3 Tiko na iNuinui

E kaya na iVolatabu ni noda bula e ‘lekaleka wale qai sinai ena leqa.’ (Jope 14:1) Eda dau sotava kece na leqa. Ia era nanuma eso ni sa tawayaga na bula, e vaka ga me sega tu na rarama ena vunilagi se sega tu nodra inuinui me baleta na veigauna se bera mai. Vakacava e va tale ga qori nomu rai? Ke vaka kina, me vakanuideitaki iko na inuinui e yalataki ena iVolatabu, e rawa ni noda kece na kawatamata. Kena ivakaraitaki:

• E kaya na iVolatabu ni nakita na Kalou o Jiova e dua na ka uasivi me baleti keda na kawatamata.—Vakatekivu 1:28.

• E yalataka na Kalou o Jiova me vukica na vuravura qo me parataisi.—Aisea 65:21-25.

• Ena vakayacori dina na yalayala qori. E kaya na Vakatakila 21:3, 4:

  “E sa tiko vei ira na tamata na vale ni Kalou, ena tiko vata kei ira o koya, era na nona tamata. Na Kalou sara ga ena tiko vata kei ira. Ena qusia tale ga na wainimata kece mai na matadra, sa na sega tale na mate, na lolosi, na tagiyaso, kei na mosi. Sa sega na veika e dau yaco e liu.”

Na inuinui qori e sega ni tadra wale ga. E inaki ni Kalou o Jiova me vakayacora dina, e vinakata sara ga me cakava qori qai tu vua na kaukaua me vakayacora kina. E nuitaki na ka e yalataka na iVolatabu me baleta na inuinui, qori na vuna mo ‘kua kina ni soro!’

NANUMA TIKO: E rawa ni veiveisau na ivakarau ni lomamu me vaka ga na waqa e sokota na wasawasa voravora, ia na itukutuku veivakacegui ena iVolatabu e vaka na ikelekele ena vakataudeitaki iko.

KA O RAWA NI CAKAVA: Saga sara qo mo kila na ka e kaya na iVolatabu me baleta na inuinui dina ni veigauna se bera mai. Era na marau na iVakadinadina i Jiova mera vukei iko. O rawa ni taroga e dua ena vanua o tiko kina se raica na Web site, jw.org.a