Biu o Josefa i Valeniveivesu

E SE qai yabaki 17 ga o Josefa sa kau yani i Ijipita. A volitaki sara vua e dua na tamata na yacana o Potifa. E cakacaka tiko o Potifa vei Fero na tui Ijipita.

E dau cakacaka vakaukaua o Josefa vei Potifa. Ni sa cauravou mai sa qai solia vua o Potifa me lewa na veika kece ena nona vale. Ia na cava ga e vesu tiko kina ena valeniveivesu? E vakavuna na wati Potifa.

E vinakata na wati Potifa me rau moce vata kei Josefa baleta ni sa rui tamata rairai vinaka. Ia a bese o Josefa baleta e kila ni cala. E cudru sara kina vakalevu na wati Potifa, qai lasu vei watina, e kaya: ‘A vinakata na tamata ca o Josefa me keirau moce vata!’ E vakabauti koya o Potifa qai cudruvi Josefa. Oya na vuna e tiko kina o Josefa e valeniveivesu.

Ia e raica na ivakatawa ni valeniveivesu ni tamata vinaka o Josefa qai lesi koya me lewai ira kece na kaivesu. Dua tale na gauna e muri, a cudruvi rau nona dautalowaini kei na dauvavavi o Fero mani biuti rau i valeniveivesu. Dua na bogi erau tadra e yadua na tadra rau qai sega ni kila na kena ibalebale. Ena mataka cake e kaya o Josefa: ‘Drau tukuna mada mai vei au na ka drau tadra.’ Ena veivuke i Jiova a tukuna vei rau o Josefa na kena ibalebale.

A kaya vua na dautalowaini: ‘Ni oti ga e tolu na siga o na lai talo waini tale vei Fero.’ Qai kuria tale o Josefa: ‘Lai tukuni au vei Fero me rawa niu lako laivi e ke.’ Vei koya na dauvavavi, a kaya o Josefa: ‘Ena tolu ga na siga, ena taya musuka na domomu o Fero.’

E yaco dina na veika a kaya o Josefa ni oti ga e tolu na siga. A vakarota o Fero me vakamatei na dauvavavi. O koya na dautalowaini a lesu tale ina nona cakacaka makawa me lai qarava na tui, ia a guilecava na kerekere i Josefa. A sega ni tukuna vei Fero e dua na ka mani tiko ga kina ena valeniveivesu o Josefa.