Wase e 59

O Cei Sara Mada ko Jisu?

NI SA kele na waqa ka kauti Jisu tiko kei ira na nona tisaipeli ki Peciseita, era sa kauta vei Jisu na tamata e dua na mataboko ka ra vakamasuti koya me tara na tamata oqori me vakabulai. Sa qai tuberi koya tani ki na i bili ni koro ko Jisu, ia ni sa kasivita oti na matana ruarua, sa qai taroga: “O sa bau raica e dua na ka, se sega?”

“Au sa raici ira na tamata,” e sauma yani, “ia era vaka na veivunikau era sa lako voli.” Sa qai tara na matana, ka vakavuna ko Jisu me vinaka sara na nona rai. Sa qai vakatalai koya yani ki na nona vale ko Jisu ka vakaroti koya me kakua ni lako tale ki na loma ni koro.

Sa qai cavu tu yani oqo ko Jisu kei ira nona tisaipeli ki na veikoro mai Sisaria-Filipai, e koto yawa yani ki na vualiku kei Palesitaina. E dua na cabe yawa oqo, ka ni kovuta e rauta ni 50 na kilomita ki na vanua rairai totoka oqo ko Sisaria-Filipai ka rauta ni 350 na mita na kena rewaicake mai waitui. E taura e vica vata na siga na i lakolako oqo.

Ena nodra i lakolako, sa lako duadua yani ko Jisu me masu. Sa vo beka ga e ciwa se tini na vula ni bera nona mate, ia e rui kauwaitaki ira na nona tisaipeli. Era sa biuti koya oti e lewe vuqa. E so tale era veilecayaki ka vakanuinuikara ni cata na nodra via buli koya me tui na tamata, kei na nona bolei mai vei ira na nona meca ka qai sega ni cakava na i vakatakilakila mai lomalagi me vakadinadinataka na nona i tutu vakatui. A cava mada eratou vakabauta na i apositolo se o cei o koya? Ni ratou sa yaco mai ki na vanua e masu tiko kina, sa qai tarogi iratou ko Jisu: “O cei beka era kaya tiko na tamata ni ko i au?”

Eratou sa qai sauma, “E so era kaya, ko Joni na Dauveipapitaisotaki, ka so, ko Ilaija, ka so tale, ko Jeremaia, se dua tale na parofita.” Io, era nanuma na tamata ni ko Jisu e dua vei ira oqo sa tucake mai na mate!

“Ia, ko cei ga dou kaya ko i kemudou ni ko i au?” e taroga ko Jisu.

E totolo nona sauma ko Pita: “Ko i kemuni na Karisito, na Luve ni Kalou bula.”

Ni sa vakadonuya oti na i sau ni vosa i Pita, sa qai kaya ko Jisu: “Au sa kaya tale ga vei iko, Ko iko ko Pita, ka’u na tara e na dela ni vatu oqo na noqu i soqosoqo, ka na sega ni rawai mai na kaukauwa ni mate.” Na i matai ni gauna oqo me tukuna kina ko Jisu ni na tara e dua na i vavakoso, ka na sega ni rawata mada ga ko mate me vesuki ira tiko na lewena ni sa oti na nodra yalodina voli e vuravura. Sa qai tukuna vei Pita: “Au na solia vei iko na i dola ni matanitu vakalomalagi.”

E vakatakila gona ko Jisu ni na lavotaki na i tavi ena soli vei Pita. Ia e sega ni kena i balebale ni na vakaliuci me liu ena kedra maliwa na i apositolo ko Pita, e sega sara ga ni na yaco o koya me yavu ni i vavakoso. Ni sa i Jisu vakataki koya ga na Suvavatu ka na tara cake mai vua na i vavakoso. Ia ena soli vei Pita e tolu na i dola ka vaka ga me dolava kina o koya na sala vei ira na veilawalawa tamata me ra na curu ki na Matanitu vakalomalagi.

Ena taurivaka ko Pita na i matai ni i dola ena Penitiko 33 S.K. me vakaraitaka vei ira na Jiu veivutuni na veika me ra cakava me rawa ni ra vakabulai kina. E sega soti ni dede sa na qai taurivaka na kena i karua me dolavi kina na sala vei ira na kai Samaria vakabauta me ra curu ki na Matanitu ni Kalou. Ni qai yacova na 36 S.K. ena taurivaka na i katolu ni i dola me dolava na sala vata talega oqo vei Konilio kei ira na nona i tokani, era kai Matanitu Tani tawacili.

Sa qai tomana ko Jisu na nona veivosaki kei iratou na nona i apositolo. Eratou sega ni marautaka ni vakatakila vei iratou na rarawa kei na mate ena vakarau sotava mai Jerusalemi. Nona lecava ni na vakaturi ki na bula vakalomalagi ko Jisu, sa qai kauti koya vakatikitiki ko Pita. “Me kakua sara, Turaga,” e kaya o koya. “E na sega ni yacovi kemuni na ka oqo.” Sa vuki lesu ko Jisu, sa qai sauma: “Lako tani ki dakuqu, Setani! Ko sa ka ni veivakatarabetaki vei au, ni sa vakatamata ga na nomu vakasama ka sega ni vaka na vakasama ni Kalou.”

E kena i rairai, ni so tale ka sega ni o iratou duadua ga na i apositolo era salavata voli kei Jisu, sa qai kacivi ira mai oqo ka vakamacalataka ni sega ni ka rawarawa vua e dua me mai nona i muri. “Kevaka e dua sa via muri au, me kakua ni muria na lomana, ia me colata ga na nona kauveilatai ka muri au,” e kaya o koya, “ni ko koya yadua e via maroroya na nona bula e na vakayalia, ia ko koya yadua e vakayalia na nona bula e na vukuqu kei na vuku ni tukutuku vinaka e na maroroya.”

Io, kevaka me ra vakadinadinataka ni ganiti ira nona veivakadonui, sa dodonu vei ira na i muri i Jisu me ra yaloqaqa, ka cabori ira vakataki ira. Sa qai tukuna: “Ni ko koya yadua e na madualaki au kei na noqu vosa e na i tabatamata dauveibutakoci ka i valavala ca oqo, e na madualaki koya tale ga na Luve ni Tamata ni sa lako mai ena i serau nei Tamana kei ira na agilosi yalosavasava.” Marika 8:22-38; Maciu 16:13-28; Luke 9:18-27.

▪ Na cava e kauwaitaki ira kina vakalevu na nona tisaipeli ko Jisu?

▪ Na cava na rai sa tu vei ira na tamata se o cei ko Jisu?

▪ Na veidola cava sa soli vei Pita, ia era na taurivaki vakacava?

▪ Na veivakadodonutaki cava e soli vei Pita, ia ena vuku ni cava?