DIGOVI VURAVURA

Arctic

E tukuna e dua na parofesa e dau dikeva na kabula e wasawasa o Peter Wadhams ena University of Cambridge, mai Peritania, “Ena vulaikatakata sa mamare na waicevata ni vakatauvatani kei na 30 na yabaki sa oti.” Ena 2012 e rauta e 50 na waqa era sa rawa ni soko muria na icurucuru ni waqa ena Northern Sea ni sa waicala na waicevata ena katakata ni draki.

Vuravura

Era kurabuitaka na dauvakadidike ni oti e vica na siga nona vakasucu e dua na tina, e laurai ena wainisucu e sivia e 700 na veimataqali beketiria. Ena gauna qo era se saga tiko ga mera kila se na yaga vakacava na beketiria ya ena nona gacagaca kei na sotia ni yagona na gone se qai sucu.

Peritania

Era vakadikeva na saenitisi mai Peritania ni o ira na draiva era tauvi matetaka e berabera mera kidava na ka mera cakava ni vakatauvatani kei ira na draiva era gunu alakaolo.

Democratic Republic of Congo

Era vakamatei vakayauyau e veiyabaki na elefaniti mai Aferika me volitaki na batidra. E laurai ni so na elefaniti e lauvana na uludra mai na elikopta.

Ositerelia

Sa mate e dua na iwase levu ni lase ena cakau na Great Barrier ena 27 na yabaki sa oti. Era tukuna na saenitisi ni vu qo mai na cagilaba, sivia na basaga votovotoa me vaka na bula [Acanthaster planci] kei na katakata se batabata sivia ni waitui.