Ka mo Cakava ke Vakacudrucudru o Luvemu

VEIKA DREDRE

Ni cudru na luvemu yabaki rua, ena kaikaila, vakabutubutu, qai cici wavoki. De dua o na vaqaqa: ‘Cava mada e leqa tiko vua? A vakacudrucudru baleta ni cala na ka au cakava? E tiko na kena iwali?’

E rawa ni o veisautaka na itovo i luvemu. Ia mo kila mada e liu na vuna e dau vakacudrucudru kina.

VUNA E YACO KINA

O ira na gone lalai era se yalowai. Qori na vuna era dau vakacudrucudru kina ena so na gauna. Ia eso tale na ka e rawa ni vakavuna.

Vakasamataka mada na nona yabaki ni bula. Ni se qai sucu, rau na cakava na ka kece e vinakata na nona itubutubu. Kena ivakaraitaki, ke tagi o gone ena totolo ga nodrau kauaitaki koya. De dua e tauvimate, via kana, via keve se me veisau nona pikini. Ena yabaki ni bula qori era na saga na itubutubu mera vakacegui luvedra.

Ia nira sa yabaki rua, era na liaca nira sa sega ni kauaitaki vakalevu me vaka e liu. Sa sega ni yaco na lomadra, sa ra na vakarorogo ga vei nodra itubutubu. Ena sega gona ni taleitaka o gone na veisau qori, ena vakavuna me vakacudrucudru.

Toso na gauna, ena kila o gone ni nodrau itavi na itubutubu me rau vakavulici koya. Ena kila tale ga ni dodonu me ‘talairawarawa vei rau na nona itubutubu.’ (Kolosa 3:20) Ia ena gauna mada ga qo, ena vakacudrucudru me yaco kina na lomana.

KA O RAWA NI CAKAVA

Kila na kena ituvaki. E se yalowai o luvemu. Ena dredre me lewa vinaka na nona cudru ni sega ni kila na ka me cakava. E bibi mo kila na kena ituvaki.​—iVakavuvuli vakaivolatabu: 1 Korinica 13:11.

Kua ni yalototolo. Ke vakacudrucudru o luvemu, ena kuria ga na leqa ke o cudru. Tovolea mo tauri iko vakamalua. Ena veivuke vakalevu ke o vakasamataka na vuna e vakacudrucudru kina o luvemu.​—iVakavuvuli vakaivolatabu: Vosa Vakaibalebale 19:11.

Mo dei ena ka o tukuna. Ke yaco na lomai luvemu ena gauna e vakacudrucudru kina, ena cakava tiko ga qori ke vinakata e dua tale na ka. E vinaka mo vakaraitaka vakamalua vua ni o na dei ena ka o tukuna.​—iVakavuvuli vakaivolatabu: Maciu 5:37.

Yalovosovoso. Ke o dau vakademeni luvemu, kua ni nanuma ni na oti totolo nona dau vakacudrucudru. Ia ke o vakavulici koya vakavinaka qai dei kina, ni toso na gauna sa na sega ni vakacudrucudru. E tukuna na iVolatabu: “Na loloma e vosota vakadede.”​—1 Korinica 13:4.

Qo eso tale na ka o rawa ni cakava:

• Ke vakacudrucudru o luvemu, o rawa ni keveti koya me kua kina ni cici wavoki. Kua ni karaci koya. Waraka me ruru nona cudru. Ena qai kila o koya ni sega ni dua na vanua e tini kina nona vakacudrucudru.

• Sogoti koya ena dua na rumu ena gauna kece e vakacudrucudru kina. Tukuna vua ni na qai curu mai tuba ke sa malumu nona cudru.

• Kua ni vakavulici luvemu nira rai tu eso tale. Kua tale ga ni solia vua na ka ga e tagica. Ke sega ena nanuma ni na yaco na lomana ke dau vakacudrucudru.