Matanitu ni Kalou

E tiko e lomada na Matanitu ni Kalou?

“O sa volekata sara na matanitu ni Kalou.”​—Marika 12:34.

KA ERA TUKUNA ESO

Dua na iwase levu ni lotu vaKarisito era vakabauta ni Matanitu ni Kalou e kena ibalebale ni “tiko e lomada na Kalou qai liutaka na noda bula.”

KA E KAYA NA IVOLATABU

Na Matanitu ni Kalou e sega ni ka ga e tu e lomada, ia e dua dina na Matanitu ena liutaka na vuravura taucoko.​—Same 72:8; Taniela 7:14.

Na cava ga e vakaibalebaletaka tiko o Jisu ni tukuna ni “sa tu e na lomamudou na matanitu ni Kalou”? (Luke 17:21, Ai Vola Tabu) E sega ni rawa ni vakaibalebaletaka o Jisu ni Matanitu qori e tiko e lomadra na rogoci koya tiko. Baleta na cava? Ni a vosa tiko ena gauna qori vei ira na Farisi. A tukuna tiko o Jisu nira na sega ni lewe ni Matanitu ni Kalou baleta ni veivakaisini na ivakarau ni nodra sokalou qai sega ni vakadonuya na Kalou. (Maciu 23:13) E tu vei Jisu na dodonu me tukuna ni Matanitu ni Kalou e tiko “e na lomamudou” se vaka e tukuna na iVakadewa ni Vuravura Vou, ni “tiko maliwai kemudou.” Na cava na vuna? Ni maliwai ira sara tiko ga o Jisu na kena Tui.​—Luke 17:21.

Na cava na Matanitu ni Kalou?

“Me yaco mai na nomuni matanitu. Me caka na lomamuni e vuravura me vaka e caka tiko mai lomalagi.”​—Maciu 6:10.

KA E KAYA NA IVOLATABU

Na Matanitu qori e tauyavutaka na Kalou, e kena Tui o Jisu Karisito. (Maciu 28:18; 1 Timoci 6:14, 15) Ena vakayacora na inaki ni Kalou mai lomalagi kei vuravura. (Maciu 6:10) Ena vakayagataka na Matanitu qori na Kalou me walia na leqa ni kawatamata, qori na ka e sega ni vakayacora rawa na isoqosoqo vakatamata nikua.

Ni sa na veiliutaki na Matanitu ni Kalou, era na veiyaloni na kawatamata, tiko vinaka, ra qai bula sautu ena vuravura parataisi. (Same 46:9; Aisea 35:1; Maika 4:4) Ena oti vakadua na tauvimate kei na mate. (Aisea 33:24; Vakatakila 21:4) Ena sega ni dua e qase tale. E yalataka na iVolatabu: “Ena qai vinaka tale na lewena me vaka na lewe ni gone: Ena vuki me cauravou tale.”​—Jope 33:25.

KA O RAWA NI CAKAVA

Se mani vanua cava o cavutu mai kina, o rawa ni lewe ni Matanitu ni Kalou ke o cakava na loma ni Kalou. E kaya na iVolatabu: “[E] sega ni dau veivakaduiduitaki na Kalou, ia e vakadonui ira era dokai koya ra qai cakava na ka e vinakata mai na veivanua kece.”​—Cakacaka 10:34, 35.

Ena tauyavutaka na tamata na Matanitu ni Kalou?

“Ena qai vakatura na Kalou ni lomalagi e dua na matanitu, ena sega sara ni vakarusai rawa.”​—Taniela 2:44.

KA ERA TUKUNA ESO

Eso era vakabauta nira na tauyavutaka e vuravura na tamata na Matanitu ni Kalou. Era na cakava qori nira veisautaka na vakabauta ni tamata se na nodra saga na bula veiyaloni.

KA E KAYA NA IVOLATABU

Na Kalou ga e tauyavutaka na Matanitu qori, sega ni tamata. (Taniela 2:44) Ni sa tauyavu na Matanitu ni Kalou, e kaya o Jiova: “Ia koi au ga, ka’u sa buli koya na noqu tui.” (Same 2:6) Koya na Matanitu ni Kalou e sega ni tauyavutaka na tamata, ena sega tale ga ni tarova na ka ena mai cakava, ni na liutaki vuravura mai lomalagi.​—Maciu 4:17.

VUNA MO KAUAI KINA

E sega ni cala noda vinakata meda veiyaloni da qai tiko vinaka. De dua o na saga me rawati qori, o qai rarawa ni sega ni yaco na ka o vinakata. Ia noda kila ni tauyavutaka o Jiova na Matanitu qori ena gu na lomada meda tokona da qai saga meda lewena.