Wase e 14

O Iratou na iSevu ni Tisaipeli i Jisu

NI OTI e 40 na siga na nona tiko voli ena vanua liwa, sa qai lesu ko Jisu vei Joni, o koya a papitaisotaki koya. Ni sa lako tiko yani, a rairai dusi koya ko Joni vei ira era tiko voli e kea ka kaya: “Raica, na Lami ni Kalou, ko koya sa kauta tani na nodrai valavala ca na kai vuravura! Sai koya oqo ka’u a tukuna, Sa muri au e dua na tamata, sa uasivi cake vei au; ni sa liu vei keirau.” E dina ga ni qase cake ko Joni vei Jisu na tavalena, e kila ko Joni ni ko Jisu e bula e liu vua ena nona a bula vakayalo voli mai lomalagi.

Ia, ena vica na macawa yani e liu ni a mai papitaiso ko Jisu vei Joni, a rairai sega tu ni vakadeitaka sara o koya ni na yaco me Mesaia ko Jisu. “Ia ka’u a sega ni kilai koya,” e tusanaka ko Joni, “ia me ra kilai koya ko ira na Isireli, ko koya oqo ka’u sa lako mai kina ka veipapitaisotaki e na wai.”

Sa qai tomana ena nona vakamacalataka ko Joni vei ira era rogoci koya tiko na veika a yaco ni sa papitaiso ko Jisu: “Au a raica na yalo tabu ni sa lako sobu mai lomalagi me vaka na ruve, a sa mai toka vua: ia ka’u a sega ni kilai koya eliu: ia ko koya sa talai au mai me’u veipapitaisotaki e na wai, sa kaya ga vei au, O koya ko na raica ni sa lako sobu kina na yalo tabu, a sa mai toka vua, sai koya oqo sa veipapitaisotaki e na yalo tabu. Ia ka’u a raica, ka tukuna ni sai koya oqo na Luve ni Kalou.”

Ena siga ka tarava sa duri tu ko Joni kei na lewe rua na nona tisaipeli. Ni baci toro voleka mai ko Jisu, sa kaya o koya: “Raica na Lami ni Kalou!” Ena ka oqo e rau sa muri Jisu kina na lewe rua oqo na tisaipeli i Joni na Dauveipapitaiso. E dua vei rau ko Adriu, ia na kena i karua e rairai beka na tamata ka volatukutukutaka na veika oqo, na yacana talega ko Joni. Ko Joni oqo, e vakatakilai ni tavalei Jisu talega, e rairai luve i Salome na taci Meri.

Ni sa raica ko Jisu ni rau muri koya tiko ko Adriu kei Joni, e qai taroga: “A cava drau sa vakasaqara?”

“Rapai,” e rau kaya, “ko sa tiko maivei?”

“Lako mai ka raica,” e sauma yani ko Jisu.

E rauta na va na kaloko ena yakavisiga, ka rau tiko vata kei Jisu ko Adriu kei Joni ena vo ni siga oqori. Ni oti oqori sa qai tuburi Adriu nona marautaka ka lako vakariri yani me vakasaqarai tacina, na yacana ko Pita. “Keitou sa kunea na Mesaia,” e tukuna o koya vua. Sa qai kauti Pita vei Jisu. E rairai sotavi Jemesa na tacina ena gauna vata oqori ko Joni, ka kauti koya vei Jisu; ia me vaka ga na nona i tovo, e sega ni vola ko Joni na i tukutuku oqo me baleti koya ena nona Kosipeli.

E kunei Filipi, e dua na kai Peciseita ko Jisu ena siga ka tarava. Na koro o ya e nodrau koro talega ko Pita kei Adriu. Sa qai sureti koya: “Muri au.”

Sa qai kunei Nacanieli ko Filipi, e vakatokai talega o koya me ko Pacolomiu, ka vaka: “Keitou sa kunei koya sa volavola kina ko Mosese e na vunau, kei ira talega na parofita, ko Jisu na kai Nasareci, a luve i Josefa.” E vakatitiqataka ko Nacanieli. Sa qai taroga o koya, “E tubu rawa beka mai Nasareci e dua na ka vinaka?”

“Lako mai mo raica,” e uqeti koya ko Filipi. Ni rau lako yani vei Jisu, sa qai tukuna ko Jisu me baleti Nacanieli: “Raica e dua na luve i Isireli dina, sa sega vei koya na dauveivakaisini!”

“O ni sa kilai au maivei?” e taroga ko Nacanieli.

“Ni sa bera ni kacivi iko ko Filipi, ni ko a tiko e ruku ni lolo, au a raici iko,” e sauma yani vua ko Jisu.

E kurabuitaka ko Nacanieli. Sa qai kaya, “Vakavuvuli, koi kemuni na Luve ni Kalou, koi kemuni na nodra Tui na Isireli.”

“Ni’u sa kaya vei iko, Au a raici iko e ruku ni lolo, ko sa vakabauta, ne?” e taroga ko Jisu. “Ko na raica na veika sa uasivia oqo.” Sa qai yalataka ko Jisu: “Au tukuna vakadodonu sara vei kemuni, ni ko ni na raica ni tadola na lomalagi ka raici ira tale ga na agilosi ni Kalou ni ra kaba cake tiko ka siro sobu vua na Luve ni Tamata.”

E sega soti ni dede sa qai lako yani ko Jisu kei iratou na nona tisaipeli vou mai na Buca kei Joritani ka lako yani ki Kalili. Joni 1:29-51.

▪ O cei eratou i sevu ni tisaipeli i Jisu?

▪ A veikilaitaki vakacava ko Pita ka rairai vakatalega kina ko Jemesa vei Jisu?

▪ Na cava e vakadinati Jisu rawa kina ko Nacanieli ni Luve ni Kalou?