Vakatevoro

E cala ke da saga meda veitaratara kei ira na mate?

“Dou kakua ni golevi ira sa daucurumi, . . . mo dou vakadukadukalitaki kina.”​—Vunau ni Soro 19:31.

KA ERA TUKUNA ESO

E levu era via kila se ra rarawa tiko na wekadra lomani sa takali se sega. Era kaya kina: “Vakacava mo kerea e dua na dauvakacuru se daurairai me veitaratara kei na wekamu sa takali? De dua o na lomavakacegu kina.”

KA E KAYA NA IVOLATABU

E matata na ka e tukuna na iVolatabu me baleti ira era saga mera veitaratara kei ira na mate, qo e dua na ivakarau era dau vakayacora ena gauna makawa. Kena ivakaraitaki, e volai ena lawa i Jiova vei ira na Isireli: “Me kakua ni kune vei kemuni e dua . . . sa taroga na daucurumi, . . . se . . . taroga na tamata sa mate. Ni ra sa tamata vakasisila vei Jiova ko ira kecega era sa kitaka na veika oqo.” (Vakarua 18:10-12) E tukuna tale ga na iVolatabu ni o ira na dau vakatevoro era “na sega ni rawata na matanitu ni Kalou.”​—Kalatia 5:19-21.

E rawa ni vukei keda na bula tiko na sa mate?

“Ni ra sa kila ko ira sa bula ni ra na mate: ia ko ira na mate era sa sega ni kila e dua na ka.”​—Dauvunau 9:5.

KA ERA TUKUNA ESO

Levu era tukuna ni gauna e mate kina e dua e bula tiko na yalona. Era na rairai saga gona mera veitaratara kei na dua sa mate mera kila eso na itukutuku se mera vakayalovinakataki koya me kua kina ni vakasagai ira.

KA E KAYA NA IVOLATABU

“Ni ra sa kila ko ira sa bula ni ra na mate: ia ko ira na mate era sa sega ni kila e dua na ka. . . . Na nodra loloma, kei na nodra veicati, kei na nodra vuvu, [ka era vakila nira se bula] sa . . . yali.” (Dauvunau 9:5, 6) Io na iVolatabu e kaya ni o ira na mate era sega ni vakila e dua na ka. Era sega ni vakasama, yavala se qarava na Kalou. E kaya na Same 115:17, “era sa sega ni vakavinavinaka rawa vei Jiova ko ira na mate, se ko ira era lako sobu ki na vanua era galu kina.”

E dau donu beka ena so na gauna na ka era vakatakila na dauvakacuru?

“Me ra [tarogi, NW] na mate e na vukudra na bula?”​​—Aisea 8:19.

KA ERA TUKUNA ESO

O ira na dauvakacuru e rawa nira vakatakila na veika era kila ga na sa mate kei na nodra vuvale.

KA E KAYA NA IVOLATABU

Ena 1 Samuela wase 28 e vakamacalataka na nona beca na lawa ni Kalou na tui tawayalodina o Saula. A lai kerea e dua na yalewa dauvakacuru me veitaratara kei Samuela na tamata ni Kalou sa mate. Vakacava a veitaratara dina na yalewa dauvakacuru kei Samuela? Sega! A veitaratara ga kei na dua e vaka na irairai kei Samuela.

Qori na yalovelavela, e dua na italai i Setani na “tama ni lasu kece.” (Joni 8:44) Na cava era vakabulabulataka kina na yalovelavela se timoni na vakasama nira bula tiko na mate? Era cakava qo me vakarogorogocataki kina na Kalou, me vakatanitaki tale ga kina na nona vosa na iVolatabu.​—2 Timoci 3:16.

Ena veika sa tukuni mai cake, e tiko beka na nodra inuinui na mate? Io! E yalataka na iVolatabu ni o ira na “moce” tu ena ibulubulu era na vakaturi ena dua na gauna mai muri.a (Joni 11:​11-13; Cakacaka 24:15) Eda lomavakacegu gona nida kila nira sega ni rarawa tiko na wekada sa takali.That impostor was a wicked spirit, an agent of “the father of the lie”​—Satan.