Wase e 53

Na Dauveiliutaki Gadrevi e Uasivia na Kaukauwa Vakatamata

NI SA vakani ira vakacakamana na lewe udolu ko Jisu, era kurabui vakalevu kina na tamata. “Sai koya dina oqo na Parofita ko ya e dodonu me lako mai ki vuravura,” era kaya. Sa ra qai tinimaka ni ko Jisu e sega walega ni parofita ka levu cake vei Mosese, ia ena yaco o koya me dua dina na i liuliu e gadrevi. Era sa qai saga me ra taura vakaukauwa me ra bulia me tui.

Ia sa kila na lomadra ko Jisu ena ka era via cakava. Sa qai lako tani totolo mai na kedra maliwa me levea nodra tauri koya vakaukauwa. Sa vakasukai ira yani na lewe vuqa ka vakaukauwataki ira na tisaipeli me ra kauta mai na nodra waqa me ra mua lesu tale ki Kapenaumi. Sa qai lako duadua yani ki na ulunivanua me masu. E tiko duadua ga ko Jisu ena bogi oqori.

Ni bera ni kida na mataka sa qai rai sobu mai ko Jisu mai na vanua cecere e tiko voli kina ka raica na veiseyaki ni ua e wasawasa mai na cagi tataba. Ena rarama ni vula ka sa voleka me taucoko, ni volekata yani na Lakosivia, e raici iratou rawa nona tisaipeli ko Jisu ena waqa ni saqati iratou kaukauwa tiko na cagi ka coqa tiko yani na biau ni wasaliwa. Era vocera ena nodra i gu taucoko na waqa.

Ni sa raica oqo, sa qai siro sobu mai na ulunivanua ko Jisu ka lako yani vaka ki na waqa ena nona taubale kosova yani na ua. Sa soko oti na waqa ka sa rauta ni lima se ono na kilomita me qai yacovi ira yani ko Jisu. Ia, e sa vaka ga me lako siviti ira. Ni ra sa raici koya na nona tisaipeli, era sa qoqolou: “Sa dua na yalo!”

Sa qai vakacegui iratou ko Jisu: “Dou vakacegu; koi au ga.”

Ia sa qai kaya ko Pita: “Turaga, kevaka sai kemuni, kacivi au me’u bau yani vei kemuni e dela ni wai.”

“Lako ga mai,” e sauma yani ko Jisu.

Ni sa sobu mai waqa ko Pita, sa lako ena dela ni wai vei Jisu. Ia ni sa raica na kaukauwa ni cagi, sa qai rere ko Pita, ni sa vakatekivu me lutu dromu, sa qai kaci: “Turaga, ni vakabulai au.”

E sega ni bera ni sa dodoka yani na ligana ko Jisu ka tauri koya, ka kaya: “O iko sa lailai na nomu vakabauta, o sa vakatitiqa e na vuku ni cava?”

Ni rau sa lesu tale ki waqa ko Pita kei Jisu, sa ruru sara na cagi, era kidroa na tisaipeli. Ia e dodonu beka me ra vakakina? Kevaka me ra a taura vinaka na i balebale dina ni “veibuli madrai” ena nodra vakasamataka na cakamana levu a cakava ko Jisu ena vica na aua ka se qai oti ga, ni a vakania e vica vata na udolu ena lima ga na i buli madrai kei na rua na ika lalai, sa dodonu me ra kakua ni kurabuitaka ni rawa vua me taubale voli ena dela ni wai ka vakavuna na ruru ni cagi. Ia, ena gauna ga oqo, era cuva sobu vei Jisu na tisaipeli ka kaya: “Sa dina sara kemuni sa Luve ni Kalou.”

E sega soti ni dede sa ra yaco ki tai kadua ki Kenisereti, e dua na bucabuca rairai totoka ka bulabula, ka tu volekati Kapenaumi. Ena vanua oqo era mai vakelea koto kina na waqa. Ia ni ra sobu yani ki vanua, era sa kilai Jisu na tamata, sa ra qai veiciciyaki ki na veivanua vakavolivolita, ka qarai ira mai na tauvimate. Ni ra sa kau mai o ira oqo ena nodra i davodavo ka ra tara walega na tutu ni nona i sulu e sau, era sa bula vinaka sara.

Rauta toka na gauna o ya, sa ra vakila na lewe vuqa era a vakadinadinataka na nodra vakani vakacakamana na lewe udolu ni sa lako ko Jisu. Ni ra sa kele mai na waqa lalai mai Taiperia, sa ra qai vodoka ka soko yani ki Kapenaumi me ra laki vakasaqarai Jisu. Ena gauna sa ra kunei koya kina, era sa qai tarogi koya: “Vakavuvuli, ko ni sa lako mai kike ninaica?” Sa vunauci ira ko Jisu, eda na vakarau raica yani oqo. Joni 6:14-25; Maciu 14:22-36; Marika 6:45-56.

▪ Ni sa vakani ira oti vakacakamana na lewe vica vata na udolu ko Jisu, na cava era sa qai via cakava vua na tamata?

▪ Na cava e raica sobu mai ko Jisu ena ulunivanua a lako yani kina, ia na cava e qai cakava?

▪ Ena vuku ni cava e sega ni dodonu me ra kidroataka na veika oqo na tisaipeli?

▪ Na cava e yaco ni ra sobu yani ki vanua?