CAVA MO CAKAVA NI TUBU NA ISAU NI IYAYA?

Mo Nuidei

Vakacava e sau levu na iyaya ena nomu vanua ni vakatauvatani kei na kemu isau? O leqataka tiko na ka mo bula kina kei na nomu vuvale? Kevaka kina, de dua o na nuiqawaqawataka na veika ena gauna se bera mai. Ia ena yaga ke tiko na inuinui ena ituvaki dredre va qori.

VUNA MO KAUAI KINA

O ira na dau vakanuinui, era vinakata me yaco na ka vinaka. Era kila tale ga na ka mera cakava ena ituvaki era sotava. Kena ivakaraitaki, e laurai ena dua na vakadidike ni o ira e tiko nodra inuinui. . .

era vosota na ituvaki dredre
e rawarawa mera cakava na veisau
era vakatulewataka vinaka nodra ivakarau ni bula, okati kina na itovo me vinaka na nodra bula

KA O RAWA NI CAKAVA

iMatai, dikeva na sala e rawa ni vukei iko kina na iVolatabu. E tiko ena iVolatabu na ivakasala ena vukei iko mo vosota na tubu ni isau ni iyaya. Na vakatutu qori kei na levu tale, ena rawa ni yaga ena nomu bula, kei na ka mo cakava ni yaco na ituvaki dredre ena gauna se bera mai.

“Ena taqomaki iko na raiyawa, ena viribaiti iko na yalomatua.”—Vosa Vakaibalebale 2:11, New Century Version.

iKarua, raica na ka e tukuna na iVolatabu me baleta na gauna se bera mai. Ni o kila vinaka na ivakasala vuku e tu kina, ena uqeti iko mo kila eso tale na ka me baleta na gauna se bera mai. Kena ivakaraitaki, o na vulica kina ni sega ni vakarautaka wale ga na Kalou na ‘inuinui kei na gauna se bera mai,’ ia e vakarautaka sara ga na yavu me dei kina na inuinui. (Jeremaia 29:11) Qori na Matanitu ni Kalou.

CAVA NA MATANITU NI KALOU? CAVA ENA CAKAVA?

Na Matanitu ni Kalou e dua dina na matanitu, ena lewa na vuravura taucoko. (Taniela 2:44; Maciu 6:10) Ena veiliutaki mai lomalagi qai vakaotia na rarawa, kei na dravudravua. Ena vakilai na bula vakacegu, eda na marau tale ga ni vakarautaka na veika eda gadreva. Qo na ka e vakamacalataka eso na tikinivolatabu.

“O na marau, o na rawaka vakalevu.”—Same 128:2.

“Era [o ira na vakarurugi ena Matanitu ni Kalou] na sega ni oca wale.”—Aisea 65:23.

“Ena levu na covuata e vuravura.”—Same 72:16.

E vica vata na milioni era nuitaka na yalayala qori, ra qai vakadeitaka ni “sega ni lasu rawa” na Kalou. (Taito 1:2) Vakacava mo wilika qori ena iVolatabu? Na inuinui e tukuni kina e rawa ni vakaukauataki iko mo vosota na dredre ni bula vakailavo, qai rai vakanamata ena gauna se bera mai.