Wase e 80

Na Bai ni Sipi kei na iVakatawanisipi

E LAKO mai ki Jerusalemi ko Jisu ki na Solevu ni Vakatabui se Hanukkah, e dausolevutaki kina na kena a vakatabui tale vei Jiova na valenisoro. Ena 168 B.S.K., ka rauta ni 200 na yabaki yani ki liu, a buku druadruataki Jerusalemi ko Antiochus IV Epiphanes ka vakadukadukalitaka na valenisoro kei na vata ni vakacaboisoro. Ia, ni sa oti e tolu tale na yabaki a kovei lesu na koro ko Jerusalemi ka vakatabui tale na valenisoro. Sa tekivu mai kina me dausolevutaki vakayabaki na kena a vakatabui tale.

E dauvakayacori na soqo ni Vakatabui oqo ena vula vaka-Jiu na Chislev 25, ka tautauvata kei na i otioti ni vula ko Noveba kei na i tekitekivu ni Tiseba ni noda i vola ni vula. O koya gona, sa vo walega e dua na drau vakacaca na siga me vakayacori kina na Lakosivia bibi ni 33 S.K. Me vaka ni gauna ni batabata, e mani vakatoka kina na i apositolo ko Joni me “vula i liliwa.”

E vakayagataka oqo ko Jisu e dua na vosa vakatautauvata me baleta e tolu na bai ni sipi kei na nona i tavi me vaka na i Vakatawa Vinaka. Na i matai ni bai ni sipi e tukuna o koya e vakaibalebaletaki ki na i tuvatuva ni veiyalayalati ni Lawa vaka-Mosese. A vaka tu e dua na bai na Lawa me wasei ira tani kina na Jiu mai na nodra i vakarau ca na tamata era sega ni vauci ena veiyalayalati lavotaki vata kei na Kalou. A vakamacala kina ko Jisu: “E dina, e dina, au sa kaya vei kemudou, O koya sa sega ni curu e katuba ni bai ni sipi, ia sa kaba cake e na tikina tani, sai koya oqo na daubutako ka daukovekove. Ia ko koya sa curu e katuba, ko koya oqo nai vakatawa ni sipi.”

Era lako mai na so ka ra vakacavutaki ira me ra Mesaia, se Karisito, ia era a sega ni o koya na i vakatawanisipi dina ni a tukuni koya ko Jisu ka vaka: “Sa dolavi koya nai vakatawa ni katuba; a sa vakarogoca na domona ko ira na sipi: a sa kacivi ira na nona sipi e na yacadra ko koya, ka tuberi ira ki tautuba. . . . Ia era na sega ni muria na vulagi, era na dro tani ga vei koya; ni ra sa sega ni kila na domo ni vulagi.”

Na i “vakatawa ni katuba” ni i matai ni bai ni sipi sa i Joni na Dauveipapitaiso. Me vaka ni i vakatawa ni katuba, e ‘dolava vei’ Jisu ko Joni ena nona vakatakilai koya vei ira na sipi me na tuberi ira yani ki na vanua veico. Ko ira na sipi e kacivi ira oqo ko Jisu ena dui yacadra ka tuberi ira yani, e muri era na vakacurumi ki na dua tale na bai ni sipi, me vaka a vakamacalataka: “Au sa kaya vei kemudou, Oi au na katuba ni sipi,” a ya na katuba ni bai ni sipi vou. Ena gauna sa tauyavutaka kina ko Jisu na veiyalayalati vou vei ira na nona tisaipeli ka sovaraka mai lomalagi na yalo tabu vei ira ena siga ni Penitiko ka tarava, era sa vakacurumi yani kina ki na bai ni sipi vou oqo.

E tomana tale yani na i vakamacala ni nona i tutu, sa kaya kina ko Jisu: “Oi au na katuba: kevaka sa curu kina e dua na tamata e na vukuqu, ena vakabulai, ka na daucuru mai ka daucuru yani, ka na kune kakana. . . . Au sa lako mai me rawa vei ira na bula, ia me rawa vakalevu sara. . . . Oi au na i vakatawa vinaka: ia ka’u sa kilai ira sa noqu, ia ko ira sa noqu era sa kilai au; me vaka sa kilai au ko Tamaqu, ka me vaka ka’u sa kilai Tamaqu: ka’u sa solia talega na noqu bula e na vukudra na sipi.”

E sega soti ni dede na nona vakacegui ira na nona i muri ko Jisu, ena nona kaya: “Kakua ni rere, na qele-ni-sipi lailai; ni sa vinakata sara na Tamamudou me solia vei kemudou na matanitu.” Na qelenisipi lailai oqo, ka qai yacova me ra lewe 144,000 na kedra i wiliwili, era na qai lako yani ki na bai vou, se i karua ni bai ni sipi. Ia e tosoya ena nona kainaka ko Jisu ka vaka: “Eso tani tale na noqu sipi, era sa sega ni tiko e na bai oqo: sa kilikili me’u kauti ira talega mai, a ra na rogoca na domoqu; ena qai dua bau na qele-ni-sipi, ka dua bau nai vakatawa.”

Me vaka ni ‘so tani tale na sipi’ era sa “sega ni tiko e na bai oqo,” sa dodonu me ra lewe ni dua tani tale na bai, na kena i katolu. Na i otioti ni rua na bai ni sipi, e duidui na vanua e rau mua tiko kina. O ira na “qele-ni-sipi lailai” ena dua na bai era na veiliutaki mai lomalagi kei Karisito, kei ira na ‘so tani tale na sipi’ ena dua tale na bai era na bula ena vuravura Parataisi. E dina ga ni ra na tiko ena rua na bai ni sipi, ia era sega ga ni veivuvutaki na sipi oqori, se me vaka era vakila ni ra duidui tu, baleta me vaka ga e kaya ko Jisu era sa “dua bau na qele ni sipi” ena ruku ni “dua bau nai vakatawa.”

Na i Vakatawa Vinaka, ko Jisu Karisito, sa solia na nona bula me baleti rau ruarua na bai ni sipi oqori. “Ia ka’u sa solia vakai au ga,” e kaya o koya. “Au sa rawata me’u solia, ia ka’u sa rawata me’u kauta tale. Ai vunau oqo sa solia mai vei au ko Tamaqu.” Ni sa tukuna na veivosa oqori ko Jisu, era sa tawase kina na Jiu.

Sa ra kaya kina e lewe vuqa: “Sa curumi koya e dua na timoni a sa lialia; dou sa rogoci koya e na vuku ni cava?” Ia e so tale vei ira sa kaya: “Sa sega ni vakaoqo na vosa ni tamata sa curumi koya e dua na timoni.” Ena nodra nanuma lesu beka na nona a vakabula e dua ka sucu mataboko ena vica na vula yani ki liu, sa ra qai tomana: “Sa rawata beka e dua na timoni me basuka na mata ni mataboko?” Joni 10:1-22; 9:1-7; Luke 12:32; Vakatakila 14:1, 3; 21:3, 4; Same 37:29.

▪ Na cava na Solevu ni Vakatabui, ia e dausolevutaki ena gauna cava?

▪ Na cava na i matai ni bai ni sipi, ia o cei li na i vakatawa ni katuba?

▪ E dolava vakacava na katuba o koya na i vakatawa ni katuba ki vua na i Vakatawanisipi, era qai vakacurumi yani ki vei na sipi?

▪ O cei soti era vauci ena rua na bai ni nona sipi na i Vakatawa Vinaka, e yaco me vica na qelenisipi?