Wase 22

Kena Kilai na Lotu Dina

1. O cei era a lotu dina tiko ena imatai ni senitiuri?

E MATATA sara tu ga vakasigalevu se o cei era a lotu dina tiko ena imatai ni senitiuri. O ira na imuri i Jisu Karisito. O ira oqo era lewe kece ga ni dua na isoqosoqo Vakarisito. Vakacava edaidai? Era na kilai vakacava o ira era lotu dina tiko?

2. Era na kilai vakacava o ira na lotu dina tiko?

² Ni vakamacalataka na sala eda na vakayacora rawa kina oqo, e kaya o Jisu: “Dou na kilai ira e na vuadra. . . . Sa vuataka na vua vinaka na kau vinaka kecega, a sa vuataka na vua ca na kau ca. . . . E dina ga, dou na kilai ira e na vuadra.” (Maciu 7:16-20) Na vua vinaka cava o na namaka me ra vuataka na dauveiqaravi dina ni Kalou? Na cava e dodonu me ra tukuna tiko, me ra cakava tale tiko ga ena gauna oqo?

KENA VAKAROKOROKOTAKI NA YACA NI KALOU

3, 4. (a) Na cava na imatai ni ka e kerei ena Masu ni Turaga? (b) A vakarokorokotaka vakacava o Jisu na yaca ni Kalou?

³ Na ka era na cakava o ira era sokalou dina vua na Kalou ena salavata kei na Masu ni Turaga a vakavulici ira kina nona imuri o Jisu. Oqo na imatai ni ka a cavuta kina o Jisu: “Tama i keimami mai lomalagi, Me vakarokorokotaki na yacamuni.” E dua tale na vakadewa ni iVolatabu e vakadewataka vaka oqo: “Me dokai na yacamuni.” (Maciu 6:9, Jerusalem Bible) Na cava na kena ibalebale me vakarokorokotaki se me dokai na yaca ni Kalou? A vakayacora vakacava o Jisu?

⁴ E vakaraitaka o Jisu na sala a vakayacora kina ena gauna e tukuna kina ena masu vei tamana: “Au sa vakatakila na yacamuni vei ira na tamata ko ni sa solia mai vei au mai vuravura.” (Joni 17:6) Io, a vakatakila o Jisu na yaca ni Kalou o Jiova vei ira na tani. A vakayagataka tiko ga na yaca o ya. E kila o Jisu ni inaki nei Tamana me lagiti na Yacana e vuravura taucoko. Sa navuca gona kina o koya na ivakaraitaki ena kena vakatakilai na yaca o ya kei na kena dokai.​—Joni 12:28; Aisea 12:4, 5.

5. (a) E mai tu vakacava na i vavakoso Vakarisito ena vuku ni yaca ni Kalou? (b) Na cava me da cakava me da vakabulai kina?

⁵ E vakaraitaka na iVolatabu ni mai tu na i vavakoso dina Vakarisito ena vuku ni yaca ni Kalou. E vakamacalataka na i apositolo o Pita ni o koya na Kalou a kauti ira mai “eso na tamata maivei ira na veimatanitu tani, me tiko vei ira na yacana.” (Cakacaka 15:14) Sa dodonu kina vei ira na tamata ni Kalou me ra vakarokorokotaka na yacana, me ra qai vakatakila tale ga yani ki na vuravura taucoko. Na kilai ni yaca oqori e bibi me rawati kina na veivakabulai, ni kaya na iVolatabu: “Ni na bula ko ira vakaaduaga era sa masuta na yaca i Jiova.”​—Roma 10:13, 14.

6. (a) Era vakarokorokotaka tiko li e vuqa na matalotu edaidai na yaca ni Kalou? (b) E tiko li e so era vakadinadinataka voli na yaca ni Kalou?

⁶ Ia, o cei e edaidai e vakarokorokotaka tiko na yaca ni Kalou, e qai vakatakila yani e vuravura taucoko? Era sega ni dau vakayagataka e vuqa na matalotu na yaca i Jiova. E so era kauta laivi sara mada ga mai na nodra vakadewa ni iVolatabu. Ia, kevaka mo vosa vei ira na tani, o qai tukuni Jiova vakalevu ena nomu vakayagataka na yacana, na isoqosoqo cava era na nanuma ni o lewena? E dua ga na ilawalawa tamata era muria dina tiko na ivakaraitaki i Jisu ena ka oqo. Na inaki levu duadua ni nodra bula me ra qarava na Kalou, me ra vakadinadinataka tale ga na yacana me vaka a vakayacora o Jisu. Ena vuku ni ka oqo sa ra taurivaka kina na yaca vaka iVolatabu, “iVakadinadina i Jiova.”​—Aisea 43:10-12.

KENA KACIVAKI NA MATANITU NI KALOU

7. A vakaraitaka vakacava o Jisu na bibi ni Matanitu ni Kalou?

⁷ Ena Masu ni Turaga, a vakaraitaka tale ga kina o Jisu na bibi ni Matanitu ni Kalou. A vakavulici ira na tamata me ra masuta: “Me yaco mai na nomuni matanitu.” (Maciu 6:10, VV) E dau vakabibitaka wasoma o Jisu ni Matanitu ni Kalou na iwali duadua ga ni leqa ni kawatamata. E vakayacora oqo kei iratou na nona i apositolo ena nodratou vunautaka na matanitu ni Kalou vei ira na tamata, “e na veikoro” kei na “veivale.” (Luke 8:1; Cakacaka 5:42; 20:20) E usutu ni nodratou vunau kei na veivakavulici, na Matanitu ni Kalou.

8. A vakaraitaka vakacava o Jisu se na cava ena nodra itukutuku bibi na nona imuri dina ena “i otioti ni veisiga” oqo?

⁸ Vakacava ena noda gauna? Na cava na usutu levu ni nodra ivakavuvuli na isoqosoqo Vakarisito dina ni Kalou? Ena nona parofisai tiko o Jisu me baleta na “i otioti ni veisiga” oqo, a kaya kina: “Ka na vunautaki mada na itukutuku vinaka ni matanitu ki na vuravura taucoko, me ivakadinadina ki na veivanua kece ga, sa na qai yaco mai na i vakataotioti.” (Maciu 24:14, VV) O koya gona, e dodonu me nodra itukutuku bibi na tamata ni Kalou edaidai na Matanitu ni Kalou.

9. O cei era vunautaka tiko edaidai na itukutuku ni Matanitu ni Kalo u?

⁹ Tarogi iko mada: Ke dua e lako mai ki nomu vale, qai mai vakamacalataka na Matanitu ni Kalou me inuinui duadua ga ni kawatamata, na isoqosoqo cava o na tukuna ni lewena o koya? Sa ra mai veitalanoataka li kei iko na matanitu ni Kalou e so mai na dua tale na lotu era sega ni iVakadinadina i Jiova? Me rawa vakacava, ni vuqa era sega tu mada ga ni kila se cava na matanitu ni Kalou! Era sega ni tukuna e dua na ka me baleta na matanitu ni Kalou. Ia, e itukutuku bibi dina e tarai vuravura na itukutuku ni matanitu o ya. A tukuna vakailiu na parofita o Taniela ni matanitu oqo ‘ena vurumemeataka ka vakaotia na veimatanitu kece, sa na qai lewai vuravura duadua ga.’​—Taniela 2:44.

KENA DOKAI NA VOSA NI KALOU

10. E vakaraitaka vakacava o Jisu na nona doka na Vosa ni Kalou?

¹⁰ Era na kilai rawa tale ga na lotu dina ena ivalavala ni nodra raica na iVolatabu. E dau vakaraitaka e veigauna kece o Jisu na nona doka na Vosa ni Kalou. E dau vakaliuca e veigauna me i vurevure ni nona vakatulewataka na ka. (Maciu 4:4, 7, 10; 19:4-6) A vakaraitaka tale ga o Jisu ni doka na iVolatabu ena nona muria na kena ivakavuvuli. A sega ni beca vakadua na iVolatabu. Ia, a vakacalai ira e sega ni salavata na nodra ivakavuvuli kei na iVolatabu, era saga tale ga me ra vakawaicalataka na ivakavuvuli vaka iVolatabu ena nodra vakaliuca ga na nodra nanuma.​—Marika 7:9-13.

11. Era dau raica tu vakacava na Vosa ni Kalou na veimatalotu?

¹¹ E vakacava sara mada nodra vakamuria na ivakaraitaki i Karisito na lotu ni Veivanua Vakarisito ena tikina oqo? Era doka li na iVolatabu? E vuqa na i talatala edaidai era sega ni vakabauta na itukutuku ni iVolatabu ni nona yaco me ivalavala ca o Atama, na waluvu ena siga i Noa, o Jona kei na ika levu, kei na so tale. Era kaya tale ga ni a bula mai vakaidewadewa na tamata, e sega ni a buli koya na Kalou. Era sa vakauqeta tiko li na kena dokai na Vosa ni Kalou ena sala oqori? Era kaya e so na i liuliu ni lotu ni sega ni cala na veiyacovi e taudaku ni vakawati, e sega ni cala tale ga na veiyacovi vakatagane se vakayalewa, se vua e dua me levu tu na watina. O na kaya beka ni ra vakauqeti ira tiko na tamata me ra taurivaka na iVolatabu me nodra i dusidusi? Era sega sara ga nimuria tiko na ivakaraitaki ni Luve ni Kalou kei ira na nona i apositolo.​—Maciu 15:18, 19; Roma 1:24-27.

12. (a) Na cava e sega ni taleitaka kina na Kalou na nodra sokalou e vuqa, dina ga ni tu vei ira na iVolatabu? (b) Kevaka era vakatarai me ra tiko ga ena lotu o ira era nakita nodra caka cala, na cava eda na kaya kina?

¹² E so na lewe ni lotu era dau vulica sara mada ga na nodra iVolatabu, ia e vakaraitaki ena nodra i tovo ni bula ni ra sega tiko nimuria. E kaya na iVolatabu me baleti ira na tamata vaka o ya: “Era kaya era sa kila na Kalou: ia e na nodraivalavala era sa cakitaka.” (Taito 1:16; 2 Timoci 3:5) Ke ra dokai tu ga ena nodra duilotu o ira era dauveimauilavo, daumateni, kei na cala tale e so, na cava e vakaraitaka oqo? Oqo e ivakadinadina ni sega ni vakadonuya na Kalou na nodra isoqosoqo ni lotu.​—1 Korinica 5:11-13.

13. Na digidigi bibi cava me na vakayacora e dua ke kunea ni veicalati kei na iVolatabu na ivakavuvuli ni nona lotu?

¹³ Kevaka o a vakasamataki ira na wase taumada ni i vola oqo, o kauwaitaka tale ga na tiki ni iVolatabu era okati kina, o sa na kila na yavu ni ivakavuvuli ena Vosa ni Kalou. Ia vakacava ke veicalati na ivakavuvuli ni isoqosoqo ni lotu o lewena tiko kei na Vosa ni Kalou? E leqa levu dina oqori. Na leqa e tiko o ya se mo digia na dina vaka iVolatabu, se mo cata, mo muria tiko ga kina na ivakavuvuli e sega ni tokona na iVolatabu. Na ka o cakava e dodonu me nomu digidigi ga vakataki iko. Ia, e dodonu mo lewa vakayalomatua. Ni nomu digidigi ena vakatau kina na nona vakadonui iko na Kalou, kei na nomu rawata na bula tawamudu ena parataisi e vuravura.

WASEI TANI MAI VURAVURA

14. (a) Na cava e dua tale na ka e kilai kina na lotu dina? (b) Na cava e rui bibi kina me ra yacova na i vakatagedegede oqo na dausokalou dina?

¹⁴ Oqo e dua tale na ka era na kilai kina na lotu dina tiko, me vaka a kaya o Jisu, “ni ra sa sega ni vakavuravura.” (Joni 17:14) E kena ibalebale oqo ni o ira na dausokalou dina era na wasei ira tani tiko ga mai na vuravura ca oqo kei na kena ogaoga. A sega ni vinakata o Jisu me i liuliu vakapolitiki. (Joni 6:15) O sa rawa ni liaca na vuna e rui bibi kina nomu wasei iko tani mai vuravura ena nomu kila ni tukuna na iVolatabu ni o Setani e lewa tu na vuravura. (Joni 12:31; 2 Korinica 4:4) E vakabibitaki tale na ka oqo ni tukuna na iVolatabu: “Sa veicati kei na Kalou na veivinakati kei vuravura.”​—Jemesa 4:4.

15. (a) Era vakaraitaka li na lotu o kila “ni ra sa sega ni vakavuravura”? (b) O kila beka e dua na lotu e vakayacora tiko oqo?

¹⁵ Era vakaraitaka li na veimatalotu ena vanua o vakaitikotiko kina ni ra raica vakatitobu na veika oqo? Era vakaraitaki ira li na i liuliu ni lotu kei ira na nodra lewe ni lotu “ni ra sa sega ni vakavuravura”? Se ra vakaitavi sara tiko ga ena boletaki vanua, ena veika vakapolitiki, kei na veivakaduiduitaki e yaco tu e vuravura? E sega ni dredre me ra saumi na taro oqo, ni sa kilai levu na nodra cakacaka na veimatalotu. Ena yasana kadua, e kilai rawarawa tale ga na nodra cakacaka na iVakadinadina i Jiova. Nomu vakayacora oqo, o na qai raica kina ni ra vakamuria dina tiko na ivakaraitaki i Karisito kei na nona imuri taumada ena nodra wasei ira tani mai vuravura, na kena ogaoga vakapolitiki, kei na kena i tovo ni nanumi koya ga, na i tovo dukadukali, kei na ivalavala kaukauwa.​—1 Joni 2:15-17.

VEILOMANI VAKATAKI IRA

16. Na cava e dua na ka era na kilai levu kina na tisaipeli dina i Karisito?

¹⁶ E dua na ka era na kilai levu kina na tisaipeli dina i Karisito na nodra veilomani. A kaya o Jisu: “A ka oqo era na kila kina na tamata kecega ni dou sa noqu tisaipeli, kevaka dou sa veilomani.” (Joni 13:35) E kunei beka na loloma oqo ena isoqosoqo ni lotu o kila? Me kena ivakaraitaki, na cava era cakava ke laki vala na matanitu era vakaitikotiko kina?

17. Ena vuku ni kena gadrevi me vakaraitaki na veilomani, na cava e laurai me baleti ira na isoqosoqo ni veimatalotu kei ira na lewena?

¹⁷ O kila na ka e dau yaco. Ena nodra i vakaro na i liuliu vakavuravura, era lako yani ki na buca ni ivalu na lewe ni isoqosoqo ni veimatalotu me ra laki vakamatei ira era vakabauta vata mai na dua tale na vanua. O ira na lotu Katolika era sa qai vakamatei ira na lotu Katolika, o ira na veilotu Vukitani era vakamatei ira na veilotu Vukitani, o ira na Musulomani tale ga era vakamatei ira na Musulomani. O nanuma li ni salavata kei na Vosa ni Kalou na ivalavala vaka o ya, e salavata tale beka ga kei na vua ni yalo ni Kalou?​—1 Joni 3:10-12.

18. E vakacava na nodra veilomani na iVakadinadina i Jiova?

¹⁸ E vakacava na nodra dau veilomani na iVakadinadina i Jiova? Era sega nimuria na nodra ivalavala na veimatalotu vakavuravura. Era sega ni laki veivakamatematei vaka vakabauta vata ena buca ni ivalu. Era sega ni dau veivakaisini baleta ni ra sega ni kaya tiko, “Au sa lomana na Kalou,” me ra qai cati ira tiko na tacidra mai na dua tani na vanua, yavusa, se kawa. (1 Joni 4:20, 21) Ia era vakaraitaka na loloma ena so tale na sala. Ena sala cava? Ena nodra veimaliwai kei ira na tani kei na nodra sasaga vakayalololoma me ra vukei ira me ra kila na Kalou.​—Kalatia 6:10.

DUA BAU GA NA LOTU DINA

19. E dodonu vakacava, e vaka iVolatabu tale ga vakacava, me tukuni ni dua bau ga na lotu dina?

¹⁹ Sa dodonu ga me dua bau ga na lotu dina. Oqo e donu vinaka, ni Kalou dina ‘e sega ni Kalou ni veisei, e vu ni vakacegu ga.’ (1 Korinica 14:33) Na iVolatabu mada ga e kaya ni “dua bauga na vakabauta.” (Efeso 4:5) O cei gona era lotu dina tiko edaidai?

20. (a) Mai na ivakadinadina e kune, o cei e dusi ira na i vola oqo ni ra daulotu dina edaidai? (b) O vakabauta li o ya? (c) Na sala uasivi duadua cava o na kilai ira vinaka kina na iVakadinadina i Jiova?

²⁰ Keitou sega ni tuvakasuka me keitou kaya ni o ya o ira na iVakadinadina i Jiova. Mo vakadinata oqo, keitou sureti iko mo kilai ira vinaka. Na sala uasivi duadua mo vakayacora kina oqo ena nomu tikova na nodra soqoni ena Kingdom Hall ni iVakadinadina i Jiova. E vakaraitaka na iVolatabu ni sokalou dina e veivakacegui ena gauna oqo, e dolava tale ga na sala mo rawata kina na bula tawamudu ena parataisi e vuravura. O koya gona, ena yaga dina vei iko mo veikilai kei ira. (Vakarua 30:19, 20) Keitou marautaka mo mai vakayacora vaka kina. Na cava o sega ni tekivu sara ga kina oqo?

[iYaloyalo ena tabana e 185]

Kevaka mo vosa vua e dua me baleti Jiova kei na nona matanitu, na lotu cava ena nanuma ni o lewena?

[iYaloyalo ena tabana e 186]

E doka beka e dua na Vosa ni Kalou ke sega ni vakaitovotaki koya kina?

[iYaloyalo ena tabana e 188, 189]

A cata o Jisu me i liuliu vakapolitiki

[iYaloyalo ena tabana e 190]

O sa sureti mo mai tikova na nodra soqoni na iVakadinadina i Jiova