Ra Taroga na iTabagone

Au na Sega Tu ga ni Rawata e Dua na Ka?

“Niu vakatauvatani au kei na dua na noqu itokani au dau beci au sara ga. Na ka kece e cakava e dau rawarawa ​—sega ni gadrevi me cakacaka vakaukaua! Au nanuma kina niu sa guce, au sega tale ga ni kila na vuna au va qo kina. De va qo beka ga na noqu rai, qai vakavuna meu beci au tiko ga.”​—Dona.a

VAKACAVA, e dau vakadredretaka mo tovolea eso na ka vovou ni o nanuma ni o na sega tu ga ni rawata? Vakacava, o dau yalolailai ena so na gauna ni tukuni eso na ka vinaka me baleti ira o dau doka? Vakacava na cala o cakava tu e liu, e dau vakayalolailaitaki iko mo kua ni sasaga tale? Ke o sotava tiko qo, o na rawa ni ciqoma vakacava na ka o cakava o qai sasaga tiko ga?

Ena yaga vakalevu na nomu kila na isaunitaro qori nida dau guce kece ena so na gauna. (Roma 3:​23) Ia o ira na sega ni yalolailai nira sega ni rawata eso na ka era na dei. Kena ibalebale e tu vei ira na rai dodonu me baleta na cala era cakava ra qai sasaga tiko ga. Ni toso na gauna era na rawata! Meda raica mada qo na sala eda rawa ni vosota kina e tolu na ituvaki​—oya na noda kila ni na yaco na leqa, na ka eda nanuma, kei na ka sara ga eda guce kina.

KILA NI NA YACO NA LEQA → NA KA E RAWA NI YACO O kila ni na yaco kina na leqa, o sega ni sasaga ni o nanuma ni sa sega tu ga ni o rawata.

Kila na leqa. Biuta e dua na ✔ ena vanua o nanuma o na via saga mo rawata​—ia o nanuma tale ga ni o guce kina ke o tovolea.

◯ Tutaka na nomu vakabauta vei ira na lewe ni nomu kalasi

◯ Vaqara cakacaka

◯ Vosa e matadra na lewevuqa

◯ Vakaitavi ena qito

◯ Lagasere se qirita e dua na iyaya ni vakatagi

◯ Eso tale ․․․․․

Vakasamataka vinaka. Vakasamataka vinaka na ka o toqa mai cake, vakasamataka vinaka tale ga na ka e rawa ni yaco ni o sauma na taro qo:

‘Na cava au na vinakata meu rawata?’

․․․․․

‘Na cava au leqataka ni na yaco?’

․․․․․

Mo vola sara e dua na vuna e dodonu mo tovolea kina na ka o via saga tiko, dina ni o kila ni o na sega ni rawata.

․․․․․

iVakaraitaki vakaivolatabu. Ena gauna a vakaroti Mosese kina o Jiova me liutaka na matanitu o Isireli, na imatai ga ni ka a vakasamataka o Mosese na leqa a rawa ni yaco. E taroga o Mosese vua na Kalou: “Vakacava ke ra sega ni rogoca na Isireli na ka au tukuna?” A tekivu me vakasamataka o Mosese na nona malumalumu. E tukuna: “Au sega ni gusumacala. Au sega ni kila na ka meu tukuna.” A yalataka mada ga o Jiova ni na vukei koya, ia e se kerea ga o Mosese: “Kerekere mo tala tale e dua me cakava qori.” (Lako Yani 4:​1, 10, 13, Contemporary English Version) A ciqoma o Mosese na nona ilesilesi da qai kila ni a qarava vinaka. Ena veidusimaki ni Kalou, a liutaki ira kina na Isireli o Mosese me 40 na yabaki.

Ka o rawa ni cakava. A vola o Tui Solomoni: “A ka kecega sa vakaitavi kina na ligamu, mo kitaka ga e nomui gu.” (Dauvunau 9:​10) Me kua ni tarovi iko na nomu leqataka na ka e rawa ni yaco, mo cakava ga ena nomu vinaka kece. Vakacava mo vakasamataka e dua na ituvaki, o sega sara ga ni namaka mo cakava kina vakavinaka e dua na ka? Na cava o vulica ena ka o rawata qori? Ena vukei iko vakacava qori mo kua ni leqataka kina na ka e rawa ni yaco me vaka o vakila tiko ena gauna qo?

iDusidusi: Ke rawa, kere ivakasala vua e dua na itubutubu se dua na itokani matua e rawa ni vukei iko mo kua ni beci iko kina.b

KA EDA NANUMA → E SA RAWATA E DUA NA KA O NANUMA Ni dua e rawata vinaka na ka o saga tiko, o nanuma kina ni o sa guce.

Kila na leqa. O vakatauvatani iko tiko kei cei, na cava e cakava o nanuma kina ni o sa guce?

․․․․․

Vakasamataka vinaka. Na nona rawata vinaka qori, e kena ibalebale sara ga ni o sa guce? Vola e ra e dua na ituvaki e se qai yaco ga, me vaka na veitarogi e koronivuli. O rawata kina na nomu veitarogi, ia e dua tale e rawata vinaka sara.

․․․․․

Mo vola sara na vuna e yaga kina na nomu sasaga.

․․․․․

iVakaraitaki vakaivolatabu. A “cudru” o Keni ni taleitaki Epeli o Jiova. A vakasalataki Keni o Jiova me baleta na nona vuvu, e vakadeitaka ni rawa ni vakadonui ke sasaga tiko ga. A tukuna vua o Jiova: “Kevaka ko sa caka vinaka, ko na sega li ni vinakati?”c​—Vakatekivu 4:​6, 7.

Ka o rawa ni cakava. Kua ni “veiqati”​—ke o vakasamataka mada ga qori​—mo vakavinavinakataka ga na ka era sa rawata eso tale. (Kalatia 5:​26; Roma 12:15) Ena gauna vata qori, mo kila ni o rawa ni cakava eso tale na ka, ia kua ni dokadokai iko kina. E tukuna na iVolatabu: “Me dikeva na tamata yadua na nona cakacaka, ena qai sakitaki koya kina, ena sega ga ni vakatauvatani koya kei na dua tale.”​—Kalatia 6:4.

NA KA O SEGA NI RAWATA → NA KA A YACO O vakasamataka na sasaga o guce kina e liu, o nanuma ni sega ni yaga na nomu sasaga.

Kila na leqa. Na sasaga cava o sega ni rawata o vakila ni vakayalolailaitaki iko sara ga?

․․․․․

Vakasamataka vinaka. Ena ka o vola mai cake, e vakaraitaka qori ni o sa guce? Kena ivakaraitaki, ke o sa vakamalumalumu ena so na ituvaki o guce kina, e vakaraitaka ni o sa sega ni rawata na ka o saga tiko? Se vakaraitaka qori ni o vinakata na veivuke? Ke o lutu ni o qito tiko, o na ciqoma ga na veivuke mo rawa ni tomana na qito. Vakacava me va qori tale ga na nomu rai ena gauna o guce kina? Vola e ra o cei o rawa ni tukuna vua na nomu leqa.d

․․․․․

iVakaraitaki vakaivolatabu. Eso na gauna e vakayalolailaitaki koya na yapositolo o Paula na nona malumalumu. E vola kina: “Au sa vakaloloma dina!” (Roma 7:​24) E qai kila e muri o Paula ni nona malumalumu ena sega ni tukuni koya dina. E vola: “Au sa vala oti ena ivalu vinaka, au sa vakacavara vinaka na veitaucici, au sa muria vinaka sara na vakabauta vaKarisito.”​—2 Timoci 4:7.

Ka o rawa ni cakava. Kua ni raica tiko ga na nomu malumalumu, raica tale ga na ka o vinaka kina. Qori na ka e dau cakava o Jiova. E tukuna na iVolatabu: “Ni sega ni tawayalododonu na Kalou me guilecava na nomuni cakacaka kei na nomuni kauaitaka dina na yacana.”​—Iperiu 6:​10; Same 110:3.

Nanuma tiko: E sega ni dua e uasivi. Eda dau guce kece ena so na gauna. Ke o vulica mo veisau totolo, ena yaga vakalevu ena gauna o sa qase kina. E tukuna na Vosa Vakaibalebale 24:16: “Ni sa bale vakavitu na tamata yalododonu, ia sa na tu cake tale.” O rawa sara ga ni va oya!

Me baleta eso tale na ulutaga mai na ivola “Young People Ask,” raica na Web site www.watchtower.org/ype

[Vakamacala e ra]

[Kato/​iYaloyalo ena tabana e 19]

NA KA ERA TUKUNA NA NOMU ICABA

“Ke o cakava ga na ka o kenadau kina​—o qai sega ni via tovolea eso na ka vou ni o leqataka de o na sega ni rawata​—o na sega ga ni marautaka vakavinaka na nomu bula.”

“O rawa ni vuli mai na ka o guce kina qai saga mo vakavinakataka, se raica na vanua o guce kina qai cakava na ka o kila ni o na cakava vinaka. Ena vakatau qori ena ka o via cakava.”

“Keu kila niu na rairai sega ni rawata e dua na ka, au na saga meu marau tu ga. E vinaka na dredre mai na mataruburubu. Ke o namaka me vinaka tu ga na ka mo cakava, o na sega ni marau.”

iYaloyalo]

Andrea

Trenton

Naomi

[Kato ena tabana e 20]

TAROGI RAU NA NOMU ITUBUTUBU

Na gauna o se gone kina, na cava eso na ka o dau rarawataka? O vosota vakacava? Vakacava, o dau sotava qori ena levu na gauna?

․․․․․

[iyaloyalo ena tabana e 20]

Mo tucake totolo ni o bale​—ke vinakati mo vukei