Liutaki Ijipita e Dua na Tui Ca

O RAU na tagane oqo erau vakaukauataki ira tiko na tamata mera cakacaka. Raica mada na tagane e veimoku tiko! O ira na tamata cakacaka oqo era kawa i Jekope, era vakatokai ena yacana o Isireli. Era kai Ijipita na tagane era vakaukauataki ira tiko na Isireli mera cakacaka. Na cava a yaco mera bobula kina na Isireli vei ira na Ijipita?

Sa dede sara nodra marautaka na tiko e Ijipita na vuvale i Jekope. Na vuna baleta ni kauaitaki ira vakalevu o Josefa, na iliuliu kei Ijipita e taravi koya ga na tui, o Fero. Ia, lakolako sa qai mate o Josefa, a dua tale na Fero vou e Ijipita e sega ni dau taleitaki ira na Isireli.

O koya sara ga na Fero ca oqo a vakabobulataki ira na Isireli. E lesi ira na tamata cudrucudru mera dau vakararawataki ira na Isireli nira cakacaka tiko. Era vakaukauataki mera tara na koro i Fero. Ia, e levu tiko ga mai na kedra iwiliwili na Isireli. E vakarerei ira na kai Ijipita oqo de ra na qai kaukaua cake kina na Isireli.

O kila na ka a qai cakava o Fero? A kaya vei ira na yalewa ni Isireli era dau vakasucuma na gone: ‘Dou vakamatei ira na gonetagane kece era sucu mai.’ Ia nira yalewa vinaka, era sega ni via vakamatei ira na gone.

Sa qai vakaroti ira kece na nona tamata o Fero: ‘Dou vakamatei ira na gonetagane ni Isireli, mera bula ga na yalewa.’ E dua dina na ka rerevaki oqo. Meda raica mada na nona qai vakabulai e dua na gonetagane.