Wase e 60

Vakaraitaki Vakailiu na iUkuuku i Karisito ena Matanitu

SA MAI tiko oqo ena yasayasa e Sisaria-Filipai ko Jisu, e vakatavulici ira tiko na lewe vuqa kei iratou talega na nona i apositolo. Sa qai kacivaka vei ira na i tukutuku veivakidroataki oqo: “Au sa kaya vakaidina vei kemudou ni ra tu cake tu oqo e so era na sega ni tovolea mada na mate me yacova ni ra sa raica na Luve ni Tamata ni sa lako mai ena nona matanitu.”

‘A cava mada e vakaibalebaletaka ko Jisu?’ era na vakananuma voli e lomadra na tisaipeli. Ni oti e dua na macawa, sa qai kauti Pita, Jemesa kei Joni ko Jisu me ratou tomani koya, eratou cabeta e dua na ulunivanua cecere. Rairai yaco oqo ena bogi, me vaka ni ratou via moce voli na tisaipeli. Ni sa masu tiko ko Jisu, a vakamataliataki o koya e matadratou. A vakatekivu me rarama cake mai na matana me vaka na matanisiga, ka yaco na nona i sulu me rarama mai me vaka na rarama ni cina.

Ena gauna o ya, sa qai laurai e rua tale na tamata ka vakataki “Mosese kei Ilaija,” e rau veivosaki kei Jisu me baleta ‘na nona i lakolako ka na yaco mai Jerusalemi.’ Na i lakolako oqori e rairai vakaibalebaletaka na mate nei Jisu kei na nona vakaturi. Na nodratou veivosaki e vakadeitaka ni nona mate beci e sega ni ka me levei me vaka e gadreva tiko ko Pita.

Ni ratou yadra vinaka mai, eratou a vakararai ka vakatudaliga matua na tisaipeli ena dela ni kurabui. E dina ni raivotu kece oqori, ia e vaka ga e yaco dina, ka mani via curu takoso e loma ko Pita, ka kaya: “Turaga, sa vinaka na nodatou tiko eke: ni kevaka ko ni sa vinakata, me keitou tara eke e tolu na vale-vakacevaceva; e dua me nomuni, ka dua me nei Mosese, ka dua me nei Ilaija.”

Ni se vosa tikoga ko Pita, sa ubi iratou mai e dua na o ramase, ka qai rogo mai e dua na domo mai na loma ni o: “Oqo na Luvequ daulomani, au sa dau vinakati koya vakalevu, dou vakarogoci koya.” Ni ratou sa rogoca na domo oqori, eratou sa qai cuva vakatoboicu. Ia sa qai kaya ko Jisu: “Tu cake, dou kakua ni rere.” Ni ratou sa vakayacora vakakina, eratou sa sega ni raica e dua tale, ko Jisu duadua ga.

Ni ratou siro sobu mai na ulunivanua oqori ena siga ka tarava, sa qai vakarota ko Jisu: “Dou kakua ni tukuna vua e dua na raivotu, me yacova ni sa tu cake tale mai na mate na Luve ni tamata.” Na laurai nei Ilaija ena raivotu e vakavurea ki lomadratou na tisaipeli e dua na taro. Eratou taroga: “A cava era kaya kina na vu-ni-vola ni sa dodonu me liu mada mai ko Ilaija?”

E tukuna ko Jisu: “Sa lako oti mai ko Ilaija ka ra sega ni kilai koya rawa.” Ia, ko Jisu e vosa tiko me baleti Joni na Dauveipapitaiso, a mai vakayacora na i tavi vata ga a mai vakayacora ko Ilaija. A vakarautaka na sala ena nona lako mai na Karisito, me vaka ga a vakayacora ko Ilaija vei Ilaisa.

E vakataudeitaki Jisu dina kei iratou nona tisaipeli na raivotu oqo! Na raivotu e vaka ga me vakaraitaka vakailiu na i ukuuku i Karisito ena Matanitu. E vaka ga eratou a raica na tisaipeli, na “Luve ni tamata ni sa lako mai e na nona matanitu,” me vaka ga a yalataka ko Jisu ena dua na macawa yani ki liu. Ni oti na mate i Jisu, a qai vola ko Pita na nodratou ‘yaco me i vakadinadina ni nona vakalagilagi ko Karisito ena gauna eratou tiko vata kina kei koya mai na ulunivanua tabu.’

Era vakaroti Jisu na Farisi me vakaraitaka vei ira e dua na i vakatakilakila ni sa i koya dina na Tui digitaki ni Kalou e yalataka na i Vola Tabu. A sega ni soli vei ira e dua na i vakatakilakila vaka o ya. Ia ena yasana ka dua, o iratou na nona tisaipeli voleka duadua a soli vei iratou me ratou raica na vakamataliataki i Jisu me vakadeitaka na veiparofisai e vauca na Matanitu. Oqori na vuna, a qai vola kina e muri ko Pita: “A sa tu talega vei keda na vosa sa vakadinadinataki vakalevu cake, a parofisai.” Maciu 16:13, Maciu28–17:13; Marika 9:1-13; Luke 9:27-37; 2 Pita 1:16-19.

▪ Ni bera mada ga nodra mate, era yaco vakacava e so me ra raica na lako mai nei Karisito ena nona Matanitu?

▪ Ena raivotu, na cava e rau mai veivosakitaka kei Jisu ko Mosese kei Ilaija?

▪ Ena vuku ni cava e vukea me vakataudeitaki iratou na tisaipeli na raivotu oqo?