Toki na Matavuvale i Ijipita

SA SEGA ni qai vosota rawa tale o Josefa. E tukuna mera lako tani kece nona dauveiqaravi. Ni sa tiko ga vata kei iratou na tacina, sa tagi sara. Vakasamataka mada na nodratou kurabui na tacina, ni ratou sega ni kila se cava e tagica tiko. Sa qai kaya o koya: ‘O yau o Josefa. E se bula tiko beka na tamaqu?’

Eratou kidroa dina na tacina ni sega sara ga ni ratou vosa rawa ena levu ni nodratou rere. Sa qai kaya o Josefa: ‘Yalovinaka, dou lako voleka mai, o yau na tacimudou o Josefa, o koya dou a volitaka i Ijipita.’

E vosa tiko ga vakayalovinaka vei iratou o Josefa: ‘Dou kua ni beitaki kemudou ni dou a volitaki yau. Ni talai au dina mai na Kalou ina vanua oqo o Ijipita meu vakabulai ira na tamata. Sa lesi au o Fero meu lewa taucoko na vanua. Ia oqo dou lesu totolo qai talanoataka na nodatou sota vei tamaqu. Tukuna vua me mai tiko e ke.’

E mokoti iratou qai reguci iratou na tacina kece o Josefa. Ni rogoca o Fero na nodratou tiko na taci Josefa, a kaya vua: ‘Solia vei iratou na qiqi me ratou lai kauti tamadratou mai kei na nodratou vuvale. Au na solia vei iratou na qele vinaka duadua e Ijipita.’

Eratou cakava sara ga na ka oqori. Raica mada e ke na nona sa sotavi tamana o Josefa ni sa yaco yani i Ijipita kei ira kece na nona vuvale.

Era lewe levu na vuvale i Jekope. Era lewe 70 kece ena gauna era toki mai kina i Ijipita, wili kina o Jekope, o ira na luvena kei ira na makubuna. Era tiko tale ga na dui watidra qai rairai levu na dauveiqaravi. Era sa mai tiko kece e Ijipita. Sa yacadra vou o Isireli, baleta ni a veisautaka na yaca i Jekope me o Isireli na Kalou. Eda na qai raica malua nodra sa mai tamata digitaki tu ni Kalou na Isireli.