Na Rai ni iVolatabu

E Dodonu me Vakatatabutaki e Dua na Siga e Veimacawa me Caka Kina na Sokalou?

E VICA vata na milioni na Musolomani mai na veiyasai vuravura, Jiu kei ira na tukuna nira lotu vaKarisito era vakatabuya e dua na siga ena dua na macawa mera sokalou kina. Na vuna? “Meu volekata kina na Kalou, me vakacegu tale ga na noqu vakasama.” Qori na ka e tukuna o Ibrahim, e dua na lotu Muso­lomani gugumatua e dau gole ena mosque ena siga Vakaraubuka kece me lai masu, me rogo ivunau tale ga.

Vakacava e tukuna na iVolatabu ni loma ni Kalou meda vakatabuya e dua na siga e veimacawa meda sokalou kina? Eda na veiwekani vinaka kei na Kalou ke da sokalou ena dua wale ga na siga qori?

iTuvatuva ena Sega ni Dei

Sivia na 3,500 na yabaki sa oti, a vakayagataki Mosese o Jiova me vakarautaka eso na lawa. E wili ena lawa qori na ituvatuva me baleta na siga ni cegu se Vakacecegu, me vakayagataki ga na gauna qori ena sokalou. Ia e dua vei ira na siga ni cegu e dau muri vakalevu na siga ni Vakacecegu e veimacawa. A caka qo ni tekivu dromu na siga ena Vakaraubuka me yacova ni dromu na siga ena Vakarauwai.​—Lako Yani 20:​8-​10.

Vakacava, a vinakati vei ira kece na veimatanitu mera vakatabuya tale ga e dua na siga e veimacawa? Sega. Na lawa a soli vei Mosese e baleti ira ga na Isireli kei ira na tavuki mai. A tukuna na Kalou vei Mosese: “Mera vakabauta na siga ni vakacecegu na Isireli . . . Oqori nai vakatakilakila vei au kei ira na Isireli me tawamudu.”a​—Lako Yani 31:​16, 17.

E tukuna na iVolatabu ni Lawa a soli vei Mosese e “iyaloyalo ga ni ka me na yaco mai.” (Kolosa 2:​17) Koya gona, na siga ni Vakacecegu e ituvatuva ni sokalou ena sega ni muri me tawamudu, e vakatakarakarataka ga na ituvatuva uasivi me na muri mai. (Iperiu 10:1) E tukuna na iVolatabu ni raica o Jiova me mai cava na vakatatabutaki ni siga ni Vakacecegu ena gauna e mate kina o Jisu. (Roma 10:4) Na cava sa sosomitaka?

Dua Tale na Sala ni Sokalou

Ni sa vakayacora na Lawa a soli vei Mosese na inaki taumada a tauyavutaki kina, e qai vakamatatataka na iVolatabu e dua tale na ivakarau ni sokalou e vakadonuya na Kalou. E wili tale ga e keri na vakatatabutaki ni dua na siga e veimacawa?

E macala mai na so na tikinivolatabu ni so na ivakaro e tau vei ira na Isireli e vakaibalebaletaki tale ga ena ivavakoso vaKarisito. Kena ivakaraitaki na ivakaro mera vakatabui ira mai na qaravi matakau, veidauci, kei na gunuvi se laukana ni dra. (Cakacaka 15:​28, 29) Ia na ivakaro me dua na Siga ni Vakacecegu e veimacawa, e sega ni okati kina na lotu vaKarisito, ni sega ni gadrevi mera muria.​—Roma 14:5.

Na cava tale e tukuna na iVolatabu me baleta na nodra sokalou na lotu vaKarisito ena imatai ni senitiuri? Era dau soqoni vata mera masu, wili iVolatabu, rogo ivunau, ra qai vakacaucautaka na Kalou ena sere. (Cakacaka 12:12; Kolosa 3:​16) Qo na vanua era vakasalataki kina na lotu vaKarisito, e vakaukauataki na nodra vakabauta, ra qai veivakayaloqaqataki.​—Iperiu 10:​24, 25.

Na iVolatabu e sega vakadua ni tukuna ni dodonu mera soqoni na lotu vaKarisito ena Sigatabu se dua tale na siga lavotaki ena dua na macawa. Koya gona, na cava era dau vakatatabutaka kina e levu nikua na Sigatabu me siga bibi ni nodra sokalou? A tekivu vakatatabutaki na Sigatabu ni sa volai oti na iVolatabu, sa basika tale ga e levu na itovo kei na ivakarau vakavanua.

Vakacava, a tuvanaka tale na Kalou me dua na siga me caka kina na sokalou? Sega. E vakamacalataki vakamatailalai ena iVolatabu na ituvatuva ni sokalou dina. E sega tale ni dua na ivola me vakuri kina na ka sa tukuni tu ena iVolatabu. E uqeti o Paula me vola: “Ke dua mada ga vei keimami se dua na agilosi mai lomalagi e tukuna vei kemuni e dua na itukutuku e duidui mai na itukutuku vinaka keimami a tukuna vei kemuni, me lewai o koya.”​—Kalatia 1:​8.

Na Sokalou e Marautaka o Jiova

Era dau muria vakamatailalai na iliuliu ni lotu ena gauna i Jisu na vakatatabutaki ni Siga ni Vakacecegu e veimacawa, ia me vaka ni veivakaisini tu na lomadra, e sega kina ni vakadonuya o Jiova na nodra sokalou. Era lomana na ilavo ra qai beci ira na tauvanua se o ira na yalomalumalumu. Era guta na rogo, era dau veidabui, ra qai vakaitavi ena tiko yavavala vakapolitiki ena nodra gauna. (Maciu 23:​6, 7, 29-​33; Luke 16:14; Joni 11:​46-​48) Era kaya nira matataka na Kalou. Na inaki ni Siga ni Vakacecegu me veivakabulabulataki, ia era vukica qori mera tauca kina na nodra lawa kaukaua vakatamata.​—Maciu 12:​9-​14.

Macala gona, ni sega ni marautaka o Jiova ke da vakatabuya e dua na siga e veimacawa meda sokalou kina vua. Na cava meda cakava? E cavuta o Jisu e dua na veisureti vakasakiti: “Ni lako mai vei au o kemuni oni oca, oni bikai voli ena icolacola bibi, au na vakacegui kemuni.” (Maciu 11:28) E veivakacegui na sokalou e yavutaki ena ivakavuvuli i Jisu. Na nona ivakavuvuli e sega ni veivakaisini, sega tale ga ni vakaicolacola.

O ira na iVakadinadina i Jiova e veiyasai vuravura nikua era muria tiko na ivakarau ni sokalou era vakayacora na imuri taumada i Jisu. Era marautaka tale ga e veimacawa na porokaramu ni veivakavulici mai na iVolatabu. Na siga era soqoni kina e vakatau vakalevu ena ituvaki ni vanua era tu kina, sega ni vakatau ena ivakavuvuli e sega ni vakaivolatabu. Vakacava moni tiko mada ena nodra soqoni ena itikotiko e voleka vei kemuni, moni vakadinadinataka kina na nodra sokalou e dau veivakabulabulataki.

[iVakamacala e ra]

O BAU VAKASAMATAKA?

● E dodonu mo qarava na Kalou ena dua ga na siga e veimacawa?​—Roma 10:4; 14:5.

● Na cava e bibi kina meda soqoni ena gauna ni sokalou?​—Iperiu 10:​24, 25.

● Me rawa ni bulabula na sokalou, na cava ena vinakati?​—Maciu 11:28.

[Chart/iYaloyalo ena tabana e 19]

(Raica tale na ivola)

TUSITI

VUKELULU

1 LOTULEVU

2 VAKARAUBUKA

3 VAKARAUWAI

4 SIGATABU