Na Rai ni iVolatabu

Vuna Era Cati Kina na iMuri Dina i Jisu

“Era na vakacacani kemudou na tamata ra qai vakamatei kemudou, era na cati kemudou na veimatanitu ena vuku ni yacaqu.”​—MACIU 24:9.

QOI na ka e tukuna o Jisu ni vo e vica na siga me vakamatei vakaloloma. Ena bogi ni bera ni mate, e tukuna vei iratou na nona yapositolo yalodina: “Ke ra vakacacani au, era na vakacacani kemudou tale ga.” (Joni 15:​20, 21) Na cava era cati kina o ira na talairawarawa vei Jisu, nira via muri koya tale ga? E yalorawarawa mada ga o Jisu me soli koya ena vukudra eso tale, vakacegui ira na dravudravua kei ira na rarawa.

E vakamacalataka na iVolatabu na vuna era cati kina. Nida dikeva qo, eda na raica kina na vuna era cati kina na imuri i Karisito nikua, e tautauvata ga kei na kena e sotava o koya.

Era Lecaika na Dauveitusaqati

E tukuna o Jisu vei ratou na nona imuri: “Ena yaco na gauna era na nanuma na vakamatei kemudou nira qarava tiko na Kalou. Era na cakava qo nira sega ni kilai Tamaqu, era sega tale ga ni kilai au.” (Joni 16:​2, 3) E dina nira tukuna na dauveitusaqati nira qarava tiko na Kalou vata ga e qarava o Jisu, ia era vakacalai ena ivakavuvuli ni lotu lasu kei na kena ivakarau. Io era “yalogu dina ena nodra qarava na Kalou, ia e sega ni salavata kei na ivakavuvuli dina.” (Roma 10:2) E dua vei ira na dauveitusaqati qori o Saula mai Tarisu, qai mai kilai e muri me o Paula na yapositolo lotu vaKarisito.

O Saula a lewe ni dua na ilawalawa era vakatokai mera Farisi, qo e dua na isoqosoqo vakapolitiki kaukaua era Jiu, era dau tusaqati ira na lotu vaKarisito. E tukuna e muri o Saula: “Niu dau vosabeca na Kalou, au dau veivakacacani, au qai dau veibeci.” E tomana: “Niu a lecaika, au vakayacora na ka kece qori niu a se sega ni vakabauta.” (1 Timoci 1:​12, 13) Ia na gauna e kila kina na ka dina me baleta na Kalou kei na Luvena, e veisautaka sara ga na nona ivalavala.

E va tale ga qori e levu na dauveitusaqati nikua. Me vakataki Saula ga, eso vei ira qori era vakacacani tale ga. Ia era sega ni sauma na ca, era muria ga na ivakasala i Jisu: “Lomani ira tiko ga na kemuni meca, masulaki ira tale ga era vakacacani kemuni.” (Maciu 5:​44) Era saga tale ga na iVakadinadina i Jiova mera muria na ivakasala qori, era nuitaka nira na veisau na dauveitusaqati me vakataki Saula ga.

Era Vuvu na Dauveitusaqati

Era tusaqati Jisu e levu nira vuvutaki koya. Na kovana ni Roma o Ponitio Pailato “e kila . . . nira soli Jisu yani na iliuliu ni bete ena levu ni nodra vuvu” me lauvako. (Marika 15:​9, 10) Na cava era vuvutaki Karisito kina na iliuliu ni lotu Jiu? Dua oya nira taleitaki koya e levu na tauvanua, o ira qo era beci vei ira na iliuliu ni lotu. Era vosavosa na Farisi: “Era sa muri koya na kai vuravura kece.” (Joni 12:19) Nira rogoca e levu na ka era vunautaka na imuri i Karisito, “dua na ka na nodra vuvu” na matalotu dauveitusaqati ra qai vosa vakacacataki ira na lotu vaKarisito era dau kacivaka na itukutuku vinaka.​—Cakacaka 13:​45, 50.

Eso tale na meca era cudruvaka na nodra itovo vinaka na dauveiqaravi ni Kalou. A tukuna na yapositolo o Pita vei ira na tacina lotu vaKarisito: “Era kurabui ra qai vosavakacacataki kemuni ni oni sa sega tale ni tomani ira [na tamata ivalavala ca] ena sala qo, e tini ina vanua lolovira ni bula torosobu.” (1 Pita 4:4) E laurai tale ga qori nikua. E sega ni kena ibalebale ni nodra sega ni muria na sala ca na lotu vaKarisito era sa yalododonu tiko kina vakasivia. Qori e sega ni vaKarisito, baleta nida ivalavala ca na kawatamata da qai gadreva na nona veivosoti na Kalou.​—Roma 3:​23.

Cati Nira “Sega ni Vakavuravura”

E tukuna na iVolatabu: “Ni kua ni lomani vuravura se na ka e tu e vuravura.” (1 Joni 2:​15) Na vuravura cava e tukuna qo o Joni? Na vuravura e yawaka na Kalou qai vakamalumalumu vei Setani, “na kalou ni vuravura qo.”​—2 Korinica 4:​4, The New Testament in Modern English; 1 Joni 5:​19.

E kani rarawa ni o ira na lomana na vuravura kei na kena itovo, era saga mera tusaqati ira na via bulataka na ivakavuvuli vakaivolatabu. Ia e tukuna o Jisu vei ratou na nona yapositolo: “Ke dou a vakavuravura, ena lomani kemudou o vuravura me vaka ni dau lomana na ka e nona. Ia ni dou sega ni vakavuravura, au digitaki kemudou tale ga mai vuravura, ena cati kemudou kina o vuravura.”​—Joni 15:19.

E rarawataki dina ni levu era cati ira na dauveiqaravi ni Kalou, nira sega ni lomana na vuravura e lewa tu o Setani e levu kina na cakacaka lawaki, ka tawadodonu kei na itovo voravora! E levu na tamata vinaka era vinakata me vinaka na vuravura, ia era sega ni rawa mera vakarusai koya na kena iliuliu o Setani. O Jiova duadua ga e rawa ni cakava qori​—ena cakava qori me vaka sara ga e vakamai Setani ena bukawaqa!​—Vakatakila 20:​10, 14.

Na inuinui totoka oya e usutu sara ga ni “itukutuku vinaka ni matanitu ni Kalou” era dau vunautaka e vuravura raraba na iVakadinadina i Jiova. (Maciu 24:14) Io, era vakabauta dei na iVakadinadina ni Matanitu ga ni Kalou, e liutaka o Karisito ena kauta mai na sautu kei na marau e vuravura. (Maciu 6:​9, 10) O koya gona, era na vunautaka tiko ga na Matanitu ni Kalou, nira raica na nona veivakadonui na Kalou e bibi duadua, sega ni tamata.

O BAU VAKASAMATAKA?

● Na cava e tusaqati ira kina na imuri i Karisito o Saula na kai Tarisu?​—1 Timoci 1:​12, 13.

● Na itovo cava era vakamuai kina na meca i Jisu?​—Marika 15:​9, 10.

● Era raica vakacava na lotu vaKarisito dina na vuravura?​—1 Joni 2:​15.

[Yaloyalo ena tabana e 27]

Ena 1945, o ira na ilala dauvakacaca era vakacacani ira na iVakadinadina i Jiova e Quebec, Canada, nira vunautaka tiko na itukutuku vinaka ni Matanitu ni Kalou

[Credit Line]

Courtesy Canada Wide