Tabaivola Vakaivolatabu me Vakacaucautaki Kina na Kalou

Era kilai vinaka na iVakadinadina i Jiova ena levu sara na ivola era tabaka mera vunautaka kina na Matanitu ni Kalou. Mai na 1920 sara, sa dau vakayagataki ira na iVakadinadina era bole yani na Watch Tower Society mera cakacaka ena kena tabaki na ivola me veisoliyaki. E caka oqo me kua ni tao kina na kena tabaki na ivola vakaivolatabu, me vakabula ilavo tale ga.

E toroya cake, e vakalevutaka tale ga na isoqosoqo ena rauta na 70 na yabaki sa sivi na cakacaka ni kena taba na ivola vakaivolatabu, e tekivu mai Brooklyn, oti oya, sa qai dewa yani ina vica tale na matanitu. E tubu tiko ga na kedra iwiliwili na bole cakacaka ni o ira ga era vakayacora na cakacaka kece.

Ni sa voleka toka ni cava yani na veiyabaki ni 1970, sa mai sosomitaka na misini ni tabaivola makawa na icakacaka ni tabaivola e taurivaki kina na kompiuta. Na leqa e tiko ni misini ni tabaivola e vakayagataki raraba tu e yalani ga na levu ni vosa e rawa ni tabaivola kina. Ia na iSoqosoqo sa dau tabaivola voli ena rauta na 160 na vosa, qai laurai ni vinakati me levu tale na vosa.

Era mani kacivi e so mera bole yani mera vakadikeva na sala me buli kina ena kompiuta na porokaramu ena rawa kina na tabaivola ena vicasagavulu na vosa. E yaga sara na sasaga. Mani buli rawa na porokaramu e vakatokai na MEPS, e vakacurumi rawa kina ina kompiuta na matanivola, oti oya, me lai taba sara mai na veika e sa taipataki ina kompiuta. E rawa ni vakayagataki na porokaramu oqo me caka kina na tabaivola ena rauta na 210 na vosa. E levu tale na vosa e rawa ni vakuri.

Sa vakayagataki tu nikua ena sivia na 100 na matanitu na porokaramu ni MEPS me tabaki kina na ivola vakadewataki. Era sa vakavulici na dau cakacaka era bole mera yavalata, mera qarava tale ga na misini ni tabaivola oqo. Na iSoqosoqo sa tabaka tiko nikua na ivoladraudrau ena sivia na 120 na vosa ena 29 na matanitu, ia ena 8 vei ira na matanitu oqo, sa taba tale tiko ga kina na iVolatabu kei na ivoladabani.

Na cakacaka oqo e vinakati kina na tamata​—so mera volavola, so na dauvakadewa, so mera dikeva me kua na cala ena ka e volai, so mera tabaivola, so mera dabana, so tale mera vakauta yani na ka sa tabaki. E so mera qarava na tabana ni veivolavolai kei ira na ivavakoso. E so era tea na kakana, vakarautaka me laukana, sasamaki, sava isulu kei na so tale na cakacaka. Na itavi kece oqo era qarava na bole cakacaka nira soli ira vakarawarawa ena dui matanitu. Ena veiyasa i vuravura ena 1994, e rauta ni le 15,145 na bole cakacaka era veiqaravi voli ena dui valenivolavola, valenitabaivola, nodra bure na cakacaka, kei na iteitei ni isoqosoqo.

O cei o ira oqo? Era iVakadinadina yalayala kece i Jiova, na tagane kei na yalewa, dawai kei na vakawati, gone kei na qase. E so vei ira era sa yabaki 40, 50, se mani 60 sara ena cakacaka oqo. Na gauna lailai duadua era vakayagataka ena nodra ilesilesi e veimacawa ena kena ivakatautauvata e 44 na aua, qai vica tale na aua ke levu na cakacaka. Na yakavi kei na mua ni macawa era na vakayagataka ena kena vunautaki e veivale na itukutuku vinaka, kei na cakacaka tale e so vakaivavakoso.

Ena veiyasa i vuravura, e tiko na bure e vakatokai me Peceli, era vakaitikotiko ra vakani tale ga kina o ira na cakacaka oqo. E dau soli tale ga vei ira e dua na ilavo lailai me yaga vei ira ena nodra veilakoyaki ena cakacaka vakaitalatala kei na kena voli na iyaya lalai e so mera vakayagataka.

Mai na 1920, ra sa tabaka na bole cakacaka oqo e sivia na ciwanabilioni na iVolatabu, ivola, ivoladraudrau, kei na ivolacebaceba ena sivia na 200 na vosa me veisoli­yaki yani e vuravura taucoko. Era sa vakayacora tiko nodra itavi me kacivaki kina na itukutuku vinaka e sega ni oti rawa vei ira kece ga na veivanua, veimataqali, duivosavosa, kei na tamata.​—Vakatakila 14:6, 7.

• Na misini ni tabaivola cava sa tu vua na iSoqosoqo, na cava na kena yaga?

• O cei soti e cakava na cakacaka kece oqo, era bula rawa vakacava?

[iYaloyalo ena tabana e 24]

Nodra cakacaka voli na bole cakacaka ena itavi e so e tokoni kina na taba ni ivola vakaivolatabu ena kena vale, nodra bure na bole cakacaka, valenivolavola, kei na iteitei mai Brooklyn kei Wallkill, Niu Yoka, Mereke

[iYaloyalo ena tabana e 25]

O ira na bole cakacaka ena itavi e so e vauci sara ga kina, se tokoni kina na cakacaka ni taba iVolatabu kei na ivola vakaivolatabu

Sipeni

Jamani

Finiladi

Canada

Denmark

Sweden

Sauca Aferika

Brazil

Necaladi

Ositerelia