Vakawati

E dua wale ga na veidinadinati na vakawati?

“Na ka sa vauca vata na Kalou me kua ni tawasea na tamata.”​—Maciu 19:6.

KA E KAYA NA IVOLATABU

Ena nona rai na Kalou, na vakawati e sega ni dua wale ga na veidinadinati. E dua na ituvatuva vakalou me baleta na nodrau vauci vata na tagane kei na yalewa. E kaya na iVolatabu: “Ena ivakatekivu, ‘A bulia na Kalou na tagane kei na yalewa. Oya na vuna ena biuti tamana kina kei tinana o tagane, me rau sa na dua ga na yago’; . . . O koya gona, na ka sa vauca vata na Kalou me kua ni tawasea na tamata.”a​—Marika 10:​6-9; Vakatekivu 2:24.

Na vosa “na ka sa vauca vata na Kalou” e sega ni kena ibalebale ni digia na Kalou na watida. Ia e vakaraitaka ga ni sega ni dodonu me raici vakamamada na vakawati baleta ni tauyavutaka sara ga na Dauveibuli. Ke rau kauaitaka qori na veiwatini, erau na rokova na ituvatuva ni vakawati, erau na okata me dua na ka e tawamudu, erau na saga tale ga me dei na nodrau vakawati. Ena dei ga na nodrau vakawati ke rau muria na ivakasala ena iVolatabu me baleta na nodrau dui itavi.

Na cava na itavi nei tagane?

“O tagane e ulu i watina.”​—Efeso 5:23.

KA E KAYA NA IVOLATABU

Me vinaka na vuvale, ena vinakati me dua e vakatulewa. E tukuna na iVolatabu ni lesi vua na tagane na itavi qori. Ia e sega ni kena ibalebale me vakacolasau, veivakalolomataki se mokusiga qai vakalaiva me cakava na ka kece o watina me na sega kina ni rokovi koya. E vinakata ga na Kalou me cakacaka vakaukaua o tagane me rawa ni qaravi watina qai dokai koya, me vaka ga e dua na itokani nuitaki e lomana. (1 Timoci 5:8; 1 Pita 3:7) E kaya na Efeso 5:28 ni “dodonu . . . vei ira na tagane mera lomani watidra me vaka ga nodra lomana na yagodra.”

Na tagane e lomana dina na watina ena mareqeta na ka e rawa ni cakava, nona taledi kei na nona rai, vakabibi ena veika e vauca na nodrau vuvale. Ena sega ni usuraka na nona rai baleta ga ni ulunivuvale. Kena ivakaraitaki, a sega ni rogoca na turaga yalodina o Eparama na ivakasala yaga i watina ena dua na ka e vauca nodrau vuvale qai tukuna vua o Jiova: “Mo rogoci koya.” (Vakatekivu 21:​9-12 NW) A talairawarawa ena veidusimaki qori o Eparama, mani vakilai na marau kei na duavata ena nona vuvale, e vakalougatataka tale ga na Kalou.

Na cava na itavi nei yalewa?

“Kemuni na yalewa vakawati, moni vakamalumalumu vei ira na dui watimuni.”​—1 Pita 3:1.

KA E KAYA NA IVOLATABU

Ni bera ni bulia na Kalou na wati Atama, e kaya: “Sa sega ni vinaka me tiko duadua na tamata: au na bulia e dua na dauveivuke e yaga vua.” (Vakatekivu 2:18) Na dauveivuke ena vakataucokotaka e dua na ka. A sega ni bulia na yalewa na Kalou me tautauvata kei na tagane se me vinaka cake vua, ia me tokoni koya ga. Qori ena rawa kina me rau vakayacora vinaka na ivakaro ni Kalou me rau vakaluveni qai vakasinaiti vuravura.​—Vakatekivu 1:28.

Na Kalou e solia vei ira na yalewa na kaukaua, vakasama kei na ivakarau ni rai e ganiti ira mera qarava vinaka kina na nodra itavi. Ke ra vakayagataka gona vakavuku ra qai cakava ena yalololoma ena dei kina na nodra vakawati, ena lomavakacegu na watidra, ra nuidei tale ga. Na Kalou e vakacaucautaki ira na yalewa era cakava qori.b​—Vosa Vakaibalebale 31:​28, 31.