Vosota na Nona Takali e Dua

A bulabula vinaka tu o Nicolle, e dua na goneyalewa lailai. Ia a tukuna ena dua na yakavi ni mosi na uluna, rau mani kauti koya na nona itubutubu e valenibula. Ia ena yakavi tarava ga ni se laurai tiko vakavuniwai a tauvi koya tale na mateniuto. E qai laurai ena so tale na vakadidike a caka vua ni tauvi koya tiko e dua na mate e sega ni veitauvi vakalevu ra qai vakavuna na manumanu somidi, e sa tete tiko ena nona yatevuso, ivi kei na uto. A qai mate o Nicolle ena loma ga ni 48 na aua, ni se qai yabaki tolu ga.

NA NONA takali e dua na wekada lomani e ka mosimosi duadua. Qori ena rairai dredre meda vosota ena so na gauna. E tukuna o Isabelle na tinai Nicole: “Au dau nanumi Nicolle sara ga, na nona dau mokoti au, na kena iboi, na nona dau moimalua. Au dau nanuma tale ga na nona dau solia vei au e dua na senikau e veisiga. Au sega ni guilecavi Nicolle rawa.”

E sa takali tale ga e dua na wekamu lomani​—na luvemu, na watimu, tacimu, dua vei rau na nomu itubutubu, se dua na nomu itokani voleka? Ke vaka kina, o na vosota vakacava na nomu lolosi?