Sala Mo Lomavakacegu Kina

Dau Cakacaka Vakaukaua

“Me cakacaka ga vakaukaua, me vakaitavitaka na ligana ena cakacaka yaga, me solia kina e dua na ka vei koya e leqa tu.”—EFESO 4:28.

E uqeti keda na Dauveibuli me donu noda rai me baleta na cakacaka. Na vuna? Ena marau na daucakacaka ni rawa ni qaravi koya kei na nona vuvale. Ena rawa tale ga ni vukea e dua tale. Ena taleitaki koya o nona boso, qai dredre ni vakacegui mai na nona cakacaka. Sa rauta me kaya na iVolatabu, ni veika eda rawata nida cakacaka vakaukaua e “isolisoli ni Kalou.”—Dauvunau 3:13.

Dau Dina

“Keitou nuitaka ni vinaka na neitou lewaeloma, ni keitou vinakata me keitou dina ena ka kece.”—IPERIU 13:18.

Ke da dau dina, eda na nuidei, lomavakacegu qai moce vinaka ena bogi. Eda na nuitaki, ra qai dokai keda eso tale. Qori na ka era sega ni vakila na dau lasu. Ena ora tu na lomadra ra qai leqataka nira na tobo ena dua na siga.

Donu Noda Rai me Baleta na iLavo

“Me kua ni laurai ena nomuni bula ni oni lomana na ilavo, ni lomavakacegu ga ena ka e sa tiko vei kemuni.”—IPERIU 13:5.

Eda vinakata na ilavo me voli kina na kakana kei na so tale na ka. Ia, e rerevaki “na lomani ni ilavo.” Ena rawa ni vakavuna meda vakalusia noda gauna kei na igu ena vaqara ilavo. Qori e rawa ni vakaleqa noda bula vakawati, lailai noda gauna vei ira na luveda, qai vaka vu tauvimate. (1 Timoci 6:9, 10) O koya e lomana na ilavo ena rawa ni temaki me daulawaki. E kaya e dua na turaga vuku: “Na tamata yalodina ena vakalougatataki vakalevu, ia o koya e kusava me vutuniyau ena sega ni dina tiko ga.”—Vosa Vakaibalebale 28:20.

Digia na Vuli Vinaka Duadua

“Mo taura matua na vuku kei na raiyawa.”—VOSA VAKAIBALEBALE 3:21.

E yaga na vuli me rawa nida nuitaki kina, meda dua tale ga na itubutubu vinaka. Ia na vuli va qori ena sega ni vakadeitaka nida na marau tu ga se lomavakacegu. Me rawa vinaka na ka kece eda cakava, ena vinakati me vakavulici keda na Kalou. E kaya na iVolatabu me baleti koya e vakarorogo vua na Kalou: “Na ka kece e cakava ena vuavuaivinaka.”—Same 1:1-3.