Na Rai ni iVolatabu

Vuna e Bibi Kina na Ka Eda Tukuna

Ni oti na nodrau veitalanoa vinaka na paraiminisita kei na dua na marama yabaki 66, a nanuma na paraiminisita ni sa boko na gusunivosa a vosa tiko kina, a mani tukuna ni marama oya e dau vakaduduile, e vosataka tale ga e dua na nona tamata cakacaka ni a vakalaivi koya me rau ­veivosaki. Era kurabui na lewenivanua nira rogoca na vosa veibeci a cavuta na paraiminisita. E vakarogorogocataki kina na yacana, mani druka kina ena veidigidigi me paraiminisita tale ni oti ga e walu na siga.

E SEGA ni dua e lewa vinaka na yamena. (Jemesa 3:2) Eda raica mai na ivakaraitaki e cake ni bibi na ka eda tukuna. Na keda irogorogo, cakacaka, kei na noda veimaliwai vinaka se veimaliwai ca kei ira na so tale e vakatau vakalevu ena ka eda tukuna.

O kila tiko ni ka o tukuna e rawa ni vakaraitaka e levu tale na ka? Na iVolatabu e vakamacalataka ni ka o tukuna ena vakaraitaka na ka e tu e lomamu, ena kilai kina se o tamata vakacava. E tukuna o Jisu: “Ni na cavuta ga na gusumudou na ka e sinai tu e lomamudou.” (Maciu 12:34) Na ka eda tukuna e vakaraitaka se da tamata vakacava, wili kina na ka e tu e lomada kei na ka eda nanuma, e bibi gona meda vakasamataka vinaka na ka eda tukuna. Vakacava, e rawa ni vukei keda na iVolatabu? Vakasamataka mada qo.

Sala me Vinaka Kina na iVakarau ni Noda Vosa

Na ka eda tukuna e tekivu mai ena ka eda vakasamataka. Me vinaka na ka eda tukuna, e bibi meda vakavinakataka na ivakarau ni noda rai. Raica mada na sala e rawa ni lewa kina na noda vakasama na Vosa ni Kalou ke da muria, ena rawa ni veisautaka na ivakarau ni ka eda tukuna.

Vakananuma na veika vinaka. Me baleta na veika vinaka qori, e vakamacalataka kina na iVolatabu: “Ni dau vakananuma na ka kece ga e dina, na ka kece ga e bibi, na ka kece ga e dodonu, na ka kece ga e savasava, na ka kece ga e uqeta na veilomani, na ka kece ga e rogo vinaka, na ka kece ga e kilikili, kei na ka kece ga e ganita me vakacaucautaki.”​—Filipai 4:8.

Nida muria na ivakasala vinaka oya ena vukei keda meda kua ni vakasamataka na ka ca. Nanuma tiko ni ka eda raica kei na ka eda wilika, ena vakamua vakalevu na noda vakasama. Meda qarauna gona na ka eda raica kei na ka eda wilika me kua kina ni cala na noda rai se da vakasamataka na ka ca. Kena ibalebale eda na yawaka na ka ni veivakamarautaki e laurai kina na itovo voravora kei na ivalavala vakasisila. (Same 11:5; Efeso 5:​3, 4) Meda vakasamataka ga na ka e savasava kei na ka e vinaka. E rawa ni vukei keda na iVolatabu meda cakava qori. Kena ivakaraitaki, wilika na Vosa Vakaibalebale 4:​20-​27; Efeso 4:​20-​32; kei na Jemesa 3:​2-​12. Raica mada se na vukea vakacava na ivakarau ni noda vosa ke da muria na ivakavuvuli e tukuni ena tikinivolatabu qori.a

Vakasama rawa qai vosa. E tukuna na Vosa Vakaibalebale 12:18: “Sa dua sa vosa me vaka sa suaka e nai seleiwau: Ia na yamedra na vuku sa ia na veivakabulai.” Ke da dau “suaka” se vakararawataka na lomadra eso tale, ena vinaka meda vakasama rawa ni bera nida vosa. Muria na ivakasala vinaka ena Vosa Vakaibalebale 15:28: “A lomana na yalododonu sa daunanuma na ka me kaya: Ia mai na gusudra na tamata ca sa tovure tu na ka ca.”

Tovolea me nomu isausau qo. Saga ena vula tarava mo kua ni cavuta na ka ga e lako mai na nomu vakasama, vakabibi ni o cudru. Mo vakasamataka ga na tikinivolatabu era sega ni lavetaki ena ulutaga qo, qai saga mo vukutaka na ka o tukuna, me tau ena yalololoma, me malumu tale ga. (Vosa Vakaibalebale 15:​1-4, 23) Ia e sega ni yala ga e kea.

Masuta na veivuke ni Kalou. A masuta e dua na dauvola iVolatabu: “Me vinaka vei kemuni na vosa ni gusuqu, kei na vakanananu ni yaloqu, i Jiova.” (Same 19:14) Me kila na Kalou o Jiova ni o via vakayagataka na ka o tukuna mo vakamarautaki koya kina, me vinaka tale ga na nomu veimaliwai kei ira eso tale. E tukuna na Vosa Vakaibalebale 18:​20, 21: “O na marautaka ni vinaka na nomu vosa. Na vosa e rawa ni veivakamatei se veivakabulai!”​—Contemporary English Version.

iLovi iko ena Vosa ni Kalou. Na iVolatabu e vaka na iloilo o rawa ni ilovi iko kina. (Jemesa 1:23-​25) Kena ivakaraitaki, ni o vakasamataka tiko e tolu na ivakavuvuli vakaivolatabu qo, e vinaka mo taroga: ‘E vakacava tu mada na noqu ivosavosa kei na kequ irogorogo?’

“A vosa vakayalovinaka sai vakamalumu ni cudru: Ia na vosa vakararawa sa vakatubura na cudru.” (Vosa Vakaibalebale 15:1) E dau malumu qai tau ena yalovinaka na nomu vosa?

“Me kua ni lako mai gusumuni e dua na vosa vakasisila, na vosa ga e vinaka qai veivakayaloqaqataki ena kena gauna, me vinaka vei ira na rogoca.” (Efeso 4:​29) Vakacava, e dau veiuqeti na nomu vosa vei ira eso tale?

“Moni vosa ena yalovinaka ena gauna kece, me vakamasima, moni kila kina na ka moni tukuna vua na tamata yadua.” (Kolosa 4:6) Ni vakilai eso na ituvaki dredre, o dau saga mo vosa vakayalovinaka vei ira so tale, mera taleitaka tale ga na rogoca?

Ni o vakavinakataka na kemu irairai ni o ilovi iko vinaka ena iloilo, era na taleitaki iko eso tale, o na marau tale ga. E tautauvata tale ga qori ke o vakavinakataka na nomu vosa ni o ilovi iko ena Vosa ni Kalou.

[Vakamacala e ra]

O BAU VAKASAMATAKA?

● Na cava e vakavotuya na nomu vosa?​—Luke 6:​45.

● Me vakacava na nomu vosa vei ira eso tale?​—Efeso 4:29; Kolosa 4:6.

● Na cava eso na ka yaga o rawa ni cakava mo vakavinakataka kina na nomu vosa?​—Same 19:14; Filipai 4:8.

[iYaloyalo ena tabana e 23]

Ena kilai e dua mai na ka e tukuna, ena tara tale ga na nona veimaliwai