Wase e 51

Na Laba ena Kanavata ni Siga ni Sucu

NI VAKASALATAKI iratou oti na nona i apositolo ko Jisu, sa qai talai iratou yani me ratou lako yarua ena cakacaka vakavunau. Rairai e rau salavata na veitacini ko Pita kei Adriu, kei rau ko Jemesa kei Joni, Filipi kei Pacolomiu, Tomasi kei Maciu, Jemesa kei Cateo, kei Saimoni kei Jutasa Isikarioti. Sa ratou qai kacivaka yani na i tukutuku vinaka ni Matanitu na dauvunau eratou lewe ono na veisa oqo ka ratou vakayacora na cakamana ena veivanua kecega eratou lako kina.

Ena gauna vata oqori, e se vesuki tikoga ena valeniveivesu ko Joni na Dauveipapitaiso. Sa rauta ni yabaki rua na nona vesu voli. O rawa ni nanuma lesu ni a tukuna ko Joni e matadra na lewe vuqa ni cala vei Eroti Anitipasa me tauri Erotiasa, na wati i Filipi na tacina me mai watina. Me vaka ni tukuna ko Eroti Anitipasa ni muria na Lawa i Mosese, sa vakavotuya kina ko Joni na cala ni veibutakoci oqo. E mani biuti Joni kina ki na valeniveivesu ko Eroti, ena veiuqeti beka i Erotiasa.

E kila ko Eroti Anitipasa ni tamata yalododonu ko Joni ka daumarau talega ni rogoci koya. Ia, e sega ni kila na ka me vakayacora vei koya. Ia, ena yasana ka dua ko Erotiasa, e cati Joni ka saga voli na sala me vakamatea. Sega ni dede sa tadola na sala e a waraka voli mai.

E sega soti ni dede ni bera na Lakosivia ena 32 S.K., sa qai vakarautaka ko Eroti e dua na soqo levu ni nona siga ni sucu. Era soqovata kece mai na vakaitutu lelevu kei ira na vakailesilesi ena mataivalu, ko ira talega na qase mai Kalili. Ni sa toso tiko na bogi, ko Salome, na luveyalewa gone i Erotiasa na wati i Filipi e liu, sa talai yani me laki meke. Sa ka levu dina nodra malaude na tagane era tiko kina ena i vakarau ni nona veimeketi.

E marautaki Salome vakalevu ko Eroti. “Kerea vei au na ka ko sa vinakata, ka’u na solia vei iko,” e tukuna o koya. E bau bubului talega ko Eroti: “A ka ko na kerea vei au, au na solia vei iko, kevaka ka’u na wasea rua kina na noqu matanitu.”

Ni bera nona sauma, sa curu yani ki tuba ko Salome me laki tarogi tinana kina. “A cava me’u kerea?” e taroga o koya.

Oqo sara ga na kena gauna! “Na ulu i Joni na dauveipapitaiso,” sega tale ni lomalomarua ko Erotiasa ni sauma yani.

Sa lesu vakariri tale mai loma ko Salome vei Eroti ka vakamasuta: “Au sa vinakata mo ni solia mada mai vei au na ulu i Joni na dauveipapitaiso e na dua na dari.”

E tuburi Eroti na rarawa levu. Ia ena vuku ni nodra sa rogoca oti na vulagi na nona vosa bubului, ena vakatubu madua vua ke sega ni solia, e dina ga ni na labati kina e dua na tamata yalododonu. Sa qai talai yani vakariri na dauveivakamatei ki na valeniveivesu ni soli oti vua na nona i vakaro vakadomobula. Sega ni dede sa lesu tale mai o koya kei na ulu i Joni ena dua na dari, ka solia sara o koya vei Salome. Sa qai lesu yani ko Salome ka kauta vei tinana. Ni ratou sa rogoca na tisaipeli i Joni na ka sa yaco, eratou sa qai lako mai ka kauta tani na yagona ka laki buluta, eratou qai laki tukuna na ka oqo vei Jisu.

E muri ni sa qai rogoca ko Eroti ni sa vakabulai ira na tamata ko Jisu ka vakasavi ira na timoni, sa ka levu na nona rere, ni taqayataka ni sa i Jisu ko Joni ka sa vakaturi mai na mate. Sa ka levu kina na nona via raici Jisu, e sega ni via rogoca na nona vunau, ia me vakadeitaka ga na nona rere e yavutaki dina tiko se sega. Maciu 10:1-5; 11:1; 14:1-12; Marika 6:14-29; Luke 9:7-9.

▪ Na cava e tu kina e valeniveivesu ko Joni, ia a cava e sega ni via vakamatea kina ko Eroti?

▪ Na kena i tinitini e qai vakamatei Joni vakacava ko Erotiasa?

▪ Ni oti na mate i Joni, na cava e via raici Jisu kina ko Eroti?