Na Rarawa e Vakilai Nida Lolosi

“E rauta ni 39 na yabaki na neirau bula vakawati kei Sofiaa me yacova ni rawai koya na kena mate. Era veivuke na noqu itokani, au vakaogai au tale ga ena so na ka. Ia e mosimosi dina na yabaki taucoko qori. Au sega ni lewa rawa na ivakarau ni lomaqu. Sa oti qo e tolu na yabaki nona takali, ia au se vakila ga na rarawa.”—Koroi.

E takali beka e dua na wekamu se nomu itokani voleka? Ke vaka kina, o na duavata kei na veika e vakila o Koroi. Eso na ka e rawa ni vakavuna na lomabibi kei na rarawa ni takali na isa ni vakawati, itokani se weka voleka. Era vakadinata qori o ira na kenadau era vulica na rarawa e vakavuna na lolosi. E vakamacalataki ena ivola The American Journal of Psychiatry, “e levu era nanuma ni gauna e mate kina na wekadra se itokani voleka e vaka ga ni takali vakadua, ra qai rarawataka vakalevu.” Dua na ka na mosi era vakila. Ena rairai veinanuyaka kina o koya e lolosi tiko: ‘Ena vakacava na dede ni noqu rarawa tiko? Au na rawa ni marau tale? Au na vakacegui vakacava?’

Ena saumi na taro qori ena mekesini qo. Na ulutaga e tarava e vakamacalataka na ka mo namaka ni o lolositaka nona takali e dua na wekamu voleka. E vakamacalataki ena vica na ulutaga e tarava eso na sala ena vukei iko mo kua ni lolosi vakalevu.

Keimami nuitaka ni na veivuke qai veivakacegui na vica na ulutaga e tarava vei ira na rarawataka tiko nodra lolosi.