“Na ka Dina ena Qai Sereki Kemuni”!

E DINA na ka e tukuna qori o Jisu Karisito ena Joni 8:​32. Na ka dina ena iVolatabu e sereki keda mai na vakabauta vakatevoro kei na ivalavala e cata na Kalou qai rawa ni vakaleqai keda. Ena vica na ivakaraitaki qo mai na duidui vanua, e laurai kina ni ka dina ena iVolatabu e sereki ira eso mai na ivalavala ni Kirisimasi e veivakaocai.

Veisereki na ka Dina ena iVolatabu!

Argentina E tukuna o Oscar: “Keitou sereki vakavuvale mai na leqa e vu mai na kana kei na gunu sivia, kei na iloloma e sega ni ceguvi rawa na kena isau.”

Dua na ka na nona lomavakacegu o Mario ni vakaraitaki vua na ka e vakatoka me “lasu me baleta na Kirisimasi. Au sa marautaka tiko qo na noqu vakavinavinakataki ira eso tale ena noqu soli iloloma vei ira ena gauna ga au vinakata kina, qai vakatau ena noqu ituvatuva vakailavo.”

Kenada E vola o Elfie: “Au dau taleitaka meu soli iloloma, meu taura tale ga. Ia au sega ni taleitaka na soli iloloma e caka vakavoraki. Na neitou sa sega ni solevutaka na Kirisimasi e vaka ga na vakacegu e vakilai ena gauna ni gade!”

E nanuma lesu o Ulli, e dua na luvei Elfie yalewa: “Nirau sa sega ni solevutaka na noqu itubutubu na Kirisimasi, erau dau qai tuvanaka eso na ka me keitou marautaka qai sega ni vakatikinisigataki na nodrau soli iloloma, keitou marautaka sara ga oya ni dau caka ena gauna keitou sega ni namaka! Nira dau taroga na neitou lewenikalasi na vuna e soli kina na iloloma, keitou dau tukuna ena marau, ‘Erau via soli iloloma ga vei keitou!’ Ia e sega ni rawarawa na nodrau veisautaka na neitou itubutubu na neitou ivakarau ni bula me salavata kei na ka dina ena iVolatabu, nira tusaqati keitou kina na weka. Ia erau dei tu ga na neitou itubutubu. E uqeti au vakalevu na nodrau dei me rau qaravi Jiova ena sala e vakadonuya.”

E kaya o Silvia ni “lomavakacegu” ni sa sega ni solevutaka na Kirisimasi. “Au marau sara ga! Au kila niu vakamarautaka na Kalou o Jiova, e vinaka cake qori mai na udolu vakacaca na Kirisimasi e solevutaki.”

Kenya A vola o Peter: “Ena gauna au se solevutaka tu kina na Kirisimasi, au dau dinau vakalevu meu voli iloloma, me saumi tale ga kina na kakana sau levu. Qori e vakavuna meu cakacaka vakasivia, qai lailai na gauna keitou tiko kina vakavuvale. Au marau sara ga niu sereki mai na ka kece oya!”

E tukuna o Carolyne: “E sega ni vakatikinisigataki na noqu soli iloloma kei na nodra soli iloloma vei au na noqu vuvale kei na noqu itokani. Au vakabauta ni iloloma e sega ni dau namaki va qori na kena soli qai vu mai lomada, e iloloma vinaka duadua.”

Japani Erau vola o Hiroshi kei Rie: “Eratou sega ni dau namaka na luvei keirau me soli na iloloma, e sega tale ga ni tiko vei ratou na rai ni dodonu me keirau cakava oya. Keirau marau niratou kila ni dodonu me vu mai lomada na soli ka.”

E nanuma lesu o Keiko: “Keitou dau solevutaka tu vakavuvale e liu na Kirisimasi. Ni sa dau moce na luvei keirau tagane, keirau dau lai biuta kei tamana e dua na iloloma ena yasa ni nona idavodavo. Keirau dau tukuna vua ena mataka tarava: ‘Ni o gone vinaka, a solia kina vei iko o Santa e dua na iloloma.’ Ena gauna au sa kila kina na ka dina me baleta na Kirisimasi au qai tukuna vei luvequ, a kurabui sara ga qai tagi ni lasu na ka e dau tukuni vua. Au qai vakadeitaka e keri ni lasu na kena dau tukuni tu ni totoka na Kirisimasi. Au liaca tale ga niu dabui luvequ ena noqu dau tukuna vua na lasu oya.”

Filipaini E kaya o Dave: “Au na sega ni vola rawa na levu ni noqu marautaka na ka dina e vakaraitaka vei keda o Jiova ena iVolatabu. Nira soli iloloma na lewe ni noda vuvale, eda sega ni namaka me soli lesu mai e dua na ka. Eda soli ka tale ga mai vu ni lomada.”

Qori e vica ga na ivakaraitaki mai na milioni vakacaca era vakadinadinataka ena ka era sotava ni veisereki na ka dina ena iVolatabu. E bibi sara nida vakamarautaka na Kalou nida moica na noda bula me salavata kei na ka dina ena iVolatabu. (Vosa Vakaibalebale 27:11) A tukuna o Jisu Karisito: “O ira era sokalou dina, ena yavutaki tale ga ena dina nodra sokalou, ni o ira sara ga qo e qara o Tamada mera qaravi koya.” (Joni 4:​23) Ni dikeva na lomamu na Kalou, ena raica beka ni o vinakata mo kila na ka dina? E nuitaki ni isau ni taro qori na io!

[iYaloyalo ena tabana e 20]

Era dau soli ka ena loloma na lotu vaKarisito qai sega ni vakatikinisigataki