Takosovi na Uciwai na Joritani

RAICA! era sa takosova tiko na Uciwai na Joritani na Isireli! Ia sa e vei ga na wai? E se qai sinai wale tu ga na wai ena vica na miniti sa oti, ni a tau tu vakalevu na uca. Ia sa maca! Era takoso tiko na Isireli ena qele mamaca, me vaka ga mai na Wasa Damudamu! Sa lako kece e vei na wai? Meda raica mada.

Nira sa lako tiko na Isireli mera sa takosova na Uciwai na Joritani, e vakaroti Josua o Jiova me tukuna vei ira: ‘Me ratou colata tiko e liu vei keda na bete na kato ni veiyalayalati. Ni tara ga na yavadratou na wai ena Joritani, ena mudu na drodro ni wai.’

Eratou sa qai colata na kato ni veiyalayalati na bete, ratou qai liu yani e matadra kece na tamata. Ni ratou yacova yani na bati ni Joritani e titobu qai kaukaua na kena drodro na wai. Ia ena gauna ga e tara kina na yavadratou na wai e tekivu mudu sara na kena drodro! E veivakurabuitaki dina! E tarova tu o Jiova na ulu ni wai. Sega ni dede sa sega tale ni qai dua na wai e kune ena uciwai!

Eratou colata tu na bete na kato ni veiyalayalati ena loma ni uciwai sa mamaca. Raici iratou mada ena iyaloyalo oqori. Ni ratou se tu ga e keri, era takoso kece na Isireli i tai adua ni uciwai!

Nira sa yaco kece i tai adua, e vakaroti Josua o Jiova me kaya sara vei ira e lewe 12 na tamata kaukaua: ‘Dou lai kauta mai e 12 na vatu mai na vanua eratou duri tu kina na bete. Dou bulia kina e dua na suva ena vanua dou na tiko kina ena bogi edai. Nira na taroga e muri na ibalebale ni vatu oqo na luvemudou, dou kaya ni a tarovi na drodro ni wai ena gauna e colati takoso tiko kina na kato ni veiyalayalati i Jiova ena Joritani. Dou na vakananuma tale na cakacaka mana ena vatu oqo!’ A tuvana tale ga o Josua e 12 na vatu ena boto ni uciwai mamaca ena vanua eratou a duri tu kina na bete.

Sa qai tukuna o Josua vei iratou na bete eratou colata tiko na kato ni veiyalayalati: ‘Dou lako tani mai na Joritani.’ Oti ga oya sa qai drodro tale na wai.