Bulibuli Bulibuli

Era tukuna na dau veibataka na bulibuli ni ono ga na siga e bulia kina na vuravura na Kalou—oya me 24 na aua dua na siga. E dina ya?

“Enai vakatekivu sa bulia na lomalagi kei vuravura na Kalou.”—Vakatekivu 1:1.

KA E KAYA NA IVOLATABU

E bulia na lomalagi kei na vuravura na Kalou ena dua na gauna makawa sara, se vaka e tukuna na Vakatekivu 1:1 “enai vakatekivu.” Era duavata na saenisi nikua ni a dua na itekitekivu ni lomalagi kei na vuravura. Ena dua na gauna wale ga qo era tukuna na saenitisi ni a yaco qori ena 14 na bilioni na yabaki sa oti.

E vakamacalataki tale ga ena iVolatabu na ono na “siga” ni bulibuli. Ia e sega ni tukuna ni balavu ni dua na siga e 24 na aua. (Vakatekivu 1:31) Ni cavuta na iVolatabu na “siga,” e dau duidui na kena ibalebale. Kena ivakaraitaki, e vakatoka na gauna kece ni bulibuli me “siga sa bulia kina na vuravura kei lomalagi na Kalou ko Jiova.” (Vakatekivu 2:4) Ni dikevi malua, e macala ni “siga” e bulia kina na vuravura na Kalou e vakaibalebaletaka e vica na udolu na yabaki.—Same 90:4.

VUNA MO KAUAI KINA

Ena cala na nomu rai me baleta na iVolatabu ke o ciqoma na nodra rai cala na dau veibataka na bulibuli. Ena yasana adua, ke tu dina ena iVolatabu na ivakamacala me baleta na veikabuli, ena yaga mo dikeva, baleta na iVolatabu e ivurevure ni “vuku dina.”—Vosa Vakaibalebale 3:21.

A vakayagataka na Kalou na bula vakaidewadewa ni bulia na veikabula?

“Sa kaya na Kalou, Me vakatubura na ka bula na qele e na kedra mataqali.”—Vakatekivu 1:24.

KA E KAYA NA IVOLATABU

Na kabula a bulia na Kalou a sega ni tekivu mai na dua na ka somidi ra qai basika yarayara mai kina na veikabula tale eso me lai yacova na basika ni tamata. Ni a bulia na ‘duidui’ kau kei na manumanu ena “kedra veimataqali.” (Vakatekivu 1:11, 21, 24) Me yacova mai nikua e roboti vuravura na “veimataqali” kabula ena kedra ibulibuli ga a bulia na Kalou ena ivakatekivu.—Same 89:11.

E sega ni vakamatatataka na iVolatabu na veisau e yaco ena dua na mataqali kabula ena loma ni dua na gauna ni vakawa se na veisau ni vanua era bula kina. Eso era tukuna ni qori e okati tiko ena bula vakaidewadewa, ia e sega mada ga ni basika kina e dua tale na kabula. O ira na dauvakadidike nikua era kaya ni sega ni dua na veisau levu e laurai ena so na kau kei na manumanu ni oti e dua na gauna balavu.

VUNA MO KAUAI KINA

Ni donu vinaka na ivakamacala vakasaenisi ena iVolatabu me baleta na “veimataqali” veikabula, ena nuitaki kina na veika e tukuna me baleta eso tale na ulutaga, wili kina na itukutuku makawa kei na parofisai.

E buli vakacava na lomalagi kei na vuravura?

“Na ligaqu ga, sa tevuka na lomalagi.”—Aisea 45:12.

KA E KAYA NA IVOLATABU

E tu vua na Kalou na igu kei na kaukaua. (Jope 37:23) Qori e salavata kei na ka era sa qai kila na saenitisi ni igu e buli kina na veika e lomalagi kei na veika era tu e vuravura. E tukuna na iVolatabu ni Kalou o Jiova e tu vua ‘na kaukaua levu’ me bulia na lomalagi kei na vuravura. (Aisea 40:26) E yalataka na Kalou ni na vakayagataka na nona kaukaua me taqomaka na veika e bulia. E tukuna na iVolatabu me baleta na matanisiga, vula, kei na kalokalo: “Sa vakataudeitaki ira ko koya [Kalou] me ra yacova na veigauna kecega.”—Same 148:3-6.

VUNA MO KAUAI KINA

A tukuna ena dua na gauna o Allan Sandage e daudikeva na maliwalala: “E sega ni sauma rawa na veika vakasaenisi eso na taro bibi. Ni dua e via kila na vuna e tu kina na ka kece qo, e sega ni vakasaenisi na rai ya.” Ia na ivakamacala me baleta na veika buli ena iVolatabu e lako vata sara ga kei na veika vakasaenisi, e sauma tale ga na taro era sega ni kila na saenitisi—me vaka, Na cava na inaki ni Kalou me baleta na vuravura kei na kawatamata?a