Wase e 8
Drovaka na iLiuliu Dauveivakatotogani
SA VAKAYADRATI Meri ko Josefa ka tukuna vua na i tukutuku vakatotolotaki. A se qai rairai oti ga vua na agilosi i Jiova, ka kaya: “Mo cavu tu, mo kauta na gone lailai kei tinana, ka dro ki Ijipita, ka waraka kina na noqu vosa vei iko; ni vakasaqara na gone lailai ko Eroti me vakamatea.”
Eratou vuki totolo na lewe tolu ka dro yani. Ia e veidonumaki vinaka, ni qai kila ko Eroti ni ra vakaisini koya na dauraimata ni lomalagi ni ra sa biu vanua oti. Nanuma tiko, ni a dodonu me ra tukuna lesu vua ni ra sa kunei Jisu. E curumi Eroti na cudru waqawaqa. Ni saga me vakamatei Jisu, sa qai solia na i vakaro me ra vakamatei na gonetagane lalai kece mai Peceliema kei na kena veiyasana kecega era yabaki yarua ka lailai sobu. E yavutaka na yabaki oqo ena gauna a tarogi ira kina na dauraimata ni lomalagi mai Natuicake.
E rui ka rerevaki me raici na nodra vakamatei na gonetagane lalai! Era curubotea yani na veivale yadua na sotia i Eroti. Ni ra kunea e dua na gonetagane lailai, era kaliraka vakaukauwa tani mai na liga i tinana. Eda sega ni kila rawa se ra lewe vica na gone dramidrami era a vakamatea, ia na qoqolou kei na nodra tagi ni somate na tina e sa vakayacori kina e dua na parofisai ena i Vola Tabu mai vei Jeremaia na parofita ni Kalou.
Ena gauna vata oqori, sa ratou yaco bula yani ki Ijipita ko Josefa kei rau nona veiluveni, ka vakaitikotiko kina ena gauna oqo. Ia ena dua na bogi e baci rairai tale ena dua na tadra vei Josefa na agilosi i Jiova. “Cavu tu, mo kauta na gone lailai kei tinana,” e kaya na agilosi, “ka lako ki na nodra vanua na Isireli: ni ra sa mate ko ira sa vakasaqara na gone me ra vakamatea.” Me i vakayaco ni dua tale na parofisai ena i Vola Tabu e kaya ni na kacivi tani mai Ijipita na Luve ni Kalou, eratou sa qai lesu yani ki na nodratou vanua na veiluveni.
E rairai loma i Josefa me sa vakaitikotiko mai Jutia, na vanua eratou a tiko voli kina mai na koro ko Peceliema ni bera nodratou dro ki Ijipita. Ia sa rogoca ko Josefa ni sa tui tiko mai Jutia na luvetagane ca i Eroti ko Arikeleo, ena dua tale na tadra sa vakasala vua ko Jiova ena vuku ni ka rerevaki ena rawa ni sotavi. Sa qai lako yani ko Josefa kei rau nona veiluveni vaka ki na vualiku ka laki tiko vakadua ena koro ko Nasareci mai Kalili. Ena yasayasa oqo e yawa sara mai na vanua ni nodra bula vakalotu na Jiu, na vanua e laki susugi kina ko Jisu. Maciu 2:13-23; Jeremaia 31:15; Osea 11:1.
▪ Ni sega ni ra laki tukutuku lesu na dauraimata ni lomalagi, na ka rerevaki cava e qai cakava ko Tui Eroti, ia a taqomaki vakacava ko Jisu?
▪ Nona lesu mai Ijipita, a cava e sega ni tiko tale kina mai Peceliema ko Josefa?
▪ Na veiparofisai cava ena i Vola Tabu a qai vakayacori ena gauna oqo?