Wase e 10

iLakolako ki Jerusalemi

SA VULA i tubutubu. Ia sa kena gauna oqo ki na vuvale i Josefa, kei na nodratou veikilai kei na wekadratou, me ra lako yani ena i lakolako vakayabaki ni vula i tubutubu ki Jerusalemi me ra laki solevutaka na Lakosivia. Nodra taubaletaka na i lakolako ka rauta ni 100 na kilomita, e ka marautaki. E sa yabaki 12 oqo ko Jisu, ka vakanamata ena veika lavotaki ka vauca na solevu.

Na Lakosivia vei Jisu kei na nona vuvale, e sega ni soqo siga dua ga. Eratou tikova talega na Solevu ni Keke Sega ni Vakaleveni siga vitu ka tarava, ni ratou okata talega oqori me tiki ni gauna ni Lakosivia. E rua taucoko na macawa e taura na nodratou i lakolako mai Nasareci kei na nodratou tiko voli mai Jerusalemi. Ia ena yabaki oqo, ni dua tale na ka e vauci Jisu, e balavu kina na nodratou tiko voli mai Jerusalemi.

Sa qai kilai na leqa ena nodratou lesu mai Jerusalemi. E rau nanuma ga ko Josefa kei Meri ni ko Jisu e maliwai ira tiko na wekadrau kei na nodrau veikilai era lako vata tiko. Ia a sega ni laurai ni ratou sa mai cegu ni sa bogi na vanua, e rau sa qai lako ka vakasaqarai koya vei ira na nodrau veikilai era lako vata tiko ena i lakolako oqo. E sega ni bau kunei. Rau sa qai lesu tale ki Jerusalemi ko Josefa kei Meri me rau laki vakasaqarai koya mai kea.

E dua na siga taucoko e rau vakasaqarai koya voli kina, ka sega ni rau kunei koya. Na i karua ni siga e rau sega talega ni kunei koya. Sa qai yaco ena i katolu ni siga, e rau sa qai lako ki na valenisoro. Ena vanua oqori, ena loma ni dua na kena vale ni soqo, e rau qai kunei Jisu ni dabe maliwai ira nodra qasenivuli na Jiu, e vakarogoci ira tiko ka vakatarogi ira talega.

“Na luvequ, ko sai valavala vakaoqo vei keirau e na vuku ni cava?” e tarogi koya ko Meri. “Raica, keirau kei tamamu keirau sa vakasaqarai iko ka sa rarawa tiko.”

A kurabui ko Jisu ni rau a sega ni kila na vanua me rau kunei koya kina. “E na cava drau sa vakasaqarai au [kina]?” e taroga ko koya. “Drau sa sega beka ni kila ni sa kilikili kei au me’u tiko e na vale nei Tamaqu?”

E sega ni kila rawa ko Jisu na vuna e rau sega ni kila kina na nona i tubutubu na veika oqo. Ena ka oqo, sa qai lesu vata kei rau na nona i tubutubu ko Jisu ka talairawarawa tikoga vei rau. Sa tubu cake ena vuku ka vakayago talega, ka vinakati koya vakalevu tikoga na Kalou kei ira talega na tamata. Io, me tekivu sara mai na gauna e se gone voli kina ko Jisu, sa biuta koto o koya e dua na i vakaraitaki vinaka e sega mai na nona vakasaqara ga na veika vakayalo ia, e vakatalega kina na nona dokai rau na nona i tubutubu. Luke 2:​40-52; 22:⁠7.

▪ Na i lakolako cava ena vula i tubutubu e daulakova wasoma ko Jisu kei iratou nona vuvale, ia e vakacava na kena balavu?

▪ Na cava e sotavi ena nodratou i lakolako ni sa yabaki 12 ko Jisu?

▪ Na i vakaraitaki cava e biuta koto ko Jisu vei ira na i tabagone edaidai?