Wase e 1

iTukutuku mai Lomalagi

E DINA oqo ni i Vola Tabu taucoko, e i tukutuku mai lomalagi, e a vakarautaka na Tamada vakalomalagi me da vakavulici kina. Ia, a vakasavuya mai ka rauta ni 2,000 na yabaki sa oti e dua na agilosi “sa dautu ena mata ni Kalou” e rua na i tukutuku bibi. Ko Keperieli na yacana. Me da dikeva mada na i tuvaki ni veika e yaco ena rua na veisikovi bibi oqo e vuravura.

A yaco oqo ena yabaki 3 B.S.K. Ena veidelana mai Jutia, rairai sega ni yawa sara mai Jerusalemi, e tiko voli kina na bete i Jiova, ko Sakaraia na yacana. E sa qase sara o koya, ka vakatalega kina na watina ko Ilisapeci. E rau sega ni vakaluveni. Sa gauna oqo i Sakaraia me vakayacora nona cakacaka vakabete ena valenisoro ni Kalou mai Jerusalemi. Vakasauri na nona sa rairai ko Keperieli ena yasana i matau ni i cabocabo ni ka boi vinaka.

E tuburi Sakaraia na rere levu. Ia e qai vakaceguya ko Keperieli ni kaya, “Kakua ni rere, Sakaraia; sa rogoci na nomu masu; ka na vakasucuma e dua na luvemu-tagane ko Ilisapeci na watimu, ia ko na vakayacani koya ko Joni.” E tomana ko Keperieli ni na yaco ko Joni me “levu ena mata i Jiova” ka me “vakarautaka vei Jiova na tamata me ra qai nona.”

Ia, e sega ni vakabauta rawa ko Sakaraia. Na kena i rairai ni rui ka dredre me vakaluveni rawa o koya kei Ilisapeci ena yabaki ni nodrau bula. Sa qai tukuna vua ko Keperieli: “Ko na galu ga, ko na sega ni vosa rawa, me yaco mada na siga ena vakayacori kina na veika oqo, ni ko sa sega ni vakadinata na noqu vosa.”

Io, ena gauna vata oqori era sa veinanuyaka na tamata mai tautuba na vuna e rui dede kina ko Sakaraia e loma ni valenisoro. Ni curu mai tuba o koya, sa sega ni vosa rawa vei ira ka vosa dusidusi ga e ligana, sa ra qai kila ni a raica o koya e dua na raivotu.

Ni sa oti na cakacaka i Sakaraia mai na valenisoro, sa lesu yani ki nodratou. Sega ni dede mai na gauna o ya sa qai vakayacori​—⁠ni sa kunekune ko Ilisapeci! Ena gauna e waraka voli kina na gauna ni nona vakasucu, e vula lima nona vunitaki koya voli e vale vei ira na tamata ko Ilisapeci.

Sa rairai tale ko Keperieli. Ia e laki vosa vei cei? E vosa vua e dua na goneyalewa e se bera ni vakamau mai na koro ko Nasareci. Na i tukutuku cava ena laki vakasavuya oqo? Rogoca mada! “Ko sa kune loloma vua na Kalou,” e tukuna ko Keperieli vei Meri. “Raica, ko na kunekune, ko na vakasucuma talega e dua na gonetagane; ia mo vakayacani koya ko Jisu.” Kuria ko Keperieli: “Ena levu ko koya, ka na vakatokai na Luve i Koya sa cecere sara; . . . ena lewa ko koya na mataqali i Jekope ka sega ni mudu; ena sega talega ni oti na nona matanitu.”

Eda rawa ni kila ni vakila ko Keperieli ni i tavi dokai na nona vakasavuya na i tukutuku e rua oqo. Ia na noda wilika e vuqa na ka me baleti Joni kei Jisu, eda na qai raica vinaka na vuna e rui bibi kina na i tukutuku e rua oqo mai lomalagi. 2 Timoci 3:16; Luke 1:​5-33.

▪ Na i tukutuku bibi cava e rua a vakasavui mai lomalagi?

▪ O cei e vakasavuya yani na i tukutuku, ia a laki vakasavui vei cei?

▪ A cava e rui dredre me vakabauti kina na i tukutuku?