Veibutakoci

Cava na veibutakoci?

KA ERA TUKUNA ESO

Ena so na vanua e sega ni cala na veibutakoci, vakalevu ke ra cakava qori na tagane vakawati. So tale era sega ni raica me ivau dei na vakawati.

KA E KAYA NA IVOLATABU

Ena iVolatabu, na veibutakoci e vakaibalebaletaki vua na tagane se yalewa e veiyacovi ena taudaku ni nona vakawati. (Jope 24:15; Vosa Vakaibalebale 30:20) E vakasisila ena mata i Jiova o koya e veibutakoci. Ena lawa e Isireli makawa, ena totogi mate o koya e veibutakoci. (Vunau ni Soro 18:20, 22, 29) A vakavulici ira nona imuri o Jisu mera kua ni veibutakoci.​—Maciu 5:27, 28; Luke 18:18-20.

VUNA MO KAUAI KINA

O ira na veibutakoci era sa sega ni yalodina ina nodra yalayala ena gauna era vakamau kina. Era ‘valavala ca tale ga kina vua na Kalou.’ (Vakatekivu 39:7-9) Rawa sara ga ni vakavuna nodra tawasei na gone vei ira na itubutubu. Koya e bibi sara oya ni veivakaroti na iVolatabu ni na ‘lewai ira na veibutakoci na Kalou.’​—Iperiu 13:4.

“Meda rokova kece na vakawati, me kua tale ga ni vakadukadukalitaki na imocemoce ni vakawati.”​—Iperiu 13:4.

E yalana na bula vakawati na veibutakoci?

KA E KAYA NA IVOLATABU

Na yavu vakaivolatabu e rawa kina na veisere ke dua vei rau na veiwatini e veibutakoci. (Maciu 19:9) Kena ibalebale oqo ni o koya e sega ni cala e tu vua na dodonu me vakatulewataka me tiko ga kei watina e tawayalodina se rau sere. Ena vakatulewa ga kina o koya.—Kalatia 6:5.

Ena yasana adua, na vakawati e ka tabu ena mata ni Kalou, me tawamudu tale ga. (1 Korinica 7:39) Sega ni taleitaka na Kalou na veisere e yavutaki tu ga ena dua na ka lailai me vaka na nona sega ni marautaka e dua na nona bula vakawati. Me kua gona ni raici vakamamada na veisere.​—Malakai 2:16; Maciu 19:3-6.

“Au tukuna vakadodonu vei kemuni ni tagane e sereka na watina ni sega ni veiyacovi tawadodonu, ena vakarawarawataka me veibutakoci o yalewa.”​—Maciu 5:32.

E okati na veibutakoci me ivalavala ca e sega ni vosoti rawa?

KA E KAYA NA IVOLATABU

Sega. Kaya na iVolatabu ni dau vosoti ira na veivutuni ra qai biuta nodra ivalavala ca na Kalou. Era okati tiko kina na veibutakoci. (Cakacaka 3:19; Kalatia 5:19-21) Era volaitukutukutaki tale ga ena iVolatabu na tagane kei na yalewa era tinia nodra veibutakoci, ra qai itokani ni Kalou.​—1 Korinica 6:9-11.

A vosoti Tui Tevita e Isireli makawa na Kalou. A veibutakoci kei na dua na wati ni nona sotia. (2 Samuela 11:2-4) E vakamatatataka na iVolatabu ni “sega ni taleitaka” na Kalou “na ka e cakava o Tevita.” (2 Samuela 11:27) Ni vunauci, e veivutuni o Tevita qai vosoti koya na Kalou. Ia a sotava na ca ni nona ivalavala. (2 Samuela 12:13, 14) E qai tukuna kina na tui vuku o Solomoni ni “o koya e veibutakoci . . . e yalowai.”​—Vosa Vakaibalebale 6:32.

KA O RAWA NI CAKAVA

Ke o veibutakoci, mo kerea nona veivosoti na Kalou kei watimu. (Same 51:1-5) Mo cata na veibutakoci me vaka ga nona cata na Kalou. (Same 97:10) Vakadeitaka mo kua ni raica se sarava na iyaloyalo ca, ka e uqeta na gagadre ni veiyacovi, wedewede, se dua tale na ka mo vinakata se domona kina e dua e sega ni watimu.​—Maciu 5:27, 28; Jemesa 1:14, 15.

Ke veibutakoci o watimu, nanuma tiko ni kila vinaka na lomamu na Kalou. (Malakai 2:13, 14) Kerea nona veivakacegui kei na veidusimaki, ena qai “tokoni iko o koya.” (Same 55:22) Ke o vakatulewataka mo vosoti watimu, mo drau kua tale ga ni veibiu, drau saga mo drau vakavinakataka na ivau ni nomudrau vakawati.​—Efeso 4:32.

“Sa vosota . . . o Jiova na nomu ivalavala ca” e kaya na parofita o Necani vei Tevita ni veivutunitaka nona veibutakoci.​—2 Samuela 12:13.