IVAKASALA INA VUVALE | VEISUSU
Lawa me Ganiti Luvemu iTabagone
ITUVAKI DREDRE
E tukuna o luvemu itabagone ni sa rui kaukaua na nomu lawa. Ia o vinakata mo taqomaki koya. O mani veinanuyaka, ‘Ke sega ni kaukaua na lawa au vakatura, ena rawa ni lai cakava e dua na ka ca!’
O rawa ni vakatura na lawa e ganiti luvemu itabagone. Ia mo kila rawa mada na vuna a sega ni taleitaka kina ena imatai ni gauna na lawa o vakatura.
VUNA E YACO KINA
Ka era tukuna e levu: O ira kece na itabagone era na beca ga na lawa; e dau yaco qori ena gauna vakaitabagone.
Kena dina: Ena rairai sega ni beca na lawa e dua na itabagone ke veiganiti na lawa erau vakatura na itubutubu, meratou veitalanoataka tale ga.
E levu na vuna e dau beci kina na lawa, ia era na rairai uqeta sara ga qori na itubutubu ke kaukaua tale na lawa se sega ni ganita na nodra yabaki ni bula na itabagone. Dikeva mada qo:
Kaukaua tale na lawa. Ke rau vakatura na lawa na itubutubu rau qai sega ni veivosakitaka kei luvedrau itabagone, ena nanuma o gone ni rau via lewai koya ga, rau sega ni via taqomaki koya. Qori ena vakavuna me cakava lo eso na ivalavala rau vakatabuya na nona itubutubu.
Sega ni ganita na yabaki ni bula. “Baleta ga niu tukuna,” na vosa qori ena rairai ganiti ira ga na gone lalai, ia o ira na itabagone ena gadrevi me vakamacalataki vei ira na vuna. Kuria qori, nira na biubiu e vale ena dua na gauna ra qai vakatulewa ga vakataki ira. Ena vinaka cake mo vukei koya qo me kila na ka me cakava qai vakatulewa vinaka, baleta ni o se lewai koya tiko.
Ia na cava o rawa ni cakava ke dau beca o luvemu itabagone na lawa o vakatura?
KA O RAWA NI CAKAVA
Nanuma tiko ni bibi me vakaraitaki vei ira na itabagone na vanua ena yalani kina na ka era rawa ni cakava. Qori na ka era vinakata tu me caka, ia era na rairai sega ga ni tukuna vei iko. Mo vakatura gona na lawa qai veitalanoataka kei luvemu me matata vua. E tukuna na ivola, Letting Go With Love and Confidence: “Ni vakamatatataki vei ira na itabagone ni yalani ga na ka era rawa ni cakava, ra qai kila ni so na gauna era na vakatulewa na itubutubu ena vukudra, era na rairai sega ni vakayacora eso na ivalavala e vakavu lomaleqa.” Ena yasana adua, o ira na itubutubu era solia vakalevu na galala, era vakaraitaka nira sega ni lomani luvedra. Qori sara ga na vuna era talaidredre kina na itabagone.—iVakavuvuli vakaivolatabu: Vosa Vakaibalebale 29:15.
O na vakaraitaka vakacava ni o veinanumi? Laiva me talaucaka na nona nanuma o luvemu itabagone me baleta na lawa ni vuvale. Kena ivakaraitaki, ke kerea me soli vakalailai vua na galala, vakarogoci koya mada. Ke raica o luvemu itabagone ni o vakarogoci koya vinaka ena rawa ni doka qai muria na nomu vakatulewa, ke sega mada ga ni duavata kina.—iVakavuvuli vakaivolatabu: Jemesa 1:19.
Ia ni bera ni o vakatulewa, nanuma tiko qo: Era dau kerea na itabagone me soli vakalevu vei ira na galala, ia era na nanuma na itubutubu me vakalailaitaki na galala e soli vei ira. Mo kauaitaka gona vakabibi nona kerekere o luvemu. E vakaraitaka beka o koya ni rawa ni nuitaki? Vakacava na ka e kerea, e veiganiti me soli vakalevu kina na galala? Mo yalorawarawa ni ciqoma nona kerekere ke o raica ni veiganiti.—iVakavuvuli vakaivolatabu: Vakatekivu 19:17-22.
Ni o sa rogoca na ka e vinakata o luvemu itabagone, mo vakaraitaka tale ga vua na ka o kauai kina. Ni o cakava qori o sa vakavulici luvemu tiko me dau kauaitaka na nodra nanuma eso tale.—iVakavuvuli vakaivolatabu: 1 Korinica 10:24.
Oti, mo vakatulewa qai vakamacalataka na vuna. Ke sega mada ga ni taleitaka nomu vakatulewa, ena marau ga o luvemu ni drau kauaitaka na itubutubu na nona nanuma. Na nomu vakavulici luvemu tale ga ni se itabagone ena yaga ni sa uabula. Ni veiganiti na lawa o vakatura, o qai veivosakitaka kei luvemu itabagone, o na vukei koya me yalomatua qai dua na uabula nuitaki mai muri.—iVakavuvuli vakaivolatabu: Vosa Vakaibalebale 22:6.