Ra Taroga na iTabagone

Na Cava Meu Lako Kina ena Nodra Soqoni na Lotu vaKarisito?

O DAU MARAUTAKA NA SOQONI VAKARISITO?

↓ ↓

IO SEGA

↓ ↓

E VAKAROTA na iVolatabu mera dau sosoqoni vata na lotu vaKarisito mera sokalou. (Iperiu 10:25) Ia vakacava ke o sega ni marautaka na nomu tiko kina? Vakacava ke o dau tatadrataka tu ena gauna qori na ka o rawa ni cakava ke o tu ena dua tale na vanua? Saga mo veisautaka na nomu rai ni o muria eso na vakatutu era tiko ena vica na tabana e tarava.

1. KUA NI CALATA

Kena tikinivolatabu: “E nodra ivakarau eso mera kua ni lai soqoni mera sokalou, ia meda kua ni cakava qori.”—Iperiu 10:25, Contemporary English Version.

Na cava mo cakava wasoma kina na ka o rairai sega ni marautaka? Baleta qori na sala o na vulica kina mo marautaka! Vakasamataka mada va qo: Ena rawa vakacava mo kenadau qai marautaka e dua na qito ke o calata ena levu na gauna na tereni? E va tale ga qori na soqoni vaKarisito. Na levu ga ni nomu tiko kina, na levu tale ga ni nomu vakila ni o kaukaua vakayalo. Qori ena uqeti iko sara ga mo lako tiko ga ena soqoni!—Maciu 5:3.

Ka e rawa ni caka: Na gauna e dau oti kina na soqoni, tukuna vua e dua vei ira na vakaitavi na ka yaga o rogoca. Vola e dua na ka yaga o vulica ena nomu dau tiko ena soqoni. E levu tale ga na ivola e vakayagataki ena soqoni e baleta ga na nodra cakacaka vakavunau na lotu vaKarisito, me nomu isausau mada ga mo vakavinakataka na nomu dau wasea vei ira eso tale na nomu vakabauta. Ena yaga kina vakalevu vei iko na itukutuku e veivosakitaki ena soqoni.

“Niu se gone au a vakavulici ni bibi na tiko ena soqoni. Au sega mada ga ni bau vakasamataka ena gauna qori meu calata na soqoni. E se tu ga vei au na rai qori me yacova mai nikua.”—Kelsey.

Na ka e dau yaco dina: O ira na dau tiko wasoma ena soqoni era dau marautaka vakalevu—qai levu na ka yaga era vulica kina!

2. DAU VAKAROROGO

Kena tikinivolatabu: “Moni dau rogoca vinaka na ka.”—Luke 8:18.

Era tukuna na dauvakadidike ke vakarorogo tiko e dua ena bose ena rawa ni guilecava e rauta ni 60 na pasede na ka e rogoca ni cava e dua na siga. Ke totolo va qori na yali ni nomu ilavo, o na cakava e dua na ka me kua ni yali tale kina, se vakacava? E dodonu mo cakava tale ga qori mo nanuma kina na ka o dau rogoca.

Ka e rawa ni caka: Dabe sara i liu kei rau na nomu itubutubu mo kua ni vakawelei kina vakalevu. Vakavola eso na tikina yaga. E sega ni dau tautauvata na ivalavala ni noda vulica na ka, nida dau vakavola gona eso na ka eda na rawa ni vakarorogo vinaka kina vua e vunau tiko—ena yaga tale ga qori ena noda railesuva.

“E dau dredre meu vakarorogo vinaka ena gauna ni soqoni, ia qo e sa vinaka cake. Au dau saga meu nanuma tiko na vuna au tiko kina ena soqoni. Qo e sega ni dua ga na ivakarau, me vaka ga na lako i lotu. Au lako ena soqoni meu lai sokalou, meu vuli tale ga—oya meu vulica e dua na ka ena yaga ena noqu bula.”—Kathleen.

Na ka e dau yaco dina: Na noda lako ena soqoni da qai sega ni vakarorogo vinaka e vaka ga noda lako ena dua na soqo ni kana magiti, ia eda sega ni kana.

3. VAKAITAVI

Kena tikinivolatabu: “Na tamata ena vuli ga vua na tamata, me vaka ga na kena vagatara na kaukamea na kaukamea.”—Vosa Vakaibalebale 27:17, Good News Translation.

Ni o dua na itabagone, e tiko na kemu yaga ena soqoni vakaivavakoso. Kua vakadua ni beca na nomu dau tiko ena soqoni kei na nomu vakaitavi kina, se mani o vakamacala ni tarogi eso na taro se o veimaliwai kei ira oni vakabauta vata.

Ka e rawa ni caka: Me nomu isausau mada ga mo dau saumi taro ena gauna e tarogi kina eso na taro. Dau bole mo veivuke ena sasamaki se so tale na ka e gadrevi me caka ni bera na soqoni, gauna e vakacagau tiko kina se ni sa oti. Vakaliuliu mo vosa vua e dua drau sega ni dau veivosaki vakalevu.

“Ena gauna au se itabagone kina, au dau bole meu tauri gusunivosa kei na kena vakarautaki na buturara e caka kina na vunau. Niu cakava na ilesilesi va qori, au raica kina niu nuitaki, e uqeti au meu dau tiko ena soqoni, meu dau totolo tale ga. Qori e vukei au meu kauaitaka vakabibi na noqu veika vakayalo.”—Miles.

Na ka e dau yaco dina: Dau vakaitavi, kua ni dabe wale tu ga. E yaga cake na noda vakaitavi mai na noda sarasara tu ga.

O rawa ni raica e levu tale na ulutaga ni “Young People Ask” ena Web site www.watchtower.org/ype

[Kato/iYaloyalo ena tabana e 27]

O SURETI!

Vakacava o taleitaka mo

● Vulica na ka dina me baleta na Kalou?

● Dua na tamata vinaka?

● Kunea na itokani vinaka duadua?

Na nodra soqoni na iVakadinadina i Jiova ena rawa ni vukei iko mo cakava qori kei na so tale ka! E rua na siga ena dua na macawa, era dau soqoni kina na iVakadinadina i Jiova ena nodra Vale ni Soqoni. E sega ni lavaki kina na soli, ra qai sureti kece o ira na via gole yani.

Kua ni calata! Na nodra Vale ni Soqoni na iVakadinadina i Jiova e sega ni tautauvata kei na so tale na valenilotu o sa lakova. Ena nodra soqoni na iVakadinadina i Jiova, e dau vakabibitaki kina na vulici ni iVolatabu, o na vulica tale ga na sala e rawa ni vukei iko kina na Vosa ni Kalou mo rawata na bula vinaka duadua! —Vakarua 31:12; Aisea 48:17.

Sai—Ena imatai ni gauna au curuma kina na nodra Vale ni Soqoni na iVakadinadina i Jiova, au kidacala sara ga ni sega kina na matakau, e sega ni dua e vakaisulu me vaka na bete, e sega tale ga ni dua e kerei au meu soli ilavo. Era kidavaki au kece, au qai vakila na vakacegu. E rawarawa sara na ka e veivosakitaki kina, e vakaibalebale tale ga. Qo sara ga na ka dina au a vakasaqara tiko!

Deyanira—Na imatai ni gauna au lako kina ena nodra soqoni na iVakadinadina i Jiova niu se qai yabaki 14. Era kidavaki au kece ena gauna au yaco yani kina. E vaka mera taleitaka na noqu tiko ekea, ra qai kauaitaki au dina. Na nodra cakava qori, e uqeti au sara ga meu lesu tale!

[Kato/iYaloyalo ena tabana e 28]

Saga mo kila na ivola cava ena veivosakitaki ena soqoni tarava. Digia na iwasewase ni soqoni o taleitaka qai . . .

KOTIVA QAI KOPITAKA

Yaca ni ulutaga: Na ka au vulica

․․․․․

⇩ ⇩

․․․․․ ․․․․․