Wase e 69

Vaqaqai ni Tama

ENA GAUNA ni solevu, sa qai katakata ga na nodra veivosaki na nodra i liuliu na Jiu kei Jisu. E vakadinata ko Jisu: “Au sa kila ni ko ni kawa i Eparaama, ia ko ni sa via vakamatei au tiko baleta ni ko ni sega ni vakadinata na noqu vosa. Au sa dau tukuna ga na veika au sa raica mai vei Tamaqu, ia ko i kemuni ko ni sa dau cakava na ka ko ni sa rogoca mai vei tamamuni.”

E dina ga ni sega ni vakatakilai tamadra, sa vakamakaretaka vinaka ko Jisu ni duidui na tamadra mai vei tamana. Na nodra lecavi koya ka vakasamataka tiko ko Jisu, sa ra qai sauma na nodra i liuliu na Jiu: “Na tama i keimami ko Eparaama.” Era nanuma ni tautauvata na nodra vakabauta kei Eparaama, na weka ni Kalou.

Ia, era kidacala ena i sau ni vosa i Jisu: “Kevaka ko ni sa luve i Eparaama dina ke ko ni a kitaka na veika e a cakava ko Eparaama.” E dau kena i vakarau me vakadamurimuri tamana na luvena dina. E kaya ko Jisu: “Ia ko i kemuni, ko ni via vakamatei au tiko, a tamata sa tukuna vei kemudou na ka dina, o koya ka’u a rogoca mai vua na Kalou; sa sega ni kitaka na ka vakaoqo ko Eparaama.” O koya oqo sa kaya tale kina ko Jisu: “Ko ni sa cakava tiko ga na ka e a cakava na tamamuni.”

E sega tikoga ni macala vinaka vei ira o koya ka vosataka tiko ko Jisu. Era taura dei toka ga ni ra luve dina i Eparaama, ka kaya: “Keimami a sega ni sucu mai e na veibutakoci.” O koya gona ena nodra tukuni ira ni ra sokalou dina talega me vakataki Eparaama, sa ra qai vosa bolebole: “E duabau ga na tama i keimami, koya ga na Kalou.”

Ia na Tamadra dina li na Kalou? E sauma yani ko Jisu: “Kevaka e tamamuni dina na Kalou, ke ko ni a lomani au. Ni’u a tubu mai vua na Kalou, ka lako mai vua. Au a sega ni lako ga mai vakai au, ia e a talai au ga mai ko koya. A cava ko ni sega ni kila tiko kina na i balebale ni noqu vosa?”

A tovolea me vakatakila ko Jisu vei ira na i liuliu vakalotu oqo na ka era na sotava ena nodra cati koya tiko. Ia oqo sa qai tukuna vakadodonu o koya: “A tamamuni na Tevoro; ko ni sa gadreva tale ga mo ni cakava na gagadre i tamamuni.” Na mataqali tama vakacava na Tevoro? E vakatakila ko Jisu ni daulaba ka kaya talega: “Ni sa dau lasulasu ka sa vu mai vua na lasu kece ga.” Sa qai tinimaka vakaoqo ko Jisu: “O koya sa lako mai vua na Kalou sa dau vakarorogo ki na vosa ni Kalou. Oqo dou sa sega kina ni rogoca, ni dou sa sega ni nona na Kalou.”

E tuburi ira na cudru ni vosataki ira ko Jisu, sa ra qai sauma na Jiu: “E sega li ni dina na neimami a kaya, ni ko kai Samaria, kei na neimami a kaya tale ga ni curumi iko tiko e dua na tevoro?” Na vosa “kai Samaria” e i vosavosa ni veibeci kei na veivakasewasewani ena vuku ni nodra daucati ira na kai Samaria na Jiu.

Na nona sega ni kauwaitaka, ni ra tukuna ni kai Samaria o koya, sa qai sauma ko Jisu: “E sega ni curumi au tiko e dua na tevoro. Au sa vakarokorokotaki Tamaqu, ia ko ni sa vakalialiai au ga.” E tomana, ena nona vosa ni yalayala veivakidroataki: “Kevaka e dua e katona e lomana na noqu vosa ka talairawarawa kina, e na sega sara ni mate.” Io, e sega ni vakaibalebaletaka ko Jisu ni ko ira kece era muri koya era na sega sara ni mate vakayago. Ia, e vakaibalebaletaka ni ra na sega ni sotava na veivakarusai tawamudu, se “na i karua ni mate,” na i tuvaki ena sega ni ia tale kina na veivakaturi.

Ia, era vakaibalebaletaka vakayago na Jiu na vosa i Jisu, era sa qai kaya: “Sa qai macala vei keimami ni curumi iko dina tiko e dua na tevoro! Sa mate ko Eparaama; era sa mate tale ga na parofita; ia ko iko, ko kaya, Kevaka e dua sa katona na noqu vosa ka talairawarawa kina e na sega sara ni mate. O iko beka o cecere cake vei Eparaama, na tama i keimami? Sa mate ko koya ka ra sa mate talega na parofita; o nanuma tiko o cava o iko?”

Na ka kece e veivosakitaki tiko oqo, e macala ni dusia tiko ko Jisu vei ira na tamata oqo ni o koya dina na Mesaia yalataki. Ia ena nona sega ni sauma sara vakadodonu na nodra taro se o cei o koya, sa qai kaya ko Jisu: “Kevaka au sa vakalagilagi au ga, e na ka wale na noqu lagilagi; ia ko Tamaqu, o koya ko ni kaya tiko ni nomuni Kalou, o koya ga e vakalagilagi au. Ko ni sega ni kilai koya: ia au kilai koya ko i au. Kevaka au na kaya ni’u sega ni kilai koya, au sa na wili vaka tamata lasulasu me vakataki kemuni.”

E vakuria o Jisu ni tukuni Eparaama na tamata yalodina, sa kaya: “E a marautaka vakalevu ko Eparaama, na tamamuni, ni a tiko me raica na gauna ni noqu lako mai. Ia sa mani raica ka reki kina.” Io, ena mata ni vakabauta, a rai tu ki liu ko Eparaama ki na nona lako mai na Mesaia yalataki. Ena nodra sega ni vakabauta rawa, sa ra qai sauma na Jiu: “Sa sega ni limasagavulu na nomu yabaki, ko a raici Eparaama, oi?”

“Au tukuna vakadodonu sara vei kemuni,” e sauma ko Jisu, “ni se bera ni sucu ko Eparaama, au sa bula tu o i au.” E dusimaka oqo ko Jisu na nona bula e liu ni bera nona mai bula vakatamata ka i bulibuli yago vakayalo kaukauwa tu kina mai lomalagi.

Ni tuburi ira na cudru ni tukuna ko Jisu na nona a bula e liu mai vei Eparaama, sa ra qai tomitomika na vatu me ra virilaki koya. Ia e qai vuni ka lako tani mai na valenisoro ka sega ni mavoa. Joni 8:37-59; Vakatakila 3:14; 21:8.

▪ E vakaraitaka vakacava ko Jisu ni duidui na tamana kei na tamadra na nona meca?

▪ Na cava na i balebale ni nodra vakatokai Jisu na Jiu me kai Samaria?

▪ Na cava e vakaibalebaletaka ko Jisu ni ra na sega sara ni mate na nona i muri?