Wase e 48
Biuta mai na Vale i Jairo ka Sikovi Nasareci Tale
E RUI osooso sara na siga oqo vei Jisu—ena nona soko mai Tikapoli, mai vakabula na yalewa turidrabalavu, kei na vakaturi ni luveyalewa i Jairo. Ia e se bera ni cava na siga. Ni rairai biuta mai na vale i Jairo ko Jisu, e rau sa muri koya sara e lewe rua na tamata mataboko, ka rau kaci vakadomoilevu: “Na Luve i Tevita, lomani keirau mai.”
Na nodrau vakatokai Jisu me “Luve i Tevita,” e rau vakaraitaka na nodrau vakabauta ni sa i Jisu ka dodonu me na dabeca na i tikotiko vakaturaga i Tevita, o koya oqo na Mesaia yalataki. E vaka me sega ni via kauwaitaka ko Jisu na nodrau vakamamasu me rau vukei, rairai me vakatovolea nodrau cikecike. Ia e rau sega ni cegu na tamata. E rau muri Jisu yani ki na vale e tiko kina, ia ni sa curu ki vale ko Jisu, e rau sa muria yani ki loma.
Sa qai taroga e keri ko Jisu: “Drau sa vakadinata ni’u sa cakava rawa na ka oqo, se segai?”
“Io, na Turaga,” e rau vakadeitaka ena nodrau sauma.
Sa qai tara na matadrau, ka kaya ko Jisu: “Me yaco vei kemudrau me vaka na nomudrau vakabauta.” E vakasauri ni rau sa rai rawa! Sa qai vosa vakabibi vei rau ko Jisu: “Raica, me kakua ni kila e dua.” Ia ni sa vakasinaiti rau na marau, e rau sa guilecava kina na i vakaro i Jisu ka vakatetea na kena i tukutuku ena vanua taucoko.
Ena gauna ga e rau lako tani kina na tamata oqo, sa qai kau mai vua e dua na tamata curumi timoni ka vakavuna me sega ni vosa rawa. Sa qai vakasava na timoni ko Jisu, ka vakatekivu vosa na tagane. Era kurabui na lewe vuqa ena cakamana oqo, ka vaka: “E sa sega mada ni yaco e dua na ka vaka oqo e Isireli.”
Era tiko talega kina na Farisi. E sega ni ra cakitaka rawa na cakamana sa qai caka, ia ena ca ni nodra tawavakabauta era tomana tale kina nodra veibeitaki ena vuku ni vanua e vu tiko mai kina na kaukauwa ni cakacaka i Jisu, ka ra kaya: “Sa vakasevi ira na tevoro ko koya e na kaukauwa ni nodra turaga na tevoro.”
Sega soti ni dede na kena yaco na veika oqo, sa qai lesu tale ko Jisu ki na nona koro ko Nasareci, era salavata kei koya ena gauna oqo na nona tisaipeli. E rauta ni dua na yabaki yani ki liu, a sikova na valenilotu ko Jisu ka vakatavuvuli voli kina. E dina ga ni ra a kurabuitaka taumada na totoka ni nona vosa, ia e qai vakacudrui ira e muri na nona i vakatavuvuli ka ra saga me ra vakamatea. Oqo ena nona yalololoma, e baci tovolea tale ko Jisu me vukei ira na wekana a dau tu vata kei ira e liu.
Ena veivanua tani tale e so era tabili vakalewe vuqa vei Jisu na tamata, ia ena vanua oqo e rairai era sega ni vakayacora vakakina. O koya oqo, sa lako yani kina o koya ena Siga ni Vakacecegu me vakatavuvuli voli ena valenilotu. Era sa kurabui e lewe vuqa vei ira era sa rogoci koya. “E rawata maivei ko koya oqo na vuku, kei na cakacaka-mana oqo? Sa sega li ni luve ni matai ko koya oqo? Sa sega li ni yaca i tinana ko Meri, kei na tacina ko Jemesa kei Josefa, kei Saimoni, kei Jutasa? kei na ganena, ratou sa sega li ni tiko vata kei keda? Sa qai rawata beka ga maivei ko koya oqo na ka kecega?”
‘O Jisu e dua ga na lewe ni vanua me vakataki keda,’ era vakananuma. ‘Eda raica nona tubu mai, ia eda kilai iratou na nona vuvale. E rawa vakacava me Mesaia o koya oqo?’ E veitalia ga na i vakadinadina kece—na vuku levu e tu vua kei na nona cakamana—era cati koya ga. Ena vuku ni nodra kilai koya vinaka, era tarabe sara mada ga na wekana ena vukuna, e vakavuna me tinimaka kina ko Jisu: “Sa vakarokorokotaki na parofita e na veivanua tani, ia sa sega ga e na nona vanua, se nona vale.”
Io, e kurabuitaka ko Jisu ni sega vei ira na vakabauta. Oqori na vuna e sega ni mani cakava e kea o koya na cakamana vakavo ga na nona tabaki ira e lewe vica era tauvimate ka vakabulai ira. Maciu 9:27-34; 13:54-58; Marika 6:1-6; Aisea 9:7.
▪ Ena nodrau kacivi Jisu me “Luve i Tevita,” na cava e rau vakaraitaka na tamata mataboko ni rau vakabauta?
▪ Na cava na i vakamacala sa ra mai dei kina oqo na Farisi ena vuku ni cakamana i Jisu?
▪ Ena vuku ni cava e rui yalololoma kina ko Jisu me lesu ki Nasareci ka laki vukei ira?
▪ E vakacava na i valavala ni nodra ciqomi koya na kai Nasareci, ia ena vuku ni cava?