Wase e 45

Na Tisaipeli Duatani

SA VAKATUBURERE dina na ka e waraki Jisu tu mai ni sobu yani ena baravi o koya! E lewe rua na tamata cudrucudru vakatani e rau lako mai ena i bulubulu e tu voleka e kea, ka rau cicivi koya yani. E curumi rau na timoni. E dua vei rau e voravora sara na nona i tovo mai vua tale ka dua, ka vakararawataki koya voli na timoni ena dua na gauna balavu, e kauwaitaki kina vakalevu o koya oqo.

Sa bau dua na gauna balavu nona luvawale ka tiko voli ena maliwa ni bulubulu na tamata vakaloloma oqo. Sa dauqoqolou voli ena siga kei na bogi, ka tavatavalaki koya ena vatu. E rui voravora dina o koya, sa sega kina na tamata e lako rawa ena sala o ya. E sagai me vesuki, ia e dau qai gutugutulaka na sinucodo ka drutidrutilaka na i vesu ni yava. E sega ni bau dua e tu vua na kaukauwa me vakamalumalumutaki koya rawa.

Ni sa toro voleka yani vei Jisu na tamata oqo sa cuva sobu ki yavana, o ira na timoni era vakatulewataki koya sa ra qai vakavuna me qoqolou: “A cava vei kedaru, i Jisu na Luve ni Kalou cecere sara? Au vakarota vei iko e na yaca ni Kalou mo kakua ni vakararawataki au.”

“Ko iko na yalo velavela, mo lako tani vua na tamata,” e tukuna tikoga ko Jisu. Oti sa qai taroga ko Jisu: “Ko cei na yacamu?”

“A yacaqu ko Vavakoso, ni keimami sa lewe vuqa sara,” na kena i sau mai. E matalau vei ira na timoni me ra raica nodra rarawa o ira era daucuruma, e kena i rairai ni ra dautaleitaka na nodra tulevutaka e dua ga na tamata. Ia ni sa sotavi Jisu, era sa qai kerea me kakua ni vakatalai ira yani ki na i bulubulu sega ni vakabotona. Eda raica tale e ke na kaukauwa levu sa tu vei Jisu; ni rawa me vakamalumalumutaki ira na timoni yalocudrucudru. E vakavotuya talega oqo na nodra kila rawa tu na timoni ni ra na biu ki na i bulubulu sega ni vakabotona kei na nodra i liuliu ko Setani na Tevoro, sa i koya na vakataulewa ni Kalou ena caka vei ira.

E 2,000 na qele ni vuaka e volekata na ulunivanua era kana voli kina. Era sa qai kaya na timoni: “Ni vakatalai keimami vei ira na vuaka, me keimami curumi ira.” E kena i rairai ni o ira na timoni era daumarautaka me ra curumi ira na i bulibuli vakayago. Ni sa vakatarai ira ko Jisu era sa qai curumi ira e 2,000 na vuaka sa ra qai ciciva sobu na bari ni vatu ka luvu kece ena wasawasa.

Ia ni ra sa raica na ka sa yaco oqo o ira na dauvakatawa vuaka, era sa lako vakariri yani ka vakarogoya na i tukutuku ena loma ni koro kei na veivanua volekata. Ena ka oqo era sa qai lako mai na tamata me ra laki raica na ka sa yaco. Ena gauna era yaco yani kina, era sa raica na tamata a daucuruma voli na timoni. A cava tale, ni sa vakaisulu ka sa vinaka tale na nona vakasama, sa dabe tiko ena yava i Jisu!

Era sa qai talanoataka o ira era a raica e matadra na sala e bula vinaka tale kina na tagane oqo. Era tukuna talega vei ira na tamata me baleta na nodra mate na vuaka. Ni ra sa rogoca na ka oqo na tamata, sa curumi ira vakalevu na rere, era uqeti Jisu vagumatua me biuta na nodra yalava. Sa muria na lomadra o koya ka qai vodo lesu tale ki waqa. A kerei Jisu na tagane curumi timoni e liu me salavata talega kei iratou. Sa qai kaya vua ko Jisu: “Mo lako ki na nomudou, vei ira na wekamu, ka tukuna vei ira na levu ni veika sa cakava vei iko ko Jiova, ka ni sa lomani iko.”

E dauvakaroti ira e dauvakabulai ira ko Jisu me ra galuvaka na veika e yacovi ira, me vaka ni sega ni vinakati ira na tamata o koya me ra na dauvatavatairalago ena vuku ni i tukutuku era sa rogovaki yani. Ia na kena oqo e dodonu baleta ni laki vakadinadina na tamata curumi timoni e liu oqo ena kedra maliwa na tamata ka rairai sa na sega ni yaco rawa vei ira ko Jisu. Me kena i kuri, na nona sa tiko ena kedra maliwa na tagane o ya e soli i vakadinadina ena vuku ni kaukauwa i Jisu me vakayacora na cakacaka vinaka, sa rawa ni tarova na rogorogo e sega ni vinaka ka na vakatetei voli ena nodra mate na vuaka.

Nona muria na i vakasala i Jisu, sa qai lako yani o koya a curumi timoni e liu. Sa kuruvaka voli yani ena vanua taucoko ko Tikapoli na veika kecega sa cakava vua ko Jisu, ka ra kurabui kina na tamata. Maciu 8:28-34; Marika 5:1-20; Luke 8:26-39; Vakatakila 20:1-3.

▪ Na cava e kauwaitaki beka ga kina e dua na tamata ka curumi timoni ni rau lewe rua e rau tiko kina?

▪ Na cava e vakaraitaka ni ra kila na timoni ni ra na biu yani ki na i bulubulu sega ni vakabotona?

▪ Na cava era taleitaka beka kina na timoni me ra curumi ira na tamata kei na manumanu?

▪ Ena vuku ni cava e vakatarai koya kina ka curumi timoni e liu ko Jisu me laki tukuna vei ira na tamata na veika sa vakayacora vua o Koya?