E Bibi Mo Vakadeitaka
Cava e bibi kina mo vakadeitaka ke tiko na Dauveibuli? Ke o sa vakadeitaka ni bula tiko na Kalou Kaukaua Duadua, o na rairai via kila na kena ivakadinadina ena iVolatabu, na ivola e vakavuna o koya. Ke o vakabauta tale ga na ka e kaya na iVolatabu, ena rawa ni yaga vei iko ena vica na sala qo.
O na marautaka vakalevu nomu bula
KA E KAYA NA IVOLATABU: “E caka vinaka tiko ga [na Kalou], e vakatauca vei kemuni na uca mai lomalagi, e solia na gauna vinaka ni tatamusuki, e vakamamautaki kemuni ena kakana kei na lomamuni ena marau.”—Cakacaka 14:17.
KENA IBALEBALE: Na isolisoli kece o marautaka e vuravura e nona iloloma talei na Dauveibuli. O na vakavinavinakataki koya vakalevu ni vakaraitaka na nona kauaitaki iko.
iVakasala yaga me baleta na bula e veisiga
KA E KAYA NA IVOLATABU: “O na . . . kila na ibalebale ni yalododonu kei na lewadodonu kei na cakacaka dodonu, io, na ivalavala vinaka kece.”—Vosa Vakaibalebale 2:9.
KENA IBALEBALE: E buli keda na Kalou, e kila gona na ka o gadreva mo marau kina. Ni o wilika na iVolatabu, o na vulica e levu na ka ena yaga vei iko ena gauna qo.
Saumi nomu lomatarotaro
KA E KAYA NA IVOLATABU: “O na kila na ka e baleta na Kalou.”—Vosa Vakaibalebale 2:5.
KENA IBALEBALE: Nomu kila ni bula tiko na Dauveibuli ena vukei iko mo kila eso na isaunitaro bibi me vaka: Cava na inaki ni bula? Cava e levu kina na rarawa? Cava e yaco nida mate? Ena vakacegui iko na kena isau ena iVolatabu.
Vakanuinui tu ena veigauna vinaka e se bera mai
KA E KAYA NA IVOLATABU: “‘Niu kila vinaka na ka au nanuma tiko me baleti kemuni,’ e kaya o Jiova, ‘na nanuma moni tiko vakacegu moni kua ni rarawa, meu solia vei kemuni na inuinui kei na ka moni namaka ena gauna se bera mai.’”—Jeremaia 29:11.
KENA IBALEBALE: E yalataka na Kalou ni na vakaotia na ca, rarawa kei na mate ena gauna se bera mai. Ni o nuitaka na nona yalayala, ena vukei iko mo vosota na ituvaki dredre o sotava e veisiga.