Wase e 2

Dokai ni Bera Nona Sucu

NI TUKUNA oti na agilosi ko Keperieli vua na goneyalewa ko Meri ni na vakasucuma e dua na gonetagane ka na yaco me tui tawamudu, sa qai taroga ko Meri: “Ena yaco vakabekaevei na ka oqo, ni’u sa sega ni veiyacovi kaya e dua na tagane?”

“Ena lako sobu mai vei iko na yalo tabu,” e vakamacalataka ko Keperieli, “ena vakarurugi iko talega na kaukauwa i Koya sa cecere sara. Ko koya ena sucu mai vei iko ena vakatokai me ka tabu na Luve ni Kalou.”

Me vukei Meri me vakabauta rawa na nona i tukutuku, sa qai tomana ko Keperieli: “Ka raica, na dauvemu ko Ilisapeci, sa kunekunetaka talega e dua na gonetagane, ni sa qase; ia oqo sa kenai kaono ni vula, ko koya sa vakatokai e yava. Ni na sega ni dredre vua na Kalou e dua na ka.”

Sa vakadinata na vosa i Keperieli ko Meri. Ia e sauma vakacava o koya? “Raica na vada ni Turaga,” e tukuna o koya. “Me yaco ga vei au me vaka na nomuni vosa.”

Ni lako tani ga ko Keperieli, sa vakasosolo sara ko Meri me laki sikovi Ilisapeci ka tiko vata kei watina, ko Sakaraia ena colo ni dua na koro mai Jutia. Oqo e bau dua toka na i lakolako balavu sara mai Nasareci na koro i Meri, ka rauta ni tolu se va na siga na kena lakovi.

Sa tadu yani ko Meri ena vale i Sakaraia, e curu yani o koya ka veikidavaki. Sa qai vakasinaiti ena yalo tabu ko Ilisapeci, ka kaya vei Meri: “Ko sa kalougata vakalevu vei ira na yalewa tani, a sa kalougata na vua ni ketemu. A sa vakaevei na ka oqo vei au, ni sa lako mai vei au na tinana na noqu Turaga? Ka raica, ni sa rorogo e daligaqu na vosa ni nomu veikidavaki, sa rika e na reki na gone e na ketequ.”

Ena nona rogoca oqo, sa qai sauma lesu ko Meri ena yalo ni vakavinavinaka: “Sa vakalagilagi Jiova na yaloqu, a sa reki na yaloqu vua na Kalou na noqui Vakabula. Ni sa lomana na nona vada ni sa dravudravua: Ka raica, mai na gauna oqo ena kaya nai tabatamata kecega ni’u sa kalougata. Ni sa cakava na ka levu eso vei au ko Koya sa qaqa.” Ia, veitalia ga na veika kece a vakaraitaki vua ena nona lomani, a vagolea vakadodonu na vakarokoroko kece ko Meri me cabori vua na Kalou. “Sa dokai na yacana,” e kaya o koya, “A sa tu na nona loloma vei ira sa rerevaki koya, ka yacova nai tabatamata e vuqa.”

E tomana tiko nona vakacaucautaka na Kalou ko Meri ena nona sere uqeti ni parofisai, ka vaka: “Sa kaukauwa na cakacaka ni ligana; Sa dui vakasesei ira na viavialevu ko koya e na vuku ni nanuma ni yalodra. Sa vakasivoi ira na kaukauwa mai na nodrai tikotiko, A sa vakaceceretaki ira era tamata lalai. Sa vakamamautaki ira era sa viakana e na ka vinaka; A sa vakatalai ira wale era vutuniyau. Sa vukei ira na nona tamata na Isireli, ni sa vakananuma na loloma; (Me vaka na nona vosa vei ira na noda qase,) Vei Eparaama, kei na nona kawa ka sega ni mudu.”

E rauta ni vula tolu nona tiko vata kei Ilisapeci ko Meri, ia e sega ni vakabekataki ni a vukei Ilisapeci vakalevu sara ena i otioti ni macawa e bukete voli kina. E rui ka vinaka dina na nodrau mai tiko vata na yalewa e rua oqo ena gauna kalougata ni nodrau bula ni rau sa bukete tu ena kaukauwa ni Kalou!

O bau vakila li na veidokadokai a soli vei Jisu ni bera nona sucu? E vakatokai koya ko Ilisapeci me “noqu Turaga,” a rika na luvena e se bera ni sucu ena levu ni marau ena i matai ni gauna me qai rairai yani vua ko Meri. Ena dua tale na yasana, e muri, eda na qai raica ni a lailai na nodra dokai Meri kei na gone me qai sucu e so tale. Luke 1:​26-56.

▪ Na cava a kaya ko Keperieli me vukei Meri me rawa ni kila na i valavala ni nona bukete?

▪ E dokai vakacava ko Jisu ni bera nona sucu?

▪ Na cava e kaya ko Meri ena sere ni parofisai ni vakacaucautaka na Kalou?

▪ E vakacava na balavu ni nona tiko vata kei Ilisapeci ko Meri, ia e veiganiti vakacava na nona tiko vata kei Ilisapeci ko Meri ena gauna oqo?