Kua ni Soro

IBALEBALE NI KUA NI SORO

O koya e sega ni soro koso, e vosota na ituvaki dredre se rarawataki. Ena vukei koya qori me kila na ka me cakava. Me vaka nona vakavulici na gone me taubale, e namaki ni na lutu ena so na gauna. E va tale ga qori nona rawaka e dua ena veigauna se bera mai, ena sotava tale ga na veika dredre.

BIBI NI KUA NI SORO

Eso na gone era dau yalolailai ni sega ni rawa vinaka nodra sasaga, sotava e levu na leqa, se nira vakalewai. Eso tale era soro koso. Ia e bibi mera kila e vica na tikina qo:

• Tiko ga eso na ka eda na sega ni rawa ni cakava.—Jemesa 3:2.

• Eda na sotava kece na veika dredre.—Dauvunau 9:11.

• O na tamata yaco ni o vakadodonutaki.—Vosa Vakaibalebale 9:9.

Ni o vosota na ituvaki dredre, ena vukei luvemu ena ka me cakava ke sotava tale ga na veika dredre ena veigauna se bera mai.

O NA VAKARAITAKA VAKACAVA?

Ni guce nona sasaga.

IVAKAVUVULI VAKAIVOLATABU: “De bale vakavitu na yalododonu ena duri tale.”​—Vosa Vakaibalebale 24:16.

Vukei koya me kila e leqa levu se sega. Kena ivakaraitaki, cava ena cakava ke sega ni rawata nona veitarogi e koronivuli? Ena rairai yalolailai qai kaya: “Au sa sega ni rawata sara ga!”

Vakavulici koya na ka me vakavinakataka ena gauna mai muri. Ena vukei koya me kua ni soro, ena sega tale ga ni rarawataka.

Kua ni walia nona leqa. Dusimaki koya ga ena sala me walia kina vakataki koya. De dua mo tarogi koya, “Cava o rawa ni cakava mo kila vinaka na ulutaga o vulica?”

Ni sotava na leqa.

IVAKAVUVULI VAKAIVOLATABU: “Oni sega mada ga ni kila se na vakaevei na nomuni bula nimataka.”—Jemesa 4:14.

Eda sega ni kila na ka ena yaco ena noda bula. O koya e vutuniyau e rawa ni dravudravua, se o koya e bulabula vinaka ena rawa ni tauvimate. E kaya na iVolatabu: “Nira sega ni qaqa tu ga ena veitau na yavatotolo, se ra qaqa tu ga ena ivalu o ira era kaukaua, ni dau yacovi ira kece na gauna kei na ka e sega ni namaki.”—Dauvunau 9:11.

E nomu itavi ni o itubutubu, mo saga ena nomu vinaka kece mo taqomaki luvemu ena leqa. Ia e sega ni rawarawa qori.

E se rui gone sara na luvemu me vakila na ituvaki dredre ni sega na cakacaka, se dredre na bula vakailavo. Ia o rawa ni vukei koya me vosota eso tale na veika dredre, me vaka ni mate e dua nona itokani, se lewenivuvale.a

Ni tukuni me vakavinakataka nona ivakarau ni bula.

IVAKAVUVULI VAKAIVOLATABU: “Mo rogoca na ivakasala . . . mo vuku kina ena nomu veisiga mai muri.”—Vosa Vakaibalebale 19:20.

E sega ni okati me veisagai na vakalelewa. E kena inaki ga me vakavinakataka nona itovo.

Ni o vakavulici luvemu me rogoca nomu veivakadodonutaki, ena yaga vakalevu vei kemudrau. E kaya e dua na tama o John: “Ena sega ni dua na ka era vulica na gone ke ra vakararavi tu ga ena nomu veivuke nira sotava na leqa. Ena kuria ga nodra leqa, o na qai oca na vakamuri ira ni o saga mo walia. Drau na rarawa tale kina vakalevu.”

O na vukei luvemu vakacava me donu tiko ga nona rai ena ka e vakalewai kina ni vakadodonutaki? Ke mani caka qori e koronivuli se dua tale na gauna, kua ni totolo nomu kaya vua ni sega ni dodonu qori. Ia rawa ni o tarogi koya:

• “Cava mada o vakadodonutaki kina?”

• “Cava gona o na cakava?”

• “Cava o na cakava ke mani yaco tale qori?”

Mo nanuma tiko, na nona vakadodonutaki ena vukei koya ena gauna qo kei na gauna sa uabula kina.