Ra Taroga na iTabagone
Na Cava au Tukuna Kina Ya?
Na ulutaga qo ena vukei iko mo kila
NA VUNA e mosimosi kina na ka o dau cavuta
NA CAVA me caka ni o cavuta na vosa mosimosi
NA SALA mo lewa rawa kina na yamemu
“Au dau lewa vinaka na yamequ, ia ena so na gauna e sega. Ni yaco qori au dau vinakata sara ga meu yali vakasauri!”—Chase
“So na gauna au dau tukuna na ka era rairai vakasamataka tale tiko ga na so, ia e sega ni dodonu me tukuni.”—Allie
NA VUNA E YACO KINA
Tikinivolatabu me nanumi: “Ke dua e sega ni tarabe ena vosa, e uasivi o koya.” (Jemesa 3:2) Na cava e kena ibalebale qori? E sega ni dua e lewa rawa na yamena. E levu era na duavata kei Annette,a ena nona kaya ni so na gauna e kila ni dodonu me kua ni dau cavuta e dua na ka, ia e qai kidacala ga ni levu tale na ka sa cavuta.
iTalanoa dina: “Au nanuma tiko meu biuta laivi eso na noqu isulu, ia dua na noqu itokani e taleitaka eso vei ira na isulu qori. Au sega ni vakasamataka vinaka na ka au tukuna, e totolo ga na noqu cavuta, ‘Era na sega ni rauti iko.’ E sauma noqu itokani, ‘O tukuna tiko niu levulevu?’”—Corrine.
Mo rawa ni kila na vuna o dau sega ni lewa vinaka kina na ka o tukuna, e vinaka mo tovolea mada eso na vakatutu qo.
● Na cava na noqu malumalumu?
․․․․․ Au dau cudrucudru
․․․․․ Au sega ni dau vakasama ni bera niu vosa
․․․․․ Au na vosa tu ga, sega ni vakarorogo
․․․․․ Eso tale ․․․․․
Kena iVakaraitaki: “Sa rui levu na noqu dau veiwali, so na gauna e levu era dau taura cala na ka au tukuna.”—Alexis.
● O cei vei ratou qo o dau vosa vei ira o qai sega ni vakasamataka na ka o tukuna?
․․․․․ iTubutubu
․․․․․ Tacimu
․․․․․ iTokani
․․․․․ Eso tale ․․․․․
Kena iVakaraitaki: “E rarawataki dina ni o ira sara ga au lomana e rawarawa meu vakacudrui ira,” e tukuna o Christine, e yabaki 20. “De dua niu veikilai vinaka kei ira, au sega kina ni dau qaqarauni.”
NA CAVA MO CAKAVA
Tikinivolatabu me nanumi: “Meda guta mada ga na bula veiyaloni kei na ka ena vakauqeti keda yadua.” (Roma 14:19) E vinaka meda kere veivosoti ke da via muria na ivakasala qori.
iTalanoa dina: “A takali o Na niu se qai vula tini, a sega tale ga ni susugi au o Ta. Erau susugi au o Na levu kei Ta levu. Ena gauna au se yabaki 10 se 11 kina, au galili sara ga qai rarawataka vakalevu ni sa takali o Na, au via beitaki ira eso tale ena nona mate. Gauna e kerei au kina o Na levu meu vukei koya ena dua na ka, au vosavosa sara ga; au qai tukuna vua ‘Au sega ni taleitaki iko,’ ‘O iko sega ni noqu Na.’ E kidacala sara ga o Na levu. E gole ina nona rumu, sogota na katuba, au rogoca sara na nona tagi. Au madua sara ga. A susugi au o koya, cakava na ka kece vei au, ia au qai beci koya. A vosa vei au o Ta levu qai vakamacalataka na tikinivolatabu e vauca na kena lewai vinaka na yame. Au kere veivosoti sara vei Na levu, au qai kila ni cala na ka au cakava.”—Karen.
Vola e ra e dua na vuna o nanuma kina ni na rairai dredre mo kere veivosoti.
․․․․․
Ena yaga vakacava vei iko na nomu kere veivosoti?
․․․․․
iDusidusi: Raica na ivakavuvuli ena Vosa Vakaibalebale 11:2 kei na Maciu 5:23, 24.
E vinaka ga meda kua ni cakava eso na ka ena vakavuna meda lai kere veivosoti kina. Eda na cakava vakacava qori?
NA SALA MO LEWA KINA NA YAMEMU
Tikinivolatabu me nanumi: “Me totolo ni vakarorogo na tamata yadua, me berabera ni vosa, me berabera ni cudru.” (Jemesa 1:19) Qo eso na vakatutu e rawa ni vukei iko mo muria na ivakasala qori.
Wilika na tikinivolatabu, qai raica me lakolakovata kei na ivakamacala.
1 “Kua ni o dau taura vakabibi na ka; o na sega kina ni cudru totolo.”—Danette.
2 “Au na taubale. Qori e gauna vinaka meu tu taudua kina, me ruru tale ga kina na noqu cudru.”—Brielle.
3 “Niu se gone, au dau nanuma ni ka kece e caka e dodonu meu vakadodonutaka, sa qai vakarau tu ni noqu bula qori. Ia au sa qai vulica qo meu kua ni dau kauaitaka vakalevu na ka lalai e dau yaco.”—Celia.
4 “Ke dua e karaci iko o qai sega ni cakava kina e dua na ka, ena lai oca tale na karaci iko, ena lai tinia sara. Tauri iko ga vakamalua. Kua ni kuria tale na leqa ena nomu via sauma na ka e caka.”—Kerrin.
5 “So na gauna au na rarawataki ira sara ga eso. Au na vakasamataka na ka kece meu na lai tukuna vua. Ia niu lai vakasamataka vinaka ni oti e dua na gauna, au na liaca ni sega sara tu ga ni vakaibalebale na ka au na lai tukuna. Qo na ka au sa vulica, meu kua ni dau sauma vakatotolo.”—Charles.
O rawa ni raica e levu tale na ulutaga mai na “Young People Ask” ena Web site www.watchtower.org/ype
[iVakamacala e ra]
a Eso na yaca ena ulutaga qo sa veisau.
[Kato/iYaloyalo ena tabana e 20]
Allie—Ni bera niu vosa, au na vaqaqa mada: ‘Keu cavuta qo, ena vinaka kina na veimaliwai? Ena tarai koya vakacava e rogoca?’ Ke o via lomalomarua, e vinaka ga mo kua ni cavuta.
Chase—Keu via tukuna e dua na ka, au na vakasamataka rawa se na tarai ira vakacava na vakarorogo. Ni toso tiko na yabaki ni noqu bula, au sa qai kila na ka meu cakava meu lewa kina na yamequ. Ni toso na yabaki o na qai vulica e levu na ka.
[Kato ena tabana e 22]
VAKACAVA MO TAROGI RAU NOMU ITUBUTUBU?
E sega ni dua e uasivi—me vaka ga e vola o Jemesa, “eda dau tarabe kece.” Koya gona, tarogi rau na nomu itubutubu ena so na ka e vakadredretaka na nodrau via lewa vinaka na ka erau tukuna.—Jemesa 3:2.
[iYaloyalo ena tabana e 21]
“Ni o boboka na wainimate ni bati, o na sega ni rawa ni tawana lesu tale. E tautauvata vinaka qori kei na ka eda tukuna. Eda na sega ni rawa ni vakalesuya na ka rarawataki eda tukuna vei ira eso.”—James.