Wase e 41

Na Yavu ni Ka e Veiletitaki

E SEGA soti ni dede mai na nona a laki kana ena vale i Saimoni, sa qai tekivu ena i karua ni nona i lakolako vakavunau mai Kalili. Na nona lakova na yalava ena nona i lakolako sa oti, eratou a salavata kei koya na i sevu ni nona tisaipeli, ko Pita, Adriu, Jemesa, kei Joni. Ia ena gauna oqo eratou salavata kei koya na lewe 12 na i apositolo, kei na so na yalewa. Eratou okati kina oqo ko Meri Makitala, Susana, kei Joana na watina na matanivanua i Tui Eroti.

Ni sa toso totolo na cakacaka vakaitalatala i Jisu, e vakatalega kina na kena veiletitaki na nona cakacaka. Sa kau mai vei Jisu e dua na tagane curumi timoni, e mataboko ka galu. Ena gauna sa vakabulai koya kina ko Jisu, sa sereki nona vakabobulataki koya na timoni sa qai vosa rawa ka rai, era sa kurabui kina na lewe vuqa. Era tekivu veikayaka: “O koya oqo na Luve i Tevita, se segai?”

Era dausoqoni vata mai na i wiliwili tamata levu ka ra vakavolivolita na vale e dautiko kina ko Jisu kei ira na nona tisaipeli ka ra sa sega ni kana rawa kina. Me kedra i kuri o ira era vakasamataka de sa i koya na “Luve i Tevita” yalataki, era tu talega e kea na vunivola kei na Farisi era lako vakayawa sara mai Jerusalemi me ra mai beitaki koya. Ni ratou sa rogoca na weka i Jisu ni tubu kaukauwa nona veiletitaki ko Jisu, eratou sa lako mai me ratou tauri koya. Ena vuku ni cava?

Io, ni ratou se bera ni vakadinata ena gauna oqori na taci Jisu ni Luve ni Kalou o koya. Na ue kei na tubu talega ni nodra veileti na lewenivanua e dredre sara ga ni ratou vakadinata ni vakavuna ko Jisu baleta ni veicalati sara ga kei na i valavala eratou kilai koya kina ena nona a tubu cake tiko mai Nasareci. Eratou mani nanuma kina ni sa leqa na nona vakasama ko Jisu. “Sa lialia ko koya,” na nodratou nanuma, eratou via tauri koya me ratou kauti koya tani.

Ia sa tu na kena i vakadinadina matata ni a vakabula na tamata curumi timoni ko Jisu. Na ka oqo era kila na vunivola kei na Farisi ni ra sega ni cakitaka rawa. O koya gona, me ra beci Jisu ena matadra na tamata era tukuna: “Sa tiko vua ko Pielisipupi, a sa vakasevi ira na tevoro e na kaukauwa ni nodra turaga na tevoro.”

Ni sa kila na nodra vakanananu ko Jisu, sa qai kacivi ira yani vua na vunivola kei ira na Farisi ka kaya vei ira: “Ia kevaka sa dua na matanitu sa veisei vakai koya, ena sega ni tu dei rawa na matanitu ko ya: ia kevaka sa dua na vale sa veisei vakai koya, ena sega ni tu dei rawa na vale ko ya. Ia kevaka sa ia ko Setani me veivala vakai koya, ka veisei, ena sega ni tu dei rawa, ena oti ga.”

Sa dua dina na vosa tawaveiletitaki rawa! Ena nodra kaya na Farisi ni so mai vei ira sa ra dauvakasevi ira na timoni, sa qai taroga ko Jisu: “Ia kevaka ka’u vakasevi ira na tevoro e na kaukauwa i Pielisipupi, sa vakasevi ira e na kaukauwa i cei ko ira na kai nomudou?” E dua tale na kena i balebale ni nodra beitaki Jisu e dodonu me vauci ira ka vakatalega kina o koya. Sa qai vakasalataka ko Jisu: “Ia kevaka ka’u vakasevi ira na tevoro e na kaukauwa ni Yalo ni Kalou, sa qai yaco dina vei kemudou na matanitu ni Kalou.”

Me vakaraitaka ni nona vakasevi ira tani na timoni e i vakadinadina ni nona kaukauwa o koya vei Setani, sa qai kaya ko Jisu: “Se na rawata vakaevei e dua me curuma na vale ni qaqa, me kovea na nonai yaya, kevaka ena sega ni vesuka mada na qaqa? ena qai kovea emuri na nonai yau. O koya sa sega ni totaki au, sa to tani; ia ko koya sa sega ni kumuna vata vei au, sa duibiubiuta.” E macala vinaka sara ni ra tusaqati Jisu o ira na Farisi, era vakaraitaki ira kina ni ra i tini nei Setani. Era duibiubiuta ira tani na Isireli mai vua.

Sa qai vakasalataki ira kina na dauveitusaqati vakasetani oqo ni “sa sega ni rawa me ra kakua ni cudruvi na tamata era sa vosavakacacataka na yalo tabu.” Sa qai vakamacalataka o koya: “Ia ko koya yadua sa vosavakacacataka na Luve ni tamata ena rawa me kakua ni cudruvi: ia ko koya yadua sa vosavakacacataka na yalo tabu, ena sega sara ni rawa me kakua ni cudruvi, e na gauna oqo, se na gauna ena muri mai.” Era vakayacora na i valavala ca ka tawabokoci rawa o ira na vunivola kei ira na Farisi ena nodra vakaibalebaletaka vei Setani na cakacaka e matata vinaka tu ni cakacaka veivakurabuitaki ni yalo tabu ni Kalou. Maciu 12:22-32; Marika 3:19-30; Joni 7:5.

▪ E yaco vakacava me duidui na i karua ni i lakolako oqo i Jisu e Kalili mai na kena i matai?

▪ Ena vuku ni cava eratou via vesuki Jisu kina na wekana?

▪ Era saga vakacava na Farisi me ra beca na cakamana i Jisu, ia e qai yaco vakacava me vakalasui ira?

▪ Era cala ena cava o ira na Farisi, ia ena vuku ni cava?