ni veivukei, ra veivakararawataki, se ra cakava ruarua. Eso era sega ni vakabauta qori, era nanuma ni oya e vakabauta ga vakatevoro se ka e vatavatairalagotaki ga. Ia na cava sara mada e kaya na iVolatabu?

E tukuna na iVolatabu ni Dauveibuli mada ga e Yalo, era ka bula vakayalo tale ga na imatai ni nona ibulibuli. (Joni 4:24; Iperiu 1:13, 14) Na iVolatabu e dau vakaibalebaletaki ira tale ga vakalevu na ka bula vakayalo ca mera timoni. (1 Korinica 10:20, 21; Jemesa 2:19) Ia e sega ni vakavuvulitaka na iVolatabu ni buli ira na timoni na Kalou. O cei gona o ira na timoni? Era mai bula tu vakacava?

“Agilosi Era a Valavala Ca”

Na gauna a buli ira kina na ka bula vakayalo na Kalou, a solia vei ira na galala ni vakatulewa, mera caka vinaka se caka ca. Ia ka ni rarawa ni oti ga na nodrau buli na imatai ni tamata, era digia e levu na agilosi mera talaidredre vua na Kalou.

Na imatai ni ka bula vakayalo e kilai levu na nona veivorati, o Setani. A tukuna o Jisu Karisito: “E sega ni dei ena dina.” (Joni 8:44) Na cava e saqata kina na Kalou o Setani? A kocova na sokalou a dodonu me caka duadua ga vua na Dauveibuli, a vakalaiva me bucina na rai cala, mani veimecaki kina kei na Kalou. Qo sara ga na sala a veisau kina o koya me o “Setani,” e kena ibalebale “dauveivorati.” Ni oti e vica tale na senitiuri ni bera na waluvu, era tomani Setani eso tale na agilosi nira biuta na nodra itutu mai lomalagi ra qai liatamata mera vakaitikotiko e vuravura. (Vakatekivu 6:1-4; Jemesa 1:13-15) Ni sa waluvu na vuravura, era veisautaka tale na yagodra na “agilosi era a valavala ca” ra qai lesu i lomalagi. (2 Pita 2:4; Vakatekivu 7:17-24) Era vakatokai gona mera timoni.​—Vakarua 32:17; Marika 1:34.

E duatani sara na ituvaki era sotava na agilosi talaidredre qo mai na kena era marautaka ni bera na nodra veivorati. E tukuna na Juta 6: “Era sega ni tudei tale ga na agilosi ena nodra vanua nira biuta na nodra itikotiko dodonu, sa vakarautaka [na Kalou] na kedra ivesu tawamudu ena butobuto loaloa me yacova na siga ni veilewai levu.” Io a sega ni vakatara na Kalou mera qarava tale na nodra itavi dokai e lomalagi, ia e biuti ira vakaivakatakarakara “ena butobuto loaloa,” mera yawa mai na rarama vakayalo kece.

“Vakacala . . . na Vuravura Taucoko”

Sa sega nira liatamata tale na timoni, ia se tiko ga vei ira na kaukaua mera vakamua na nodra vakanananu kei na nodra bula na tamata. Nikua e “vakacala tiko na vuravura taucoko” o Setani kei ira na timoni. (Vakatakila 12:9; 16:14) Ena sala cava? Oya na nodra vakatetea e levu na “ivakavuvuli ni timoni.” (1 Timoci 4:1) Na ivakavuvuli lasu qo e vakalevu ga me ivakavuvuli ni lotu, e sa vakamatabokotaka e milioni mera kua ni kila na ka dina me baleta na Kalou. (2 Korinica 4:4) Meda raica mada eso na kena ivakaraitaki.

● iVakavuvuli nira se bula tiko ga na mate. Era veivakacalai na timoni ena raivotu, rorogo ni domo kei na ivadi ca tale eso, era vakacalai e levu mera vakabauta nira rawa ni veivosaki kei ira na mate. Na iwalewale qaseqase qo e vakavuna mera vakabauta kina e levu ni bula tale tiko e dua na ka ena gauna eda mate kina. Ia e vakaraitaka vakamatata na iVolatabu: “[O] ira na mate sa sega ni kila tale e dua na ka.” (Dauvunau 9:5, 6) ‘Nira sa lako sobu ena vanua era galu kina,’ era sa sega ni vakavinavinaka rawa vua na Kalou.​—Same 115:17.a

● Sega ni taleitaka na itovo savasava. E kaya na 1 Joni 5:19: “E lewa tiko na Vunica na vuravura taucoko.” E vakadinadinataki na kaukaua ni veivakamuai i Setani kei ira na nona timoni ena nodra vakayagataka na sala ni vakauitukutuku kei na so tale na sala mera vakatetea kina na rai cala, oya nida rawa ni vakamalumalumu ina noda gagadre vakayago. (Efeso 2:1-3) Sa takalevu gona nikua na tovo vakasisila ena kena veimataqali, wili kina na veiyacovi vakasisila. E ciqomi tu nikua na ivalavala kece qori, e tukuni tale ga ni ivola makawa na iVolatabu qai qiqo na kena ivakavuvuli.

● Na vakatevoro. A sotava na yapositolo o Paula e dua na goneyalewa bobula e “daurairai e curumi koya na timoni.” Ni dua na bobula a rawa ni “vakavutuniyautaki ira nona turaga ena nona dau tukuna na ka e se bera ni yaco.” (Cakacaka 16:16) A kila vinaka o Paula na vu ni nona kaukaua na goneyalewa qo, a sega kina ni via vakarorogo vua. A sega tale ga ni via vakararawataka na Kalou o Paula, ni kila ni ka vakasisila vei Jiova na iwalewale kece ni qaravi tevoro​—wili kina na raikalokalo kei na veivosaki kei ira na mate.​—Vakarua 18:10-12.

Taqomaki Iko Vei Ira na Timoni

O na taqomaki vakacava vei ira na timoni? E tukuna na iVolatabu: “Moni vakamalumalumutaki kemuni vua na Kalou; moni vorata na Tevoro, ena qai dro tani kina vei kemuni.” (Jemesa 4:7) Nida muria na ivakaro qori, eda sa muria sara tiko ga na ivakavuvuli ena iVolatabu, na ivola talei duadua e vakavotui kina na itukutuku kece i Setani, o ira na timoni kei na nodra “ivadi.” (Efeso 6:11; 2 Korinica 2:11) E tukuna na iVolatabu nira na vakarusai na kabula vakayalo ca, kei ira era saqata na Kalou. (Roma 16:20) E kaya na Vosa Vakaibalebale 2:21: “[E]ra na tiko ga e na vanua na yalododonu, ka ra na tiko dei kina na yalodina.”

[iVakamacala e ra]

O DAU VAQAQA?

● A buli ira na timoni na Kalou? ​—2 Pita 2:4.

● Eda rawa ni veivosaki kei ira na mate?​—Dauvunau 9:5, 6.

● O na taqomaki iko vakacava vei ira na timoni?​—Jemesa 4:7.

[iYaloyalo ena tabana e 11]

E levu na sala era saga na timoni mera lewai ira kina na kawatamata