Vakabulai Ira na Tauvimate o Jisu

E VAKABULAI ira na tauvimate o Jisu ni veilakoyaki voli e veivanua. E robota sara ga na veikorokoro kei na tauni wavolita na itukutuku ni cakamana oqo. Era kau yani vei Jisu na lokiloki, mataboko, didivara, kei na vuqa tale era tauvimate tu. E qai vakabulai ira o koya.

Sa oti oqo e tolu na yabaki nona papitaisotaki Jisu o Joni. E tukuna tale ga o Jisu vei iratou na tisaipeli ni na lako i Jerusalemi. Ena lai vakamatei e kea, qai vakaturi tale. Ni se bera mada oqori e veivakabulai voli ga o Jisu.

Ena dua na siga a veivakavulici tiko o Jisu ena Siga ni Vakacecegu. Na siga ni Vakacecegu e nodra siga ni vakacegu na Jiu. Na yalewa o raica toka oqori e sa tauvimate tu ena loma ni 18 na yabaki, e sega ni rawa ni duri vakadodonu. E tarai koya gona o Jisu, mani vakabulai qai duri rawa tale!

E vakacudrui ira na iliuliu ni lotu na ka e cakava oqo o Jisu. E mani kaya mai e dua: ‘E ono na siga meda cakacaka kina. E rawa ni caka kina na veivakabulai, ia me kua ga ena Siga ni Vakacecegu.’

Ia e sauma o Jisu: ‘Oi kemudou na tamata ca. Dou sa dau lai vagunuva na nomudou asa ena Siga ni Vakacecegu. E sega beka ni kilikili me vakabulai tale ga ena Siga ni Vakacecegu na yalewa oqo ni tauvimate ena loma ni 18 na yabaki?’ E vakamadualaki ira sara ga na tamata ca oqo na isau ni taro i Jisu.

Oti oya sa qai lako o Jisu kei iratou na nona yapositolo i Jerusalemi. Ni ratou se tu ga ena taudaku ni tauni kei Jeriko, rau rogoca rawa e rua na dau kerekere mataboko ni sa gole siviti rau o Jisu. Rau qai kaila yani: ‘I Jisu, ni vukei keirau mai!’

Sa qai kacivi rau o Jisu me tarogi rau: ‘Na cava meu cakava vei kemudrau?’ Erau kaya: ‘Turaga, me rai na mata i keirau.’ Erau rai rawa tale ni tara na matadrau o Jisu! O kila na vuna e cakava kina o Jisu na veicakamana oqo? Baleta ni lomani ira na tamata qai vinakata mera vakabauti koya. E rawa sara ga nida vakadeitaka e ke ni gauna ena veiliutaki kina vakatui o Jisu ena sega tale ni dua e vuravura me na tauvimate.