Wase e 47

Vuki na Tagi me Marau Levu

NI SA raica ko Jairo na vakabulai ni yalewa turidrabalavu, sa qai tubu cake nona lomanuidei ena kaukauwa ni cakacaka veivakurabuitaki i Jisu. Ena loma ni siga o ya, a sa kerei Jisu oti ko Jairo me lako mada me laki vukea na luvena yalewa yabaki 12, ka sa voleka sara ni mate. Ena gauna oqo sa qai yaco mai na ka e nuiqawaqawataka vakalevu ko Jairo. Ni se vosa tikoga vua na yalewa ko Jisu, sa ra tadu mai e so na tamata ka ra mai tukuna lo vei Jairo: “Sa mate na luvemuni-yalewa; kakua ni vakaocataka nai Vakavuvuli.”

Sa i tukutuku rarawataki dina! Mo vakananuma mada: Na tagane ka dokai vakalevu oqo ena nona yasayasa, e sa sega ni rawata rawa tale e dua na ka ni sa rogoca sa mate na luvena yalewa. Ia, e rogoca rawa na veitalanoa ko Jisu. Sa qai vuki ka vakayaloqaqataki Jairo: “Kakua ni yalolailai; vakadinata ga, ena qai vakabulai ga ko koya.”

E mai salavata ko Jisu kei na tagane e sa bikai koya tu na lomabibi ki na nona vale. Ni ratou yaco yani, eratou raica na nodra osi kei na mamaue kei na veitagicaki. Era sa qai soqovata mai na i lawalawa tamata, ka ra sa mamaue ka tagi. Ni curu yani ki loma ko Jisu, sa qai taroga: “Dou sa tagiyaso ka tagi ena vuku ni cava? Sa sega ni ciba na gone-yalewa, sa moce ga.”

Ni ra sa rogoca oqo na tamata, era dredre ni vakalialiai Jisu, baleta ni ra kila ni sa mate vakaidina na gone. Ia, e kaya ko Jisu ni moce ga na gone. Ni taurivaka na nona kaukauwa e solia na Kalou, ena vakaraitaka o koya ni rawa vei ira na tamata me ra vakalesui mai na mate, na kena rawarawa e vaka na veivakayadrati mai na moce lutu.

Sa qai vakatalai ira kece yani ki tuba na tamata ko Jisu sa qai vo duadua ga mai ko Pita, Jemesa, Joni, kei na tamana na gone sa mate kei tinana. Sa qai kauti iratou na lewe lima ka ratou lako yani ena vanua e davo koto kina na gone yalewa. E taura cake na ligana, sa qai kaya ko Jisu: “Talica kumi,” ni vakadewataki e kena i balebale: “Goneyalewa, au sa kaya vei iko, tu cake mai.” Vakasauri sa tucake sara na gone yalewa lailai ka tekivu veilakoyaki! Na veika e yaco oqo e rau sega ni lewai rau kina na i tubutubu ena levu ni nodrau marau.

Ni vakasalataka oti me soli na kakana vua na gone me kana, sa qai vakaroti Jairo kei watina ko Jisu me kakua ni kila e dua na tamata na ka sa yaco. Veitalia ga na veika e tukuna ko Jisu, sa teteva yani na yasayasa kecega oqori na kena veitalanoataki. Oqo na i karua ni gauna me vakatura kina ko Jisu na tamata mate. Maciu 9:18-26; Marika 5:35-43; Luke 8:41-56.

▪ Na i tukutuku cava e tukuni vei Jairo, ia e qai vakayaloqaqataki koya vakacava ko Jisu?

▪ E vakacava na i tuvaki ni vale i Jairo ni ratou sa yaco yani?

▪ Ena vuku ni cava e kaya kina ko Jisu ni moce ga na gone e sa mate?

▪ O cei na lewe lima eratou tikovata kei Jisu ka ratou vakadinadinataka na veivakaturi?