SA VEILECAYAKI O VURAVURA

4 | Taqomaka Nomu iNuinui

NA VUNA?

Na lomaocaocataki ni leqa e tarai vuravura tu nikua, e rawa ni vakavuna na rarawa kei na yalolailai. E levu gona era sa sega ni qai nuitaka ni na vinaka rawa na ituvaki. Cava era sa qai cakava?

Eso era sega ni via vakasamataka na veigauna se bera mai.
Eso tale era saga mera guilecava nodra leqa nira gunu, se vakayagataka na wainimate gaga.
Eso era nanuma ni sega ni vakainaki nodra bula, ra qai via vakamatei ira ga.

Ka Mo Kila

Eso na leqa o sotava ena rairai lekaleka ga, qai rawa ni veisau totolo me vinaka tale.
Ke sega mada ga ni vinaka na kemu ituvaki, e tiko eso na ka o rawa ni cakava mo vosota kina.
E tu ena iVolatabu na inuinui dina, e kaya ni sa vakarau oti vakadua na leqa ni kawatamata.

Ka o Rawa ni Cakava

E kaya na iVolatabu: “Kua vakadua ni lomaocaocataka na siga nimataka, ni siga nimataka e tu vata kei na kena lomaocaoca. Na siga kece sa dui tu ga na kena ca.”—Maciu 6:34.

Cakava ga na ka o rawata ena dua na siga. Kua ni vakalaiva na leqataki ni veigauna se bera mai mo kua kina ni qarava na nomu itavi ena dua na siga.

Nomu leqataka na veika ca ena rairai yaco, ena kuria na nomu lomaocaoca, o na sega kina ni nuitaka na veigauna vinaka se bera mai.

O NA VOSOTA VAKACAVA?—Vakatutu Yaga

ME VINAKA TIKO GA NOMU RAI

E kaya na iVolatabu: “E ca na nona siga kece o koya e vakaloloma tu, ia o koya e marau na lomana e kana magiti tiko ga.” (Vosa Vakaibalebale 15:15) Ke o vakasamataka vakalevu na leqa o sotava, de dua o na sega ni raica rawa na kena iwali. Ia ke vinaka tiko ga nomu ivakarau ni rai, o na kila na sala mo walia kina na nomu leqa.

Kua ni kauaitaka se vakayagataka vakalevu nomu gauna ena rogo nius.
Ni oti e dua na siga, vola e rua se tolu na ka o marautaka.
Vola ga na ka mo cakava ena dua na siga. Ke o cakava e dua na itavi levu, wasewasei ira vakalalai mo rawa ni qarava vinaka ena dua na siga.

KERE VEIVUKE

E kaya na iVolatabu: “Na tamata e tawasei koya . . . e saqata na vuku kece.” (Vosa Vakaibalebale 18:1) O sega ni rawa ni vueti iko duadua ga mai na qara titobu, ena vinakati gona e dua me vukei iko.

Kerea nodra veivuke nomu lewenivuvale se itokani.
Qara tale ga na sala o rawa ni vukei ira kina. Nomu vukei ira eso tale, ena donu tiko ga kina nomu rai ena leqa o sotava.
Ke o yalolailai vakasivia qai nanuma ni sa sega ni yaga nomu bula, ena vinaka mo lai raici vuniwai. Eso na gauna nida leqataka vakasivia e dua na ka, e rawa ni vakatakilakila ni tauvimate, me vaka na lomabibi se depression. Levu era sa vukei vakavuniwai ena mate qori.a

a E sega ni vakatututaka na Yadra! e dua na mataqali veiqaravi vakavuniwai.

Na iNuinui Dina e Yalataka na iVolatabu

E masulaka na daunisame vua na Kalou: “Na nomuni vosa na cina ina yavaqu, kei na rarama ena noqu sala.” (Same 119:105) Raica mada qo na sala e va kina qori na Vosa ni Kalou na iVolatabu:

Na cina ena vakaraitaka vei keda na vanua meda muria ena bogi buto. E va tale ga qori na iVolatabu, e tu kina na ivakasala yaga e rawa nida vakatulewa vakavuku kina ena gauna dredre.

Na cina ena rawa ni vakararamataka na noda sala, meda kila kina na veika e tu mai liu. E va tale ga qori na iVolatabu, e rawa ni vakararamataka na noda rai ena veigauna vinaka se bera mai.

E sega ni tukuni ga ena iVolatabu na itukutuku makawa me baleta na kawatamata, ia e tukuna tale ga na veigauna totoka se bera mai. E vakamacalataka na:

iTekitekivu ni Rarawa

E kaya na iVolatabu ena “vuku ni dua ga na tamata e curu kina i vuravura na ivalavala ca, kei na mate ena vuku ni ivalavala ca, mani dewa na mate vei ira na tamata kece ga ni sa valavala ca na tamata kece ga.”—Roma 5:12.

Vuna e Sega ni Wali Rawa Kina na Noda Leqa

Na veiliutaki ni tamata e sega ni rawa ni walia na noda leqa. E kaya na iVolatabu ni “sega ni vu vua na tamata e lako tu me lewa na nona ilakolako.” (Jeremaia 10:23) Eda vakadinadinataka qori ena veika e yaco tu e vuravura nikua.

Sala ena Walia Kina na Kalou Noda Leqa

E kaya na iVolatabu na Kalou ena “qusia tani . . . na wainimata kece mai na matadra, sa na sega tale na mate, na lolosi, na tagiyaso, kei na mosi.”—Vakatakila 21:4.