Wase 8

Na Cava e Yaco ena Gauna ni Mate?

1. Na cava era dau vakataroga na tamata me baleti ira na mate?

DE O SA vakila beka na lolosi ni a mate e dua o daulomana. O na lomabibi dina, o na veilecayaki tale ga! Sa qai dau tarogi kina: Na cava e yacova na tamata sa mate? E se bula tiko li ena dua na vanua? E rawa li vei ira na bula me ra na marau vata tale e vuravura kei ira sa mate?

2. Na cava e yacovi Atama na i matai ni tamata, ni sa mate?

² Me ra saumi na taro oqo, e yaga me kilai se cava a yacovi Atama ni sa mate. Ni sa valavala ca o koya, a tukuna na Kalou vua: “Ni ko sa kuvu ni qele ga, ia ko na suka tale mo kuvu ni qele.” (Vakatekivu 3:19) Vakasamataka na ibalebale ni ka oqo. Ni se bera ni buli Atama na Kalou mai na kuvu ni qele, a sega tu o koya. E sega sara ga ni bula. Ni sa mate o Atama, sa sega tale ni bula tiko me vaka ga mai liu.

3. (a) Na cava na mate? (b) Na cava e kaya na Dauvunau 9:5, 10 me baleta na ituvaki ni mate?

³ Na kena itukutukuni rawarawa ga ni mate na i basai ni bula. E vakaraitaka oqo na iVolatabu ena Dauvunau 9:5, 10. Ena iVolatabu Vakaviti, e kainaki kina ena tikina oqo: “Ni ra sa kila ko ira sa bula ni ra na mate: ia ko ira na mate era sa sega ni kila e dua na ka, a sa sega tale na kedrai voli; ni sa yali sara na kedrai vakananumi. A ka kecega sa vakaitavi kina na ligamu, mo kitaka e nomui gu; ni sa sega na cakacaka, se na vakasama, se na kila ka, se na vuku, e nai bulubulu, o koya ko sa lako tiko kina.”

4. (a) Na cava e yaco ena vakanananu ni tamata ni sa mate? (b) Ena vuku ni cava sa mudu kina na nona vakila na ka kece na tamata ni sa mate?

⁴ E kena i balebale ni sega na ka e vakila rawa se cakava rawa na mate. Sa oti nodra vakanananu, me vaka e kaya na iVolatabu: “Dou kakua ni vakararavi vei ira na turaga, se vua na luve ni tamata, ni sa sega vua na ka mo dou bula kina. Sa lako tani na [“yalona,” NW], a sa suka ko koya ki na kena qele; e na siga dina ko ya sa oti na ka e vakanananu kina.” (Same 146:3, 4) Ni sa mate na tamata, sa “lako tani” na yalona, o ya na nona i gu ni bula. Na i gu ni bula oqo ena yavalati tiko mai na nona cegu na tamata. Sa yali vakadua. Sa mai mudu kece kina na nona vakila na ka na tamata, me vaka na rogo, rai, tara, boi, kei na tovolea na ka, ni veika era yaco ga ena nona se vakasama rawa tiko. E kaya na iVolatabu ni o koya e mate, sa sega ni qai vakila tale e dua na ka.

5. (a) E vakaraitaka vakacava na iVolatabu ni rau tautauvata ga na tamata mate kei na manumanu mate? (b) Na cava na “yalo” e vakavuna tiko nodrau bula na tamata kei na manumanu?

⁵ Ni sa mate na manumanu kei na tamata, erau tautauvata ga ni rau sa sega ni qai vakila tale e dua na ka. Raica se vakaraitaka vakacava na iVolatabu na tikina oqo: “Me vaka sa mate oqo, sa mate vaka talega kina ko ya; io, sa dua vata ga [“na yalodra,” NW]; ka sa sega ni uasivi cake na tamata e na manumanu: ni sa ka wale kecega. Era sa lako kece ki na dua bauga na tikina; era sa kuvu-ni-soso kecega.” (Dauvunau 3:19, 20) Na “yalo” e bula kina na manumanu e bula tale ga kina na tamata. Ni sa lako tani na “yalo” se i gu tawarairai ni bula, rau sa lesu ruarua tale ki na kuvu ni soso na tamata kei na manumanu, na vanua ga rau a buli mai kina.

E MATE NA SOULU

6. E vakaraitaka vakacava na iVolatabu ni ra soulu na manumanu?

⁶ E so e kaya ni ka e vakaduiduitaka na tamata mai na manumanu, o ya ni tamata e tiko vua na soulu, ia na manumanu e sega. Ia, e kaya na Vakatekivu 1:20 kei na 30 (NW) ni Kalou e bulia na “soulu bula” me ra bula e loma ni wai, ni o ira tale ga na manumanu era “bula ni ra soulu.” E so na iVolatabu era sosomitaka na “soulu” ena veitikina oqo me “kabuli” se “bula,” ia era duavata ena i kuri ni nodra i vakamacala ni a kena vosa dina na “soulu.” E dua tale ga na tiki ni iVolatabu e kaya ni ra soulu na manumanu, na Tiko Voli Mai na Lekutu 31:28 (NW). E tukuni e keri me “dua na soulu mai na limanadrau na tamata, na bulumakau, na asa, kei na sipi.”

7. Na cava e kaya na iVolatabu me vakadinadinataka ni rau mate ruarua na soulu e tamata kei na soulu e manumanu?

⁷ Ni ra soulu na manumanu, ni ra sa mate sa mate na nodra soulu. Me vaka e kaya na iVolatabu: “Sa mate na [“soulu,” NW] kece ga sa tu e wasawasa.” (Vakatakila 16:3, VV) Vakaevei ga na soulu e tamata? Sa da kila mai na wase sa oti ni a sega ni bulia na tamata na Kalou vata kei na dua na soulu. Na tamata ga e soulu. Na ka ga eda kila, ni sa mate na tamata sa na mate tale ga na soulu. Sa dau tukuna vakavuqa na iVolatabu ni dina oqo. E sega ni kaya vakadua na iVolatabu ni soulu e sega ni mate rawa. E kaya na Same 22:29 ni “o ira kecega . . . era lako sobu ki na kuvu-ni-soso era na cuva vua. Io, ko koya ka sega ni vakabula rawa na [“nona soulu,” NW].” E vakamacalataka na Isikeli 18:4 kei na 20, “na [“soulu,” NW] ga sai valavala ca ena mate.” Ke o cega na Josua 10:28-39 (NW), o na kunea ni vakavitu na kena cavuti kina ni a vakamatei se vakarusai na soulu.

8. Eda kila vakacava ni soulu e tamata o Jisu Karisito a mate?

⁸ Ena dua na parofisai baleti Jisu Karisito e kaya kina na iVolatabu: “Sa solia oti na nona [“soulu,” NW] ki na mate . . . ka sa colata ko koya na nodrai valavala ca na lewe vuqa.” (Aisea 53:12) Na ivakavuvuli ni ivoli e vakadinadinataka ni a valavala ca e dua na soulu (o Atama), ia kevaka me ra voli lesu na tamata sa dodonu me mate e dua na soulu veirauti. Ena ‘nona solia nona soulu ki na mate’ a vakarautaka kina o Karisito na ivoli. Sa mate na soulu e tamata o Jisu.

9. Na cava na ibalebale ni vosa, ‘na yalo ena lesu tale vua na Kalou o koya a solia mai’?

⁹ Sa da qai raica ni duatani na “yalo” mai na soulu. Na yalo na noda igu ni bula. Na igu ni bula oqo e tiko ena sela yadua kece ni yagoda na tamata kei na manumanu. E yavalata tiko na i gu ni bula oqo na icegu. Na cava gona e vakaibalebaletaka na iVolatabu ni kaya, “sa na qai lesu na kuvu-ni-qele me qele tale . . . ia na yalo ena lesu tale vua na Kalou ko koya ka sa solia”? (Dauvunau 12:7) Ni sa yaco na mate sa qai lako tani na igu ni bula mai na sela yadua ni yago, sa qai tekivu luca na yago. Oqo e sega ni kena i balebale me sa biuti vuravura na igu ni bula ka lako ena liwalala vua na Kalou. Ia e vakaibalebaletaki ga na lesu ni yalo vua na Kalou, ni sa na vakatau ga vua na Kalou, na noda na bula tale mai muri. Ena nona kaukauwa duadua ga ena solia lesu mai kina o koya na yalo se igu ni bula, me rawa nida mai bula tale.​—Same 104:29, 30.

O LASARUSA—NA TAMATA A MATE SIGA VA

10. E dina sa mate o Lasarusa, ia na cava e kaya o Jisu me baleta na kena ituvaki?

¹⁰ Na ka e yacovi Lasarusa ni a mate siga va, eda kila kina na kedra i tuvaki na mate. A tukuna o Jisu vei ira nona tisaipeli: “Sa moce na wekada ko Lasarusa; ia ka’u sa lako me’u vakayadrati koya.” Era qai kaya nona tisaipeli: “Turaga, kevaka sa moce ga ko koya, ena bula.” Sa qai tukuna vakadodonu vei ira o Jisu: “Sa mate ko Lasarusa.” Na cava mada e kaya kina o Jisu ni moce o Lasarusa, ni sa mate dina? Me da raica mada.

11. Na cava a cakava o Jisu vei Lasarusa ni sa mate?

¹¹ Ni volekata yani na koro i Lasarusa o Jisu, a sotavi Marica sara, na ganei Lasarusa. Oti sa ra ia vata kei na le vuqa ki na ibulubulu a kotori kina o Lasarusa. E qaravatu qai sogolati ena dua na vatu. A kaya o Jisu: “Dou kauta tani na vatu.” A via tarova o Marica ni sa mate siga va o Lasarusa: “Turaga sa na bona ko koya.” Ia sa kau tani ga na vatu, qai kaci yani o Jisu: “Lasarusa, lako mai”! Sa qai lako mai! E curu mai e tautuba, ia e se viviraki tu ga ena isole ni mate. “Dou sereki koya, ka laiva me lako,” e kaya o Jisu.​—Joni 11:11-44.

12, 13. (a) Eda vakadeitaka vakacava ni a sega ni vakilai koya dina tu o Lasarusa ena gauna e mate tu kina? (b) Ena vuku ni cava e kaya kina o Jisu ni moce ga o Lasarusa, ni sa mate dina tu?

¹² Vakasamataka mada oqo: E vaka tu mada e vei o Lasarusa ena nona mate siga va o ya? A tiko beka mai lomalagi? Ni o koya e tamata vinaka. Ia a sega ni mai talanoataka na nona tiko mai lomalagi o Lasarusa, ni na vakayacora oqori ke a tiko dina mai kea. E sega, a mate dina tu o Lasarusa, me vaka ga sa tukuna oti o Jisu. Ia, na cava ga e kaya kina o Jisu vei iratou nona tisaipeli ni a moce ga o Lasarusa?

¹³ E kila tu o Jisu ni o Lasarusa sa sega ni qai vakila tale e dua na ka ni sa mate, me vaka e kaya na iVolatabu: “Ko ira na mate era sa sega ni kila e dua na ka.” (Dauvunau 9:5) Ia na tamata e bula tiko ena vakayadrati rawa mai na nona moce lutu. O koya gona, ena vakaraitaka o Jisu, ni na rawa ni vakayadrati Lasarusa, na nona itokani mai na mate ena kaukauwa e solia vua na Kalou.

14. Na noda kila na kaukauwa i Karisito me vakaturi ira cake na mate ena vakayavalati keda me da cakava na cava?

¹⁴ Ni moce lutu e dua, e sega ni nanuma tale e dua na ka. E vaka oqori o ira sa mate. Era sega ni vakila tale e dua na ka. Sa ra takali vakadua. Ia, ena gauna lokuci ni Kalou, o ira na mate sa voli ira oti na Kalou, era na vakaturi me ra bula tale. (Joni 5:28) E dodonu sara ga me yavalati keda na kila oqo me da saga me da rawata na veivakadonui ni Kalou. Kevaka eda cakava, ke da mani mate sara, ena nanumi keda tiko ga na Kalou qai vakalesui keda mai me da na bula tale.​—1 Cesalonaika 4:13, 14.

[iYaloyalo ena tabana e 76]

ATAMA—buli mai na kuvu ni qele . . . suka me kuvu ni qele

[iYaloyalo ena tabana e 78]

E vaka tu e vei na i tuvaki kei Lasarusa ni bera ni vakaturi koya o Jisu?